U libru « Scrivimu a nostra lingua » hè un librettu di 72 pagine, scrittu da Brandon Andreani. U giuvanottu hè dinù à l’urigine di un blog cù listessu nome, blog chì spiega e sfarenze di e parulle corse chì anu listessa prununcia ma chì ùn si scrivenu micca di listessa manera.
U scopu di stu libru è di u blog hè d’aiutà e persone, chì parlanu u corsu o chì u volenu imparà, à scrive in ligua corsa. U blog cum’è u libru sò cumposti d’articuli chì spieganu e sfarenze d’impiegu di e parulle cù disegni uriginali è pedagochi fatti da Lena Navard, Tittò Limongi, Nadine Marchioni è Brandon Andreani.
Sta è Stà
Sta : Sta sera. Sta mani. Ti piaci sta casa?
Stà : Aghju da stà = Je vais rester.
Stà! = Reste! Stà quì! = Reste ici! Stà cusì! = Reste ainsi!
Stà = Il/elle reste; Il/elle habite. Petru stà versu a Piazza di u Diamanti.
http://scrivimuanostralingua.over-blog.com/2018/01/sta-e-sta.html
Stu libru hè statu rializatu cù l’aiutu di u CROUS di Corsica è di a Ghjuventù Paolina dopu à una mostra urganizata in Corti à a Casa Studientina. Sta mostra hà accoltu zitelli di CP è CM2 di a scola Sandreschi di Corti.
Stu librettu piglia in contu tutti i parlati di l’isula cun tutte e so sfarenze.
Hè statu stampatu in 250 esemplarii gratisi chì saranu distribuiti in tutta a Corsica, pè avà si pò truvà in Aiacciu à u Chioscu di a piazza Foch, ind’è Vibrations è à u Spaziu l’Oru. Una dedica hè urganizata ghjovi u 5 d’aprile à a Casa Studientina.
Principe è Principiu
Principe (Principi) à l’orali Prìncipe, prìncipi = Prince.
Principiu, à l’orali Princìpiu (Cuminciamentu, cumenciu, iniziu) = Début, commencement. Ripigliemu à u principiu?
Principiu = Principe. Anu capitu u principiu.
http://scrivimuanostralingua.over-blog.com/2018/03/principe-e-principiu.html
St’iniziativa hè veramente da salutà, permette à ognunu d’amparà ogni ghjornu specificità di a lingua corsa, di prugressà à u scrittu è d’arricchisce u so vucabulariu.
Felicitazione à Brandon Andreani chì cuntribuisce ogni ghjornu à a spartera è a salvezza di a lingua corsa.