A musica chì cura

Dapò una vintina d’anni l’evoluzioni di i tecnichi di neuromaghjineria parmettani d’identificà pricisamentii l’effetti è i mudificazioni pruvucati da a musica annant’à u nostru ciarbeddu. 

A musicoterapia

Quandì vo asculteti musica ghjè cum’è un focu d’artifiziu pà i vostri neuroni chì u ciarbeddu sanu hè sullicitatu. A musica hà una riprisintazioni pusitiva quandu u dulori t’hà una riprisintazioni negativa. A musica saria una terapia, a musicoterapia. Studii di parechji anni sò stati fatti è prufissori è circadori si sò avvisti chì u puteri di a musica era tamantu. Avaria effetti pusitivi annant’à certi parsoni depressivi, parsoni chì t’ani avutu un AVC è ancu annant’à parsoni chì soffrani d’Alzheimer.  A musicoterapia faci usu di a musica pà ricattà di i sintimi. Hà un putenziali intarissanti pà sminuiscia l’agitazioni, l’agrissività, l’angoscia, pà migliurà l’umori o pà uparà  annant’à u cumpurtamentu. A musica stimuleghja, rilassa è calma u dulori. 

I dui emisferi di u cirabeddu cuncirnati

Incù i malati chì t’ani Alzheimer, a musica parmetta di riattivà i capacità risiduali di a mimoria. I studii mostrani chì pà i musicanti u l’urganismu « corps-cailloux » chì faci a leia trà i dui emisferi di u ciarbeddu, a logica è l’artisticu, hè di più sviluppatu chè pà quiddi ch’ùn sò musicanti. A musica t’hà un putteri straudinariu. Hè qualchì volta pà i malati u solu mezu di cumunicazioni pussibuli. Certi meludii poni rinvià à un mumentu di a vita d’issi parsoni è participeghja à un svegliu cugnitivu spittaculari, di più attivendu in u ciarbeddu u rughjoni di Broca, quiddu di u parlatu.

Dunqua, i rughjoni di u ciarbeddu chì ani suffertu di lesioni impurtantissimi pruvucati da a malatia d’Alzheimer, poni essa impattati pà d’altri prisirvati. Ascultà a musica agiscia ancu annant’à l’emuzioni è stimuleghja a pruduzzioni di dupamina. 

Amparà danò 

I malati riesciani à ricurdà si di i meludii anziani ma ciò chì hè di più inaspittatu pà Hervé Platel, prufissori è circadori hè chì l’espusizioni à a musica parmetta à i malati d’attivà i capacità d’amparera. I suffrenti riesciani à ritena meludii novi è sò capaci di ripruducia li ancu s’eddi ùn arrigistreghjanu micca i paroddi. In certi spidali ogni malatu t’hà a so lista parsunalizata di musica. Si passa da u dulori à l’edunisimu sicondu Gérard Mick, neurologu à u spidali di Voiron à u nordu di Grenoble.

Ci voli à essa cuscenti chì a musica ùn guarisci micca issa malatia o altri, ma addulcisci, calma, differi l’effetti di a malatia. Pà u mumentu nisunu trattamenti guarisci Alzheimer ma u ligami suciali hè un elementui primurosu pà migliurà u cutidianu di i malati. A musicoterapia arreca di sicuru è ùn si pò dì u cuntrariu, un sintimu di benistà. Pà via di a musica ci hè un unioni suciali è un arti di campà insemi. Ghjè un curamenti chì cumporta solu benefizii, senza effetti sicundarii. una pratica musicali prima a malatia avaria un effettu di prutizzioni di fronti à issi malatii neurodegenerativi. È pò danò rallintà l’intrata in issi malatii. 

Da ritena: u 21 di sittembri hè a ghjurnata mundiali di lotta contr’à a malatia d’Alzheimer. È soprattuttu asculteti a musica, ogni ghjornu parchì cum’eddu dicia u scrittori inglesu, Aldous Huxley « Dopu à u silenziu, ciò chì s’avvicina à sprima l’inesprimibuli hè a musica ». 

Leave a Reply