Stampa d’Idea cosa hè?
Un’idea nasci sempri da una parsona, una menti, una cuscenza. Stampa d’Idea hè nata da Pauline Torre, 27 anni. Ghjè cum’eddu li piaci à dì un situ ibridu chì prisenta iniziativi d’associ è ancu di prufissiunali chì viaghjani in u sensu di l’ambienti, di u clima, di a natura dunqua di l’eculugia. Ghjè un situ, un blog ma Pauline ci spiega chì ghjè soprattuttu un canali di cumunicazioni, cum’è una catena trà edda, i sfarenti attori è u mondu. Stampa d’Idea vedi u ghjornu u 1u di nuvembri di u 2018.
Ma comu hè nata issa idea?
Pauline hè una ghjuvanotta chì t’hà sempri u surrisu. Si vedi a so bravezza à a prima siconda è cum’è parechji ghjovani corsi di sta generazioni, a quistioni di l’ambienti hè bedda prisenti. Pauline ci conta “Stampa d’Idea hè nata da parechji anni di quistioni. Dapò chjuca socu sempri stata primurosa di l’embiu, di l’animali, di a natura è facia qualchì tempi chì mi dumandava comu possu, eiu, à u me niveddu, agiscia pà l’ambienti, pà difenda a natura… Comu possu agiscia in Corsica senza essa in un associu o affiliata à un muvimentu ma fà qualcosa simpliciamenti.”. Stampa d’Idea nasci da una custatazioni simplici fatta da Pauline. Una dumenica, issa ghjuvanotta s’hè dumandata ciò chì c’era da fà pà dà un aiutu, chì si passa in giru à edda? Pauline voli da tempu ma ùn hà idei, comu fà? Mancani l’infurmazioni ma Pauline hè sicura chì l’azzioni esistini, sicuramenti scunnisciuti. Di più hà da allargà a so riflissioni è vedi ch’edda ùn cunnosci mancu l’associi isulani chì lottani pà l’embiu nè l’azzioni è ancu di menu tutti l’attori ecunomichi di l’isula. A nascita di issa iniziativa veni ancu da una voglia di metta in valori tutti issi pussibilità, di dì iè a nostra ginirazioni hè primurosa di l’avveni. Paulina hà da crià qualcosa chì hà da raduniscia tutti l’attori chì mettani in baddu ogni ghjornu azzioni pà u nostru avveni è pà pruteghja a biudiversità di a Corsica. Eccu, Stampa d’Idea hè nata.
Stampa d’Idea in dui missioni
Un situ incù infurmazioni pà aiutà, pà participà. Un situ chì ci prisenta articuli annant’à azzioni passati, annant’à ughjetti chì sò megliu pà a natura. Ci hè vulsutu à fà un travaddu di censu di l’associi chì oparani pà l’embiu. Prisintà li, parlà di l’azzioni fatti è da l’infurmazioni a u publicu. Ghjè quì a missioni assuciativa. Dopu ci voli à circà è prisintà i socioprufissiunali qui travagliani durevulementi pà a Corsica , chì ani fattu a scelta di sviluppà a so attività in armunia incù l’eculugia. Pauline hè una d’issi donni chì pò fà avanzà una lotta, chì pò aiutà, dà una mani pà chì a nostra pianetta andessi megliu. A dici edda “pigliu piacè à scuntrà tutt’issi parsoni chì spartani a so visioni di a Corsica è di a nostra sucità, scambiemi annant’à i mezi pà “curà” a nostra biudiversità, u nostru embiu. Mi piaci à discriva la ghjenti chì riprisentani beddi valori è chì sò impignati in un’andatura magnifica pà a nostra isula.” Dui mesi dopu à a so criazioni, u situ hè beddu pienu! Articuli, azzioni, attori! Pauline vi conta tuttu ciò ch’edda scopri! A squadra di Tempi saluteghja issa bedda criazioni è prega bona strada à Pauline è a Stampa d’Idea! Longa vita! Ni riparlaremi di sicuru!
Pudeti andà puru à fà un girettu annant’à www.stampadidea.com !
Stampa d’idea hè ancu prisenti annant’à i reti suciali Instagram è Facebook! Aiò o ghjenti! Insemi luttemi pà a nostra Corsica.