Ghjurnalettu di una corsa in Londra

Pà queddi chì leghjani TEMPI di manera rigularia è chì ani lettu qualcuni di i me articuli sapeti chì socu, dapò 2 mesi avà, in Londra. Parchì? cum’è dicu à l’inglesi quì, chì mi diciani « You come from Corsica?! What the hell are you doing here?! Are you crazy?»* …Maybe**! ma prifiriscu à risponda a verità «  to take a breath »***

Quiddi chì mi cunnosciani sani quantu socu innamurata di a me Cursichedda, u me amori pà issa tarra, a so lingua, i so lochi, a so cultura.. è ghjè quì u dolori certi volti in u scambiamenti di u paesi. Piglià aria? Ùn ci hè età, cum’è mi dicia un’amicu italianu arisera, « l’età ùn hè cà un numari ». Veru. Ma quantunqua hè più facili di parta à 30 anni senza ziteddi allora mi socu decisa. U corsu hè sempri statu un giramondu, innamuratu di i viaghji. La ghjenti chì pensani chì u corsu ùn li piaci cà a so tarra, chjusu annant’à eddu stessu sò beddi stupidi è pò essa ch’eddu saria bè ch’eddi studiessini un pocu a storia. Ùn si pò micca dumandà à a Corsica d’essa cum’è l’Ingliterra o alcunu altru paesi maiò. Ma iè si pò piglià asempiu pà un certu sviluppu chì pà me ùn si piazza micca in un centru cumerciali, veda dui?! Unu di i più maiò d’Auropa? Waooooo ancu di grazia ch’ùn si campava prima di issi maraviglii in Corsica.

Cumpiemi issa risata ma viditi ciò chì vogliu spiegavi. Aghju risintutu un bisognu di sorta di una zona cunfortavuli, di veda ciò chì si passa in certi lochi è pò essa u sangui corsu socu sempri stata intarissata da u mudelu anglo-sassonu. Mi piacini i viaghji. Da longu andà. Innamurata di Roma è di Londra. U travagliu si trova di più in Ingliterra cà in Italia…focu!

U 18 di ghjinnaghju.. t’aghju l’aviò à 2 ori. Prima volti chì partu da a me tarra pà più di 15 ghjorni. A me famiglia hè quì. Ùn hè micca statu facili chì in Corsica m’uccupu di a me minnannola. Micca uccupassi cum’è dicini la ghjenti chì portani trè friteddi tutti i 15 ghjorni cridendu ch’eddu basta pà i vechji. Innò. Aghju dattu minuti, ori, ghjorni, mesi, anni pà edda è s’eddu ci vulia à rifà la saria a stessa cosa. Issa donna m’hà dattu più ch’eddu ùn si pò spirà. Dicizioni difficili di dì « Minnanna socu quì pà tè tutti i santi ghjorni ma vogliu parta à campà un pocu à 1700 kilometri di tè.. ». Paura di fà mali, ùn hè micca colpa toia o Minnanna.. socu eiu.. aghju bisognu di risponda à quistioni.. fora di a Corsica. È issa donna, issa maraviglia di 88 anni m’hà dettu « s’eddu hè bè pà tè a me fighjuledda, fà la ». Grazia d’essa tù a me Minnanna d’amori. Grazia pà tuttu, socu furtunata. 2 ori.. avvedacci O Mà! O Bà! i me sureddi, zia è ziu, ci vidimi da quì à pocu. Ghjunta in Parighji induva stocu 3 ghjorni pà veda à Lisa-Maria, a me suredda chì studia in a cità è amichi. U 21 di ghjinnaghju, 1 ora di u dopu meziornu socu in u trenu. Socu dighjà andata trè volti in londra, ma ghjè a prima volta incù l’Eurostar. Un’ora di menu in Ingliterra, 2 ori è mezu socu in a gara di St Pancras, una maraviglia! Chjamu l’amicu Uber chì mi porta in Muswell Hill, aghju da campà i primi tempi ind’è un’amicu cutulesu, grazia à tè o JT! A vittura parta, King’s Cross, Camden High Street, Highgate..Muswell Hill  ci socu!

Allora parchì scrivu un’articulu oghji pà dì tuttu quessu? Diciu a i me cumpari di Tempi « ci sò talmenti cosi da cuntà quì chì t’aghju a pena à circà sughjetti fora di l’Ingliterra.. issu paesi mi dà l’inspirazioni ma pò essa hè troppu pà Tempi, pà i littori » è Forteleone m’hà dattu una risposta chì mi piaci.. l’idea ci pensu dapò u principiu. «Poi fà cum’ellu avii fattu pà Roma ? Un ghjurnalettu di viaghju ? Forse conti e to surtite, i lochi rimarchevuli ch’ai visitatu ecc…Forse, l’influenza corsa in Londra ? Ci saranu ? Cosi di u reamu anglo-corsu ecc ? » .. Ahhh Forteleone! mi piaci sempri à parlà incù eddu! Vi scrivu par quissu, parchì trà l’Ingliterra è a Corsica, a lea hè forta. Essendu in Londra, vulariu fà mostra di a mimoria cumuna trà iss’isuli è di i so storia affunati. Vogliu dinù sparta di manera più parsunali a me spirienza di « corsa in Londra », facendu à a mo manera un guidu di a cità!

Un ghjurnalettu di viaghju di una corsa à a scuparta di u mondu..pà u mumenti a me casa hè in Londra. See you soon!****

*Veni di a Corsica?! Ma chì faci quì?! Sei scema?

**Pò essa!

***Pà rispirà

****À prestu!

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.