E cundizioni di vita ind’e prigiò francese

A prigiò hà parechji scopi. U scopu principale hè di punisce una persona culpevule d’una malfatta assai grave. Ma dinù di prutege a sucetà di e persone periculose è ancu di scuragisce a ghjente di fà malfatte. Intantu i prigiuneri ùn devenu micca esse maltrattati o vede i so diritti nigati, devenu esse trattati cù rispettu è dignità ancu s’elli sò incarcerati.

Per quessa, certi diritti sò assicurati. I prigiuneri ponu cuntinuà i so studii, imparà altre lingue, seguità furmazioni prufeziunale è ancu avè un travagliu cù una paga. Stu travagliu in prigiò hè rigulatu cum’è u travagliu pè a ghjente ch’ùn hè micca incarcerata. Unu di i diritti i più impurtanti hè u dirittu di visita pè mantene a lea cù a famiglia.

Ogni prigiò deve ancu urganizà spassighjate, attività socioculturale cum’è a scrittura o a pittura, attività spurtive, è un accessu à parechji libri hè ubligatoriu. A medicatura deve esse fatta dinù ind’e prigiò.

I prigiuneri devenu ancu avè una cellula individuale ma ponu esse parechji in una cellula s’elle sò piene e prigiò. Di più, a prigiò deve esse pulita.

Ma spessu sti diritti di i prigiuneri ùn sò micca rispittati è e cundizione di vite ind’e prigiò francese sò veramente pessime.

Di fatti, e prigiò francese sò « soprapupulate »: pè a prigiò di Fresnes hè una « soprapupulazione » di 200%. I prigiuneri sò ammassati in cellule chjuche chjuche senza spaziu è senza intimità. In più di quessa, e prigiò sò infestate di topi, calvelli è cimice. E cundizione sanitarie sò veramente vergugnose è di fatti ci hè spessu casi di malatie ligate à l’infestazione di runzichinu è d’insetti. St’infestazione hè legata à a « soprapupulazione » è à u fattu chì e prigiò francese sianu veramente anziane. Certi travagli sò fatti ma sò travagli superficiali è nunda hè fattu pè occupassi di u prublema una volta pè sempre. Ci vulerebbe à rifà e prigiò da cima in fondu, custruì nove prigiò è fà una ripartizione di i prigiuneri più intelligente pè rispinghje a « soprapupulazione ».

Ci sò ancu i prublemi cù u sistema medicale ch’ùn basta micca, soprattuttu pè ciò chì riguarda e malatie psicologiche. I psichiatri venenu da l’ospedale è ùn sò micca presenti quand’ellu ci hè un’urgenza. E malatie psicologiche crescenu in prigiò per via di e cundizione di vita è un gattivu sistema medicale.

Ma ci sò ancu certi diritti ch’ùn sò rispittati cum’è a visita di a famiglia è l’avvicinamentu di i prigiuneri. Avemu l’esempiu di i prigiuneri corsi chì sò incarcerati in cuntinente è micca in Corsica. Ciò chì nega u dirittu à l’avvicinamentu postu chì e famiglie ùn ponu micca andà spessu in cuntinente cù u prezzu di l’aviò o di u battellu. È quì u statu francese ùn rispetta micca u dirittu à l’avvicinamentu è ancu u dirittu à e visite di a famiglia di i prigiuneri corsi.

U statu francese deve dunque migliurà veramente u sistema carcerale chì ùn rispette micca i diritti è a dignità di i prigiuneri.

Leave a Reply