Eccu a quarta intesa trà a Casa di l’Architettura di Corsica è i cumunità di i cumuni isulani. Dopu à u Giunsani, a Balagna è a cità di Bunifaziu, l’Alta Rocca accogli nant’à a so tarra una residenza d’architettura. L’edizioni di u 2020 cunsacrata à a riflissioni di i pratichi turistichi novi faci a lea trà rispettu di u tarritoriu è benefizii d’una ecunumia paisana.
- Salomé Bergsma è Margaux Regalia sò i dui architetti laureati ch’hani vintu stu cuncorsu, vinuti da a Scola Naziunala Superiore d’Architettura di Grenoble. Hà da scopra a squadra u rughjoni è intarrugà u turisimu in Alta Rocca di pettu à a so lea trà l’aghjenti, u patrimoniu, l’attività ecunomichi è a geugrafia.
A squadra hà da travaddà nant’à “ I mezi novi d’un turisimu alternativu in Alta Rocca”, tema di sta residenza inaugurata in Livia da un primu scontru cù l’eletti, a Casa di l’Architettura è i paisani, u dibattitu vivu mischiaia l’intaressi sfarenti di l’attori prisenti.
Crià ligami novi nant’à un tarritoriu ch’hà persu a so unità geugrafica, trascioglia u viotu demograficu di i paesi, spenda a staghjoni turistica, metta in baddu l’arnesi di gestioni è di regulazioni ancu più forti nantu à i siti turistichi, crià di novu un’ecunumia paisana appughjata da l’attività tradiziunali è u patrimoniu, sviluppà a cumunicazioni trà l’altri rughjona. Tanti bisogni mintuati mentri stu primu scontru, tistimunianzi d’un tarritoriu innalbatu circhendu da rinascia.
Trè tempi condividini stu lavoru, hà principiatu a prima tappa (da u 20 d’aostu sin’à u 3 di sittembri) cù a scuparta di u rughjoni passendu par i paesi, un primu cuntattu hè statu ingaghjatu cù l’aghjenti rucchisgiani è i turisti vinuti à passà i vacanzi.
I primi difficultà sò ghjunti cù a quistioni di a rilazioni storica, geugrafica è suciali trà piaghja è muntagna. Passendu par Sulenzara sinà i paesi di l’alturi muntagnoli, vedi a squadra chì l’accampu di u tarritoriu, i populazioni, sò sfarenti è t’hani intaressi varii. Nant’à a cumuna di Zonza / Santa Lucia di Portivechju, sò stati dati 700 parmissi di custruiscia mentri i dui ultimi anni. Un urbanisimu di a diffusioni cresciendu fora d’un sviluppu acconciatu, allora chì l’internu di u rughjonu hè sviutatu è minatu da l’indivisioni.
Sti mezi di travaddu impiegati da l’architetti sò stati pocu praticati in l’isula, chì u sviluppu turisticu di l’internu ùn hè mai statu pinsatu abbastanza da i puteri publichi. Pari vergina a riflissioni ma numarosi i qualità di u rughjoni. Bisognu à splutali solamentu, eccu u travaddu di i giovani architetti chì t’avarani da renda un primu contu resu u 30 d’aostu in Santa Lucia di Tallà è prisintà a cunclusioni di stu studiu righjunali in corsu.
Un’intrapresa salutifera da seguità nant’à Tempi Rivista mentri i ghjorna prussimi è sin’à u mesi di sittembri. Eccu u travaddu sanu di a squadra da scopra quì: Trans’humans Alta Rocca