U 9 di lugliu di u 2018, ferà 4 anni chì a guerra in Yemen tomba a ghjente è distrughje u paese. Sicondu à e Nazioni Uniti (NU), ci seria 10.000 morti per avà, un’epidemia di cholerà è l’amministrazione ùn marchja più. I dui paesi maiò di a regione sò in guerra fretta, a Persa è l’Arabia Saudita è facenu di stu paese u so terrenu di ghjocu novu. Ci sò dinù avà famosi gruppi terruristi cum’è u Statu Islamicu è Al Qaida chì vulenu apprufità di a situzione di guerra civile per arrulà è piglià u cuntrollu di u paese, cum’è hè statu u casu in Siria o in Iraq ùn ci hè tantu. Chì sò e fonti d’issu cunflittu ? Perchè paesi stragneri sò dinù culà ? Sò e dumande à i cui avemu da risponde oghje.
U Yemen, u 9 di lugliu di u 2018, Fonte : Wikipedia
Rossu: u guvernu è e forze ingiru à l’Arabia Saudita
Verde : i ribelli Huthi
Biancu : Al Qaida è u Statu islamicu
Ghjallu : L’indipendentisti di u Yemen Suttanu.
Un paese smizatu
U Yemen hè un ghjovanu paese di menu di 30 anni d’età. In fatti, c’era dui Yemen sin’à u 1990 : quellu di u Nordu, ingiru à u blocu di l’occidente, è quellu suttanu, cummunistu. Issa divisione, bizarria di a Storia, si cumpiò à a fine di a guerra fretta quandu i dui paesi si sò riaduniti. A capitale di u Yemen novu, a Ripublica di u Yemen, hè Sanaa. Pertandu, e difficultà per amministrà u paese sò numarose : ci sò tribute ch’anu u so propiu funziunamentu, curruzzione, una populazione d’una sotta-divisione di u sciismu (chisme) è l’altra sunnita. Di più, l’huthi, a populazione ingiru à u sciismu hà sempre dinunziatu a so marghjinalizazione, dumandavanu chì u Statu favurisce u sviluppu ecunòmicu in a so regione, vale à dì, u Nordu-Punente è a fine di l’influenza di l’Arabia Saudita nantu à a Ripublica perchè l’huthi rivindicheghjanu certi paesi vicinu à i confini di sti dui paesi. Quelle dumande anu pruvucatu a rivolta huthi di u 2004, sustenita da a Persa chì vulia apprufità di sta situazione per diminuì a sfera d’influenza di l’Arabia saudita è inchjerchjà e vie maritime di stu paese. A rivolta s’hè veramente rinfurzata dapoi u 2011, incù u Veranu arabu, eppo u 2014, quandu a rivolta hè divinuta guerra civile.
In u 2011-2012, in i tempi di u Veranu arabu, u prisidente Ali Abdallah Saleh hè capalzatu da parechje tribute chì dumandonu a demucrazia, a fine di a curuzzione, è a fine di u regimu di u prisidente, à u puteri dapoi 32 anni. Dopu à quella rivolta, una Custituzione nova fubbi scritta. Quella Custituzione prupunia una Ripublica federale, allora chì a Ripublica era sin’à avà, centrale. U prublema hè chì u prisidente capalzatu Saleh, s’hè alliatu incù l’Huthi per ripiglià u puteri è si missinu allora à dinunzià a federalizazione di u paese, attachendu a capitale Sanaa hè piglionu u cuntrollu d’una parte maiò di u paese. A sfera d’influenza di l’Arabia Saudita fubbi allora minacciata, è s’hè messa anch’ella à intervene in stu cunflittu per impedì a Persa di “piglià u cuntrollu” di u paese.
Un cunflittu regiunale trà paesi furesteri
Dapoi a caduta di Sanaa, l’Arabia Saudita, incù 10 altri paesi arabi, prova di ripiglià u cuntrollu di tutt’u paese incù bumbardamente è forze nantu à u terrenu. Ci vole à sapè chè parechje urganizazioni ingiru à i diritti di l’omu dinunzianu a campagna di l’Arabia Saudita chì face numarose vittime civile. Davveru, ancu s’è a munarchia hà avutu certi risultati in a so favore, cum’è a ripresa di a capitale, l’huthi sustenuti da i persi sò assai putenti per pruteghje a so regione è l’assalti contru à u portu di Hadaadi, per avà ùn hè un sucessu per a cualizione araba. Cusì a guerra civile di u Yemen hè divinuta una guerra trà dui paesi chì lottanu per u cuntrollu di u Mez’Oriente è ch’ùn ponu dichjarassi veramente a guerra ; infatti per u ghjocu di l’alleanze ci seria troppu à perde per a Persa è l’Arabia Saudita.
U ritornu di a secessione ?
Dapoi a riunificazione, i partiti ingiru à u Yemen suttanu ùn anu rinunziatu à l’idea d’indipendenza di u so paese. Quelli ultimi mesi, anu riuscitu à piglià u cuntrollu di Aden è provanu di fà una rivolta nentru à a guerra civile. S’è l’huthi sò veramente opposti à l’idea d’indipendenza, l’Arabia Saudita ùn hà attaccatu per avà e forze indipendentiste, ancu se ci vole à pensà chè seranu opposti à l’idea di a secessione.
Situazione cumplessa, parechji cunflitti in u listessu paese, religiosi, naziunale , regiunale è ancu internaziunale avà incù a presenza di gruppi terruristi islamichi internaziunali, u Yemen entr’avà in a so quart’annu di guerra, una guerra ch’hà da seguità qualch’anni di più.