Passanu l’anni, è u ripigliu hè sempre u stessu : site culpevuli, malfattori, banditi, terruristi ecc. Si, site tutti rispunsevuli di tutti i prublemi chì toccanu st’isulaccia. Infine, emu da crede ch’hè u populu corsu stessu u prublema di l’isula.
U fondu di u discorsu ùn cambia mai, incù grande bandere tricolore per ramentacci chì a Corsica hè francese, ùn si sà mai; forse chì, per disgrazia, ci ne seriamu scurdati. Hè guasi tuttu un arte per fà sapè quant’ella hè francese a Corsica. Allora, i servizi di l’Elysée ridoppianu di sforzi per innuvà! Bandera turchinu, biancu, rossu XXL ancu più grande ch’è u mo appartamentu studientinu in Parigi per fà sapè à sta mansa di bestiole quale hè u più forte! È paf, 1-0 per a Ripublica contru à a periculosa maghjurità territuriale prefetticida! Simu salvati.
Cum’è sempre per ste grande uccasioni , ci hè u merru più francese ch’è i francesi, più ripublicanu ch’è a Ripublica stessa, felicitendu u prisidente o i so strasurdinarii ministri ch’anu amparatu in l’alte scole di a so fermezza contru à u separatisimu, contru à quelli chì vulerianu fà manghjà à i nostri figlioli castagne è figatellu, cum’è s’è i partiti indipendentisti fussini creditati di 80% per e prussime elezzioni…
Ci sò dinù quelli chì sò andati à scuntrà à u prisidente incù e so dumande impurtantissime per i corsi ch’aspettanu ch’una sola cosa, vera preoccupazione maiò di tutti i ghjorni : cunstruì à menu di centu metri di u mare. Eh, seremu cusì ricchi da aspettà tutti a nostra casa incù piscina è elicotteru.
Eppò, infine, quandu tuttu u mondu hà mendicatu o fattu sapè quant’elu hè republicanu, u prisidente parla. Ah, cum’ellu parla bè, cunnosce tuttu nantu à tutti i sughjetti. Pò parlà più di 4 ore senza arristà. Cum’ellu hè forte u nostru Jupiter.
Hè venutu, hà datu qualchì schjaffi à qualchì merri appena arrabbiati, si n’hè impippatu di i naziunalisti chì credianu di fà cresce a pressione incù qualchì bandere è si n’hè vultatu in casa soia. “Veni vedi vici“…
Ma, daveru, chì seria a cunclusione d’issa visita, cum’è quella di tutte e visite di i riprisententi di u Statu?
Peghja ch’è una culunia, a Corsica hè ghjusta una cunquista militare per a Francia, una spressione di a so cupidità. Ùn ci sò piani di culunisazione per i culoni né pianu spluttazione di e nostre richezze. Ci hè tuttu da fà in Corsica, marchjemu nantu à l’oru, nantu à una terra virgine di guasi tuttu è pertantu, bagnemu, cuntinentali quant’è i corsi, in a nostra propia miseria. A Corsica francese hè una lascita di l’imperialisimu. A Corsica hè una basa militaria avanzata, un portu aviò, è di u so equipagiu, ci n’impippemu…
Aspettendu a prussima visita….