Fighjulate bè issu ritrattu di l’arena corsa piena di turisti perchè quest’estatu serà prubalmente viota viota, è lu serà per qualchì estate sì la crisa sanitaria si trasfurma in dipressione ecunòmica. M’avete capitu… In la so nota di cunghjuntura di lu mese di marzu di lu 2020, la Banca di Francia (BDF) hà pruvatu à stimà le perdite ecunòmiche di lu cunfinamentu per lu mese di marzu 2020 è dà le so perspettive per ciò ch’hè statu per lu mese d’Aprile. La nota di cunghjuntura annant’à la Corsica hè un ducumentu fattu da l’ecunumisti di la Banca di Francia ch’hè publicatu in accessu liberu ogni mese. Si basa annant’à un scandagliu fattu da la BDF appressu di l’impresarii corsi. Chì sò tandu le tendenze per u mese di marzu ? La sapemu, hè stata una disgrazia per l’ecunumia insulare, ma issa nota ci permette di quantificà le perdite. Vidimu inseme.
L’imprese corse sò state chjuse in media trè ghjorni di più chè quelle di lu cuntinente
Un primu elementu di risposta si trova in la prugressione di l’epidemia in la regione d’Aiacciu, chì la cità hè stata dichjarata “cità cluster” lu 9 di marzu. Vale à dì chì lu prifettu di Corsica hà pigliatu parechje misure : li stabilimenti scularii è e ciucciarelle sò ghjà chjuse dapoi lu 9 in ‘ssa cità di 70. 000 abitanti, ch’era cunsiderata da lu principiu di l’epidemia cum’è un fuculaghju di cuntaminazione. Tutte le manifestazione ragruppendu più di 50 persone in li lochi cunfinati eranu dinù pruibite, una misura chì visavanu li sinemà, li teatri, le sale di spittaculi è ancu tutte le sale di sportu, le discuteche o li lochi di cultu.
Una cunsequenza logica di quelle interdizioni in paragonu à lu cuntinente hè chì l’imprese di Corsica sò state chjuse in media trè ghjorni di più chè quelle di lu cuntinente. Più precisamente, l’imprese corse sò state chjose in media 8 ghjorni per lu mese di marzu contru à 5 à lu nivellu naziunale. Vale à dì chì le cunsequenze finanziarie per l’imprese corse à la fine di a crisa seranu più forte chè per quelle di lu cuntinente. Ancu di più di ghjorni chjosi significheghjanu menu ciffru d’affare, è ancu di più penalità da supportà per quantu à la tresoria. Stu scartu di chjusura hè più grande per l’imprese di l’agrualimentariu è 4 ghjornu per lu settore di lu trasportu chì sò l’imprese cun lu più grande ciffru d’affare di l’isula.
A custruzzione è li servizii mercanti particularmente culpiti da la crisa
I duie pilastri di l’ecunumia corsa ch’è sò la custruzzione è li sirvizii mercanti (turismu, risturazione, ostelleria) sò stati specialmente tuccati da la crisa sanitaria.
Anzituttu, la messa à l’arrestu di tutti li cantieri di custruzzione hà cunduttu à un ricorsu à lu disimpiegu parziale da bon pezzu d’imprese. Eppuru ci vole à nutà cum’è lu sottulinia la Banca di Francia una certa eterugeneità s’ellu si tratta le grosse opere, le piccule opere o li travagli publichi. Sò bè l’imprese spicializate in le piccule opere chì sò le più tuccate, chì ci hè statu una ruttura d’appruvvisiunamentu incù l’Italia. Ci vulerà dunque à aspittà ch’è ‘sse linie d’appruvisiunamentu sianu ristabilite per intravede la punta di lu tunellu. In l’inseme, li carnetti di cummandi sò suddisfacenti ciò chì lascia pensà à un ritornu à a nurmale annantu à lu mediu termine post-cunfinamentu. Tandu, menu d’arrulamenti di persunale sò da privede.
Riguardu à l’alloghju è la risturazione, le pruspittive sò assai più negative per caghjone di l’incertezza annantu à le mudalità di u scunfinamentu per li risturanti è alberghi. L’imprese hannu assai ricorsu à lu dispusitivu di disimpiegu parziali è numerose sò quelle chì risicanu la fallita. Annantu à lu mese di marzu di u 2020 ci hè una cuntrazzione di l’attività di lu settore di lu trasportu, alloghju è risturazione di u 130%. Le previsione per lu mese d’aprile eranu di una caduta di -30% cumparatu à lu mese di marzu ma la rialità hè ch’è la cuntrazione serà ancu più forte per via di lu cunfinamentu prulungatu tuttu à longu à lu mese d’aprile.
L’incertezza prevale per via di un forte flussu d’annullamentu di risiversazioni, cumpresu per l’alta staghjone. Sò li putenziali staghjuneschi chì seranu li più culpiti, chì lu ricorsu à ‘ssi impieghi serà assai limitatu è spustatu sicondu la ripresa di l’attività ecunòmica è la riapertura di li trasporti.
U pesu di l’ecunumia infurmale
In casu di cuntrazzione subitania di le ghjunte ver’ di l’isula, sò bè parechji migliaie d’impieghi chì puderianu sparisce, frà di elli impieghi infurmali. L’attività ecunomiche gravitendu intornu à lu turismu hà à spessu ricorsu à l’impieghi infurmali, chì ùn sò bè sicuramente micca cuperti da lu drittu di lu travagliu.
Da lu latu di lu pruduttore, lu ricorsu à l’impiegu infurmale è l’usu massicciu di liquidu cum’è mezu di pagamentu ponu prupizià li cumpurtamenti di sottu dichjarazione fiscale, ciò chì minacia di riturnà si contru à quelli chì ne abusanu perchè ùn puderianu dumandà aiute quant’è quelli chì hannu rispettatu le “regule di lu ghjocu”.
Un’aiutu insufficente, cunsequenza di una sottu dichjarazione fiscale, ùn permetterà micca à ‘ss’ imprese di risolve li so prublemi di tisuria. Ne seria menu tragicu s’è ùn cuncirnava ch’è ‘ssi imprisarii barattieri, ma forza hè di custattà ch’è quessa averà cunsequenze durevuli annantu à l’impiegu di la manu d’opera staghjunesca, in parte cumposta di studienti corsi, è per quale l’impiegu staghjunescu hè surghjente di rivinutu di cumplementu. Sicondu un studiu realizatu per a Culletività di Corsica fattu da Marc Simeoni Consulting, l’alloghju turisticu infurmale riprisentava in lu 2015 lu 66% di l’offerta di lu mercatu. Un ecunumia infurmale hè ben menu prutetta da li ticci ecunòmichi ch’ùn hè ben furmalizata. Un quistionamentu di lu nostru mudellu ecunòmicu s’impone chì la situazione ùn vulterà mai cum’è l’era di nanzu à la crisa. Hè oghje lu mumentu per i corsi d’impone un novu pianu di sviluppu per la Corsica.
Fonte
Tendances régionales – Corse Mars 2020 – Banque de France (2020)
Coronavirus en Corse : de la crise sanitaire à la crise économique ? État des lieux d’un territoire particulier – Le Grand Continent (2020)
Etude sur l’économie informelle en Corse – Marc Simeoni Consulting (2015)