Sicondu u filusofu grecu Aristote, « l’omu hè un animali puliticu », a so natura sarà di campà in a « cità ». Issa parolla, tradutta in grecu anzianu da POLIS, hà datu a PULITICA. A pulitica difinisci tandu l’affari di a cità.
Sempri in l’antichità, in u mondu mediterraniu a putenza pulitica hà lasciatu à Atena pà truvassi oramai in Roma, induva Ciceronu, omu puliticu, hà campatu à l’epica di l’imperatori Pompée. Era cunnisciutu, ma ancu timutu pà a putenza di u so verbu. A so retorica maravigliosa, ch’hà fattu infiarà u senatu rumanu ùn s’hè spinta incù u tempu, u so ughjettu solu hà cambiatu. In 64 dopu à G.-C. u frateddu, Quintus Tullius, riflittendu notti è ghjornu à a so candidatura li manda un picculu libru di cunsigli pà a so cava eletturali : Eccuni unipochi chì no emu sceltu è traduttu :
Dumanda ti chi hè a cità in questioni, chì hè a piazza chì tù voli, ma suprattuttu quali sè. Ogni ghjornu, o guasgi, falendu sin’à u Forum, ci vò à dissi : « Socu un omu novu, aghju da prisintà a me candidatura, socu quì in Roma ».
Veghja à tena i to sustegni, fà capiscia à i to debitori chi sarà l’uccasioni sola di tistimunià ti a so ricunniscenza.
Travadda pà avè u sustegnu di i ghjovani nobili, ti purtarani assai cunsiderazioni, mostra quantu sò impurtanti pà tè, sarani priziosi.
Essendu candidati, avemu dui primuri; a devuzioni di i to amichi è di u populu. A devuzioni di l’amichi hè u fruttu di benfatta è d’un certu incantu. In pulitica, u sensu di a parolla « amicu » hè più largu. Quiddu chì mostra segni d’amicizia par tè, chì intratteni a to simpatia, faci parti di l’amichi. Ma sarà meddu à essa stimatu da amichi veri, incù quali sarè ligatu da una allianza o da u sangui.
Truva amicizii sfarenti, ghjè impurtanti : avarè ghjenti cunnisciuti Chì ti purtarani una certa nomina, ma avarè dinò i magistrati pà avè a leghji à fiancu à tè.
Travadda incù passioni, ardori è forza, par avè tuttu ciò ch’hè statu dumandatu da i citatini.
T’aghju parlatu di a manera d’avè l’amicizii, oramai ci v òà parlà ti di i raporti incù u populu. Un’alizzioni dumanda di cunnoscia u nomu di l’elettori, d’essa sempri à fiancu à iddi, di mustrassi generosi, di vighjà à a so riputazioni è di fà crescia spiranzi pulitichi. Mostra bè i to sforzi pà cunnoscia i citatini. Fà crescia ogni ghjornu a to cuniscenza di u populu.
A generosità nasci incù l’usu fattu da u patrimoniu di a famidda. Sta generosità esisti duranti a cena ; veghjati, incù i to amichi, d’invità u populu sanu.
Sta generosità, sparghjila, fà tuttu pà chì u populu vinissi à truvatti di ghjornu com’è di notti. Ùn ti parla micca solamenti di a porta di a casa toia, ma dinò u to sguardu, a to faccia chi portani l’anima toia.
Oghji, mentri l’alizzioni, i nosci piazzi piddani un’aria curiosa di forum rumanu, è i candidati si lampani in una battaglia raduppiendu di forza rhetorica chi ramenta l’omi pulitichi latini qualchi seculi nanzu. Di più, avemu sempri intesu chì a pulitica attuali s’avvicinaia qualchì volta di certi pratichi antichi, più o menu accittati da a sucetà o da a leghji, allora era l’uccasioni di dumandassi sì, erani sempri d’attualità i cunsigli di Quintus Tullius, chì par iddu a parolla maestra di u puteri puliticu paria essa l’amicizia.