Old Street, Brick Lane è Shoreditch sò divintati lochi incunturnevuli di una visita in Londra. Scuparta magnifica ch’aghju fattu i primi tempi di a me nova vita in Londra.
Tempiu di u « Street Art », arti di pitturiscia in carrughju, issa parti di a cità hè veramenti piacevuli. Pà scopra di manera parfetta andeti à pedi s’è ùn seti luntani. Piglieti l’appiegazioni « Citymapper ». Iè parchì chì vò seti quì pà i vacanzi o pà campà, « Citymapper » sarà u vostru amicu! S’è vò seti luntani piglieti la metro o l’autobus ma piantetivi in Old Street è andeti à pedi dopu. Luntanu voli dì 1 ora à pedi semi d’accunsentu? S’è vò t’aveti 3O o 40 minuti piglieti i vostri pedi chì hè megliu pà voi è pà a pianeta!
Dunqua… Old street! Seti ghjunti sempri vivi d’issa spassighjata più longa cà u corsu Napuliò, và bè andemi! Una casuccia di Doughnuts (ancu scrittu « donuts », fritteddi vinutu di l’America suprana) famosa « Doughnut Time » v’aspetta pà cumplimintavi di u vostru sforzu spurtivu! Bravi!
Pigliemi dopu a strada pà andà in Brick Lane passendu pà Shoreditch pà apprizzà tutti issi dissegni di carrughju, culuriti è tamanti. 12 minuti caminendu, piseti u capu o cari! Eccu seti à 5 o 6 minuti à pedi di Brick Lane, un locu chì mi piace tantu!
Brick Lane…
S’è vò andeti a dumenica pudeti veda u marcatu di Brick Lane, veramenti piacevuli di più quandu ci hè u soli. Nisuna vittura in a stretta, solu marcanti è giranduloni. S’è ùn hè ghjornu di marcatu Brick Lane hè sempri piacevuli. S’è com’è me vi piacini i vistiti « vintage » seti ghjunti in a caverna d’Ali Baba! U longu di a stretta ci sò buttechi di vintage è ci hè ancu un marcatu cupertu induva pudeti truvà vistiti è oggetti anziani cum’è i « Polaroïd ». Ghjè quissu chì mi piaci in Londra, ghjè chì la ghjenti sò aparti senza sminticà u passatu è i valori. Pinseti à piglià stretti perpendiculari pà ùn mancà l’arti chì hè in ogni locu.
In a cuntinuità di l’uriginalità piglieti una cuppetta di cereali cun latti o un caffè à u Cereal Killer Cafe pà un girettu in l’anni 80/90!
Eccu una bedda spassighjata com’è mi piaci à fà in issa cità maravigliosa… Londra!
Culori, citazioni, paroddi, surrisi, uriginalità, calori di la ghjenti. Ùn eti paura di parlà incù la ghjenti, chì quì si parla incù tuttu u mondu, di a ghjurnata, di u tempu, d’issu ghjacaru chì issa donna prumena, d’issu vistitu magnificu « Ma induva l’aveti cumpratu??? » … eccu o cari lettori… andeti è parleti!