Falsa infurmazione, vera arma.

Trè anni fà, u mondu hà scupertu u veru puteri di e false infurmazioni. U sparghjimentu di massa d’infurmazioni false hè riesciutu à ingannà assai ghjente per fà cambià millaii di voti in favori di certi candidati cum’è Donald Trump o certe ideulugie cum’è quella di u Brexit. Ancu s’è ùn si pò quantificà veramente stu fenomenu in a sucetà per avà si capisce chì ste false infurmazioni ponu avè un effettu nantu à i votanti, è pò infine s’è stu fenomenu ùn hè cumbattutu incù forza è velucità, fà cambià u corsu di un’elezzioni. Pare chjaru oghje chè per vince un’elezzioni, influenzà i vutanti, ci vole à duminà e rete suciali, ci vole à cundivide e so idee velucitamente nantu à e rete osinnò l’altri seranu vantaghjati.
In qualchì anni, a falsa infurmazioni hè duvintata un’arma cun putenza guasi infinita dapoi u sviluppu di massa di e rete suciali. Induve, ci pigliava parechji mesi o anni per elaburà una teuria falsa, falla ingrandà, eppò falla sparghje in a sucetà, ora avemu bisognu di qualchì ghjorni solu. Si pò tuccà a ghjente per millioni, furzà i ghjurnali tradiziunali è ancu i capi di i partiti pulitichì à reagì, ciò chè riprensenta una vittoria per u creatore di a falsa infurmazione perchè dalla una vera tribuna in una sucetà.

I creatori di false infurmazioni sò ghjente intelligenti chè cunnoscenu bè comu marchjanu e rete suciali è Internet in generale.

Ch’ella sia per mutivi pulitichi o persunali, i creatori di false infurmazioni sò ghjente intelligenti chè cunnoscenu bè comu marchjanu e rete suciali è Internet in generale. U scopu maiò hè di creà un’infurmazione sensaziunale ghjughendu nantu à u fattu chì a ghjente leghje solu u titulu è u primu paragrafu, u restu si n’impipanu. In fatti, ci hè un sghembu in u nostru cerbellu chì si chjama u sghembu di cunfirmazione è vale à dì ch’avemu da crede infurmazioni – ancu s’è sapemu ch’elle sò false ! – s’è cuncordanu incù e nostre idee pulitiche. Hè ancu megliu s’è a falsa infurmazioni si pò riassume in un ciffru, una frasa o una citazione corta perchè megliura e so capacità di sparghjimentu in a sucetà. Ghjè a ragione perchè a ghjente s’annerba facilamente nantu à e rete quandu ci sò false infurmazioni publicati. L’infurmazione hè sempre sensaziunale è sbaffendu, ubblighendu a ghjente à sceglie un campu.

Ci hè allora un accordu tacitu trà i creatori di false infurmazioni è e GAFA.

Creà una falsa infurmazione ùn basta micca, ci vole à esse sicuru chè puderà viaghjà lesta è facilamente nantu à e rete suciali, è s’ella hè pussibule in u dibattitu publicu. Per accelerà u fenomenu, Facebook, Twitter è Google pruponenu servizii di prumuzione induve si paga qualchì soldi (menu di 100€) per prumove u so postu maliziosu. U risultatu hè tutale : si pò tuccà centenaii di milliaii di ghjente incù qualchì soldi è influenza a sucetà sana in qualchì ghjorni. Hè ancu di più faciule perchè i giganti di l’Internet cum’è Facebook, Twitter o Google ùn anu interessu à censuravvi, tuttu u so Business model hè basatu nantu à e publicità chì generanu guasi 60% di i so rivenuti. Ci hè allora un accordu tacitu trà i creatori di false infurmazioni è e GAFA. A lotta contru à e false infurmazioni ùn serà vinta s’è i guverni ùn s’attaccanu à u sughjettu di e pratiche etiche di e GAFA.

Ci vole dinù cunnosce u so publicu. Ùn avete da sparghje false infurmazioni à a ghjente educata, chè sò cuscenti di u fenomenu di manipulazione di massa. E tendenze nantu à e rete mostranu chè a ghjente a più attiva à Facebook o Twitter hè a ghjente à più radicalizata, di strema manca o di strema diritta. U restu di u participanti sò tutti moderati, è ùn participanu tantu in i cummenti di i posti, sò dunque ghjenti ch’omu si pò manipulà. I creatori di e false infurmazioni sparghjenu principalemente i so posti à a ghjente di strema manca o di strema diritta perchè serà più pronta à reagì. Quandu sta ghjente averà cummentatu i posti, anu da affaccassi in a timeline di a ghjente moderati ch’anu da leghje è dopu, esse influenzati da i cummenti, pensendu chè sò l’idee di a maghjurità di a ghjente, è s’anu da quistiunà nantu à e so idee, e forse accittà a falsa infurmazione cum’è vera.

Più l’infurmazione serà visibile nantu à e rete, più parerà credibile per a ghjente ch’anu da principià à dubbità

Finalmente, è guasi u più impurtante per fà sparghje l’infurmazione falsa hè di falla sparghje da a ghjente. Ùn vale nunda di fà vede a so infurmazione s’è nimu a sparghje à i so amichi. Una bona manera di furzà a ghjente à leghje è dopu sparghje e false infurmazioni è d’annegalli in a falsa infurmazioni incù falsi conti Facebook o Twitter per sparghje l’infurmazione in massa. Più l’infurmazione serà visibile nantu à e rete, più parerà credibile per a ghjente ch’hà da principià à dubbità, per finalemente crede l’affirmazione è sparghjella nantu à e rete suciali. Per esempiu, da u principiu di a campagna di u Brexit, 95% di i tweets spartuti nantu à Twitter eranu à prò di u Brexit. I partigiani di u Remain ùn sò riesciuti à fà cambià u fenomenu è un ghjornu nanzu à u referendum 75% di i tweets spartuti eranu tutti à prò di u Brexit. Ùn ci hè dubbitu chè i tweets à prò di u Brexit anu avutu un effettu nantu à u vutanti.

Oghje, l’infurmazione, i divertimenti, a prupaganda è u marketing sò duvintati un veru mischju. In un mondu ghjurnalisitcu induve ci sò certe errori di i ghjurnali di qualità cum’è Le Monde, Le Figaro o Liberation, a press people sempre circhendu u scandalu cum’è Closer i media di infortainment cum’è Konbini o Brut è i media di sparghjimentu di false infurmazioni di massa cum’è Sputnik, RT, Fox news è altra ghjente cumplotisti cum’è Alex Jones induve si trovanu i confini di a verità ?

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.