Framezu à la stundetta di sviamentu cutidianu chì pudeti cunnoscia nantu à YouTube mentri la santa ghjurnata passata in casa, viniti puru à fà un giru in la bibliuteca virtuali di Tempi Rivista, si farà pruposti è scelti d’opari litararii, musicali o ancu di sinemà.
Iniziemi sta seguita di Playlist cù un picculu giru intornu à la parola “Shout!” divintata l’innu di u Rock inglesu ed americanu, o quandu u testu ùn hè più chì rumori purtatu da a batteria ed i chitarri.
- The Animals – Talking about you, 1964
The Animals. Forsa l’unicu gruppu di musicanti bianchi ch’iddi pudiani ascultà è stimà li “Mod’s”. A l’alba di l’anni sissanta, sta manza di ghjovani inglesi, fiddoli di lavuratori d’usina fughjiani la so povara cundizioni suciali nant’à la so Vespa, alluntanendusi di i cità fatti di mattoni rossi. Ci vulia à ritruvà li carrughja di Carnaby Street, par seguità li principi di sta rilighjona estetica, fatta di Rythm’n’Blues, di vistitoghji à a moda è d’anfetamini. Forsa The Animals surtiani di sti cantini bughjosi è affumicati, induva baddaiani sin’à a mani i ziteddi di Londra, ascultendu com’è pricantuli sacri li mughja ‘lli canterini nutriti da li dischi ‘lla Motown americana.
- The Isley Brothers – Shout, 1959
Mentri l’anni cinquanta, u gospel hè surtitu di a ghjesgia rimpiazzata da li salli di cuncerti accampati oramai da clavieri elettrichi, st’organi muderni. U label neru-americanu di a Motown s’assumidda ad un’usina chì producia centinaii è centinaii di dischetti. Eccu a prima prova chì farà l’ughjettu di parechji variazioni da li gruppi di Rock’n’Roll.
- The Beatles – Shout, 1964
Framezu à parechji criazioni urighjinali, u successu di i Beatles s’appughja din’ò annantu à molti canzoni impristati à la musica nera-americana, ed adattati à lu Rock’n’roll di u Swinging London. Eccu una ripresa di The Isley Brothers truvata in lu fondu di YouTube. Lampati in la fossa nant’à i piatti di a BBC, faciani mughjà u publicu scatinatu cù li so Rickenbakers à lu sonu chjaru.
- The Who – Shout and Shimmy, 1965
Forsa a più bedda variazioni di sta piccula seguita, com’è li so cumpari The Animals, The Who sortini di Carnaby Street è s’affaccani subitu nantu à li sceni britanichi dopu à parechji viaghji musicali fatti in lu so paesu ed in Francia. Accantu à iddi, parini invichjati dighjà i Beatles mentri sta siconda parti di l’anni sissanta, o quandu lu tempu in musica era più celeri ch’oghji. Armati di u più scemu di i batteristi inglesi, Keith Moon, sunaiani i dischetti cù accenti di sustenzi pochi ligali.
