Sta nova faci frombu annantu à i reti suciali dapoi qualchì ghjornu, è incanta tutti i miopi di u mondu sanu. Di fatti, parechji travadda d’una squadra israelana pudarani da quì à pocu pirmetta à i miopi di ritruvà una vista nurmali, senza spichjetti o lintichji. Stu sistema si spannaria à traversu gocci uccularii, chì, ancu s’eddi ùn sò cà à a tappa di spirimentazioni, sarani un’avanzata trimenta pà u mondu uftalmologicu.
U duttori David Smadja hà avutu st’idea trimenta dopu à una ghjurnata à u travaddu assai difficiuli passata annantu à l’urdinatoriu. Ochji secchi, pena in capu, prublema di visioni.. Stu mali l’hà indutu à pinsà à a criazioni di gocci. Micca bisognu di spichjetti, ma ghjustu qualchì goccia da ricattà l’ochju è a visioni tramindui. Dopu à st’idea, David Smadja n’hà parlatu à un chimistu è à un fisizianu otticu di Jerusalem chì ani siguitatu a so idea è incù i quali hà pussutu cummincià stu prughjettu scemu.
U scopu hè di mudificà u traghjettu di l’ochju da curregia a vista. Un « laser » hà da ciuttulà tafuneddi (senza risichi) inde l’ochja annantu à a curnea, da traccià un muttivu otticu, currispundendu à a currizzioni d’ogni parsona. I gocci occularii, tandu, cunduciarani u lumu induva u vularemu pà una currizzioni uttimali.
Pà u mumentu, u duttori stima chì l’efficacità di u cuncettu si stendi à una sittimana. Da quì à parechji anni, l’orma à u laser si pudarà fà in casa soia, chì l’uparazioni ùn hè micca piriculosa, è senza dulori. Appena cum’è i diabetichi chì si pinghjini ind’è eddi, incù un sistema lighjeru da misurà a so glicemia. Si po imaginà tandu un laser minusculu è assai simplici, indicheghja u duttori.