U 4 di marzu scorsu, i nosci vicini Taliani ani vutatu di manera anticipata pà eleghja dui culleghji : unu di i diputati è quidd’altru di i senatori.
Fin’à quì, nudda d’anurmali. U sistemu Talianu issendu assai cumplicatu, l’alittori talianu di menu di 25 anni ùn pò micca vutà pà i senatori, par asempiu. L’alizzioni di i senatori issendu basata annantu à u mudellu utilizatu pà a camara di i diputati, faremi un’analisi di u scrutiniu di i diputati.
Iss’alizzioni ani purtatu in testa un partitu « antipartitocraticu, euroscetticu è pupulistu », u Muvimentu 5 steddi (M5S). Issu muvimentu, sottu à a prisidenza di Luigi Di Maio, un ghjovanu Talianu di 31 annu hà racoltu 10 727 567 voti, 32,68 % di i voti è 221 eletti. In lu 2013, avia racoltu 8 797 902 voti, 25,56 % di i voti è 109 diputati. U M5S hè statu fundatu da Beppe Grillo in lu 2009, un umoristu famosu in Italia incù i so tindenzi à musciassi sottu à a faccia di un pagliacciu.
A cualizioni di centrudritta, guidata da Silvio Berlusconi (Forza Italia), Matteo Salvini (Lega) è Giorgia Meloni (FdI), hà racoltu 12 147 611 voti, 37 % di i voti è 260 diputati. Salvini issendu ghjuntu in testa di i trè forzi, hà presu l’iniziativa di cuncretizà a cualizioni di centrudritta. Era a prima volta chì a Lega hà ottenutu un numaru impurtanti di voti, incù una prugrissioni nutevuli ind’u Mezzogiorno/Sud Italia.
U sistemu di prima avia favurizatu certi partiti di centrumanca cum’è u PD, gran pirdanti di l’alizzioni, incù 7 502 056 voti è solu 22.85 % di i voti è 122 diputati (297 prima). U solu partitu demucraticu pidda a falata da 25.5 % à 19 %, pirdendu più di 180 seghji in parti par via di a cuncurrenza di u muvimentu « Liberi è Uguali », di strema manca (1 109 198 voti, 3,38 % è 14 seghji).
U novu sistema Talianu, chjamatu Rosatellum bis, ùn garantisci micca una maghjurità assuluta pà u vincitori, à u cuntrariu di l’anziana formula chì daia a maghjurità assuluta à quiddu ch’era sbuccatu in testa.
Simpliciamenti, u sistemu Rosatellum (da u criatori « PD, ex-DC » Ettore Rosato) si scumponi cusì :
– 37% di i seghji (232 Camara – 116 Senatu) sò dati incù un sistemu maghjuritariu à ghjiru unicu in culleghji uninuminali (di ± 220 000 vutanti): in ogni culleghju hè elettu u candidatu più vutatu (in cualizioni), sicondu u sistemu « uninuminali seccu », ricorda un pocu u sistemu inglesu.
– 61% di i seghji (386 è 193) sò ripartiti prupurziunalamenti trà i cualizioni (di tipu LN-FI-FdI) è i listi (di tipu M5S) ch’ani francatu un numaru di voti (>3%) à u liveddu naziunali; a ripartizioni di i seghji si faci à u liveddu naziunali pà a Camara è à u liveddu righjunali pà u Senatu.
– 2% di i seghji (12 è 6) sò distinati à u votu di i taliani risidenti à u frusteru, u sistemu hè prupurziunali è privedi u votu di prifarenza.
U sistemu francesu hè sfarenti, pà u mumentu. Privedi 577 diputati eletti di manera uninuminali à 2 ghjiri è 348 senatori eletti di i « grandi alittori ».
Ind’u sistemu attuali, a Francia t’hà una maghjurità assuluta di diputati centristi LREM è MoDem di 359 diputati annantu à 577 (62,2%). In Italia, u centrudritta t’hà solu 260/607 diputati, sia solu 42.83 % di i seghji. Ùn basta micca pà assicurà una guvernanza chjara è serena pà u paesi.
A Camara hè prisiduta da Roberto Fico, pentastiddatu sustinutu da una parti di u centrudritta in virtù di un accordu pà a prisidenza. Inveci, à u senatu, una candidata di centrudritta sustinuta da i pentastiddati (Maria Elisabeta Casellati, FI) hà vintu a prisidenza, in virtù di u listessu accordu.
Issu ghjocu di « carreghi musicali » ùn piatta micca a nova rialità di a pulitica taliana : senza intesa trà a Lega più alleati (centrudritta) è i pentastiddati, u paesi hè inguvernevuli.
Dittagliemu un pocu a rialità di a vita in Italia. U paesi hè podassi inguvernevuli ma a rialità suciali hè mori difficiuli, in particulari ind’u Mezziogiorno (Sud) : PIB di 17800€/parsoni contru à 26800€ in media pà tutta l’Italia, u tassu di disuccupazioni di 19.4 % in lu 2017 (12.5 deci anni fà è 11.2 % pà l’Italia in lu 2017). Issi sciffri dimostrani una rialità di vita : trà pratichi maffiosi è lochi abbandunati, u Mezziogiorno sopravivi.
Di manera più particulari, piddemu dui asempii par azardu di zoni di u Mezzogiorno (Campania, Sardegna), una di a Liguria è una in Lumbardia.
A zona scelta in Campania (Sud) hè quidda di u prisidenti di a Camara, Napoli – Circoscrizione 19 Fuorigrotta. Locu di a pruvincia di Napuli incù un tassu di disuccupazioni di 23.9 % in lu 2017 è 16313€ di PIB/parsona in lu 2015 (ISTAT). U candidatu M5S Roberto Fico hà rccoltu 57.57 % di i voti (61.819 voti) contru à 20.16 % pà u centrudritta micca elettu (2.82 % pà a lega), 14.69 % pà u centrumanca micca elettu. Ùn hè micca u candidatu u meddu elettu di i pentastiddati, incù 62.09 % pà issu partitu in Napuli – Circoscrizione 28 Ponticelli.
A zona scelta in Sardegna (Sud) hè quidda di Sassari. A pruvincia di Sassari hà un tassu di disuccupazioni di 16.9 % in lu 2017 è 16973€ di PIB/parsona in lu 2015 (ISTAT). U candidatu cuntestatu neo-M5S Mario Perantoni hà racoltu 44.31 % di i voti (62.385 voti) contru à 27.71 % pà u centrudritta micca elettu (10.34 % pà a lega), 19.68 % pà u centrumanca micca elettu. Pà u stalvatoghju, l’avucatu Mario Perantoni era capu di fila di u Partitu di i Cumunisti Taliani (PdCI) pà i pruvinciali Sassaresi (collegio 3) in lu 2010. Avia racoltu, ind’a cualizioni di centrumanca, 119 voti (solu 2.74%), risultendu micca elettu. Issa prugressioni in voti di M.Perantoni veni in maiò parti, senza dubbitu, da l’etichetta 5 steddi, mori vutata in Sardegna.
A zona scelta in Liguria hè quidda di Ventimiglia (Nord), vicina à a Francia è sottumessa à flussi impurtanti di migranti, u « Collegio uninominale 01 – SANREMO ». A so pruvincia (Savona) hà un tassu di disuccupazioni di 6.7 % in lu 2017 è 24463.4€ di PIB/parsona in lu 2015 (ISTAT). U candidatu Forza Italia (centrdritta) Giorgio Mulé hà racoltu 46.07 % di i voti (66.751 voti) contru à 29.1 % pà u pentastiddatu micca elettu (24 % pà a lega), 17.76 % pà u centrumanca micca elettu. Nutemu chì i terri Francesi vicini sò quiddi di l’Alpi Marittimi (06), terri storichi di a dritta.
A zona scelta in Lumbardia (Nord) hè quidda di Seregno, u « Collegio uninominale 04 – SEREGNO ». A so pruvincia (Monza-Brianza) hà un tassu di disuccupazioni di 9.4 % in lu 2017 è 25867.5€ di PIB/parsona in lu 2015 (ISTAT). A candidata Fratelli d’Italia (centru-dritta) Paola Frassinetti hà racoltu 49.19 % di i voti (66.751 voti, di i quali 28.86 % pà a Lega) contru 23.41 % pà u pentastiddatu micca elettu, 21.88 % pà u centrumanca micca elettu.
Issi dui zoni suvitani a situazioni media di i zoni prascelti. I dui zoni i più povari è più tocchi da a disuccupazioni ani datu mori voti à u partitu pupulistu pentastiddatu (piddatuttu) è i zoni più « ricchi » ani datu a cunfidenza à i forzi di dritta. Nutemu quantunqua chì a Lega, primu partitu di a cualizioni di centrudritta pari muderata ma ferma euroscettica è vicina à Marine Le Pen à u Parlamentu Aurupeu. A Lega Nord tinia, qualchì annu fà, un discorsu righjunalistu assai particulari annantu à a ghjenti di u Mezzogiorno è a bandera Taliana. Dicia, par asempiu, in lu 2010 « Il tricolore non mi rappresenta, non la sento come la mia bandiera, a casa mia ho solo la bandiera della Lombardia e quella di Milano. […] Il tricolore mi rappresenta quando diventeremo un Paese normale con meno sprechi e ruberie al Sud”
I pentastiddati, eddi, sò mori vutati ind’i lochi induv’eddi sò bassi i paghi è a precarità hè massima. Si pò dì chì u paesi hè statu taddatu in dui, u Nord avendu più vutatu pà a Lega (u centru-dritta in generali) è u Sud (Mezzogorno) avendu datu cunfidenza à u partitu eurofobu poi aurupeistu, i pentastiddati. Issu partitu hè cunsidaratu nè di manca nè di dritta ma teni un discorsu assai suciali, avvicinendulu, annantu à certi punti, di a manca. Era dighjà in testa cinqui anni fà ind’i zoni meridiunali, ùn hà fattu chè crescia incù a cuntistazioni di u guvernu di u centrumanca surtenti.
Infini, pudemu rivena annantu à u casu di a Lega. A Lega Nord era un partitu righjunalistu di u Nord finu à a vinuta di Matteo Salvini (ex Cumunistu Padanu) chì l’hà trasfurmatu in un partitu di guvernu pà tutta l’Italia (4.1 % in lu 2013 è 17.37 % in lu 2018). À u puntu chì hè divintatu u terzu partitu in voti è u sicondu (>22%) ind’i sundami. U partitu si hè ancu sviluppatu ind’u Sud è in Sardegna in particulari, induv’hè passatu da 1327 voti (0.1%, tutali centrudritta à 23.6 %) in lu 2013 à 93771 voti (10.79%, tutali centrudritta : 31.04 %), sia una prugrissioni di 10690 %. A Sardegna, guvernata da u centru-manca passa da 29.4% à 17.66% in lu 2018 è i pentastiddati da 29.7% à 42.48 %.
I partiti relativamenti pupulisti incù idei eurocritichi «Lega Nord», « Fratelli d’Italia » è u « Muvimentu Cinque Stelle » ani attiratu 54.4 % di l’alittori Taliani è 58.11 % di l’alittori Sardi, par asempiu. Issa tindenza traduci una vulintà di dà u puteri à forzi alternativi, ch’ùn ani mai guvernatu è ch’ani, podassi, suluzioni à i prublemi di precarità.
A tindenza pupulista hè prisenti dapartuttu in Auropa è diventa chjaramenti maghjuritariu in certi paesi com’è l’Italia o a Grecia. Si hè sviluppata dapoi a crisa ecunomica di u 2008 è un hè micca pronta à calà.
Malgradu tutti issi punti cumuni trà i furmazioni pulitichi prisintati, l’accordu di guvernu ùn hè micca statu trovu pà u mumentu. Vidaremu à l’avvena s’è u guvernu si stabilisci trà i pentastiddati è u centrudritta. Vidaremu ancu s’è i so suluzioni pà luttà contru à precarità bastarani pà fà sminuiscia a disoccupazioni, par asempiu.
Storia da suvità…
salute a voi
à ringraziavvi di u vostru scrittu chi ci n’ampara assai .
prima d’andà nantu a u puliticu vuleria dà dui parè nantu a e parulle:
“pentastiddati “:5stelle hè u nome di stu muimentu , un inghjulia micca a lingua corsa e ‘ùn impone micca una parulla nova chi un ghjueria che per chjama stu muimentu .
“u tassu di disuccupazioni” :mi pare chi percentuale hè di più ghjustu che “tassu”(cursizasione di u frencese)
“disuccupazioni” : hè un periculu pè a nostra lingua postu ch’ella ci porta una parulla taliana (un antra torna ……)chi strangolla a nostra lingua .(“occupazione” si trauce in corsu per impiecu , travagliu) eu aeria scrittu a ghjente senza impiecu .
per vultà nantu a u puliticu, anc’ eu aeria pussutu dì chi u 5Stelle hè un muimentu« antipartitocraticu, euroscetticu è pupulistu »,ma a sente Di Maio , eri sera nantu a televisione taliana , dice chi s’ell’hè chjamatu a u capu di u guvernu a so pulitica serà à prò di e N.U (“nazioni unite”), ‘nù u solcu di a “Cummunitai Auropea ” e in tutti i casi vincinu a l’americani , i frencesi e l’inglesi ‘nù a guerra in Africa.
d’altronde mi pare chi DI MAIO vuleria fà a so maghjuritai incu u PD , chi 5Stelle dinunziava dipoi a so nascita .
a parè meu i voti i cambianu, ma a pulitica hè impastughjata da u sollu (ch’ellu sie in Italia o in astrò ….)
un antru cuntrastu , ch’ellu porta u vostru scrittu, seria quellu di e leggi chi regiscenu i guverni , seranu a prò di a Demucrazia o a quellu di i pulitichi ??
O ghjenti,
di l’Italia d’oghji, si po di tanti cosi.
Ma, à a fini di a fini, a lingua fu data à l’umanu par piattà u so pinsamentu, e si pudaria cumintà l’attualità europea par ori senza mai numinà i cosi.
Chi voli di “pupulisimu?”
L’idea è chi certa ghjenti vulariani fà à u populu prumessi falsi, mentri altri parlariani à u populu a lingua di a verità.
Comu mai veda a sfarenza fra i dui?
Un c’è micca bisognu d’essa unu struitonu.
Ci so in Italia, e ci so in Auropa, dui speci di forzi pulitichi.
Quiddi chi vedini l’islamizzazioni di l’Auropa comu una cosa ghjusta e bona (… in inglesi, t’hanni a parolla “nice”)…
e quiddi chi a vedini comu una cosa mala.
Avà, o ghjenti, cari patriotti, a siconda quistioni è:
e in Corsica?
Postu chi i Corsi (à cio che socu), un so micca estraterrestri,
mi pari ch’eddu sia esattamenti a stessa cosa in u nosciu paesi.
U presidenti di l’Assemblea di Corsica stessu po sempri lagnassi chi a simpatia par l’estrema destra t’avaria comu urighini a mancanza d’educazioni, a realità pulitica di u nosciu paesi rimani , chi l’islamizzazioni
à certi,
piaci,
e à altri,
un piaci micca.
In a natura, u struzzu à un acceddu cunnisciutu par piattà u so capu in a rena.
In u pinsamentu umanu, à propiu a stessa cosa,
Un prublemu ci vo numinà prima, e dopu,
circà una suluzioni.
Gjuvanni di a Torri.