Toulouse è i rumenzuli di Corsica
Sò 20 000 tunnellate di ramasuglie di Corsica chì pudarianu esse brusgiati à u Mirail in Toulouse. L’ugettivu di què hè d’aiutà a Corsica à sbarazzassi di i so rumenzuli, chì sola, ùn hà nè suluzione nè mezi per uccupassine.
A decisione sarà pigliata à a fine di l’annu, ma certi ùn sò micca d’accordi. U prefettu, ellu, ùn hà ancu datu u so parè, ma u gruppu EELV ( “Auropa eculugia i verdi “ ) ne hà una techja è i tulusani ùn volenu micca riceve i rumenzuli di Corsica chì per elli ghjè inaccettevule.
A decisione serebbe pigliata per derugazione, perchè, fin’à quì u trasportu di sti rumenzuli hè limitatu à i soli dipartamenti vicini à a Corsica ,spiega u partitu. Quelli di l’EELV si ponenu quistione nant’à e cunsequenze di stu trasportu in a circulazione stradale, in u sensu chì sti camiò ùn facenu micca prò à l’ambiente di sicuru è cuntribuiscenu à fà calà a qualità di l’aria. Sta pulluzione averebbe un impattu impurtante in a cità chì ci hè digià una certa pulluzione.
“Stu trattamentu di sti rumenzuli à Toulouse serebbe in cuntrariu totale incù u scomputu di u numaru di cullette settimanale in e cumune in giru à a cità“ Jean-Luc Moudenc.
A sparizione di i rumenzuli in Corsica, chì ùn hà incineratore, si face nant’à a spluttazione di soli 2 centri chì mettenu e ramasuglie sottu tarra. Ogni annu a Corsica pruduce 220 000 tunnellate di rumenzuli è 163 000 sò intarrate.
Affare à suvità…
In Corsica i rumenzuli sò sempre sugetti à un dibattitu, ogni annu si ponenu listesse quistione è ci sò listesse risposte. Un ghjornu avemu da avè a rispunsabilità tutale di i nostri rumenzuli, ùn pudariamu nè mandà una parte nantu à u cuntinente nè mette tuttu sottu tarra. Allora avà ci vole à movesi è sarebbe bè di truvà suluzione chì ci pudaranu aiutà à avanzà. Emu bisognu di piglià l’abitutine di fà u trì avà, perchè più tardi, quandu a Corsica avarà trovu una manera di gestì i so rumenzuli, serebbe bè chi omu sia digià capace di mette u vetru in a pubella verde è tutte e scatule in quella gialla. Ghjè una manera di fà vede chè vo site un pocu astuti in stu mondu di baulloni senza ciarbelli.