À trè ghjorni di a putenziale più putente manifestazione ch’a cinquesima Repùblica hà cunnisciutu, tutt’u mondu si dumanda ch’hà da fà u guvernu per calmà a ghjente.
Marti, u 4 di dicembre, u primu ministru Édouard Phillippe hà annunziatu parechje misure per ripurtà a crescita di a tassa nantu à u Diesel, u prezzu di l’elettricità è a riforma nantu à u cuntrollu tecnicu per e vitture. Mercuri, U presidente Macron annunzia a suppressione di a tassa per l’annu 2019.
Ma avà, pare troppu tardu per prupone isse risposte à un muvimentu di i “gilets ghjalli” chì e so dumande sò avà più impurtante : crescita di 30% di u salariu minimu, ritornu di l’isf è ancu nove elezzioni legislative!
Tutt’u mondu hè surpresu da a putenza di stu muvimentu allora chè l’annu scorsu u guvernu avia pigliatu misure forte senza vera oppusizione. L’alignamentu di pianete ch’avia apprufittatu u presidente Macron hè finitu. A so vulintà di rifurmà u paese senza neguzià, senza cambià di pulìtica ùn pò più cuntinuà cusì. Infatti, Macron s’hè intrappulatu ellu stessu ; e so frase nantu à “quelli ch’ùn sò nunda” chì duvrianu “francà a strada per truvà un travagliu”, sti “galli refrattari” si sò svegliati. Tutte ste rimarche chì sò inaccettabile per un prisidente “babbu di a Nazione” anu, pocu à pocu, distruttu u ligame trà i Francesi è u so presidente. S’hè dinù intrappulatu in a so strategia per rifurmà u paese. Rifurmà lestu, senza neguzià, incù a paura ch’ellu rinculessi u guvernu è ch’ella ùn fussi più pussibule di rifurmà. Hè cusì chè marchja a Macrunia, sta machina maladetta di distruzzione di a sulidarità. Incù stu muvimentu ch’ùn hè piu pussibile di calmà, chì piglia in putenza perchè l’altri galli refrattari cum’è i studienti, l’agricultori è l’altri ghjunghjenu u muvimentu è induve u sustegnu ùn rincula micca u peghju scenario per Macron s’avvicina : a fine di e riforme liberali.
Macron a sà, s’ellu rincula, u so mandatu serà difficiule perchè serà ubligatu di neguzià per rifurmà, perderà u sustegnu di quelli ch’anu apprufittatu di l’annu scorsu è a so figura di Jupiter serà compia. A ghjente averanu capitu chè ci vole à distrughje tuttu in carrughju per fassi sente da u guvernu. S’ellu ùn rincula micca, e cunsequenze di e manifestazioni seranu titanesche. Vale à dì chè l’esecutivu hè intrappulatu in una strada senza bocca. A manifestazione di sabbatu s’assumiglia di più in più à una manifestazione di tutti quelli ch’anu qualcosa contru à Macron, ch’elli sighini di destra o di manca, anarchisti o fascisti, pruletarii o patroni. Insomma, a somma di tutt’e cullere contru à e pulitìche di i 30 anni scorsi.
Un altru prublema di a Macrunia hè chè u guvernu pensa chè i gilets ghjalli volenu neguzià. Hè falsu, stu muvimentu dimostra una cosa fundamentale : a ghjente vole di u guvernu ch’elli piglini in contu e suffrenze di u populu, di a Francia cassoulet, di a Francia di u SMIC, di a Francia di quelli chì devenu pagà à Cofidis o Cetelem tutt’e fine di mesi. Ùn volenu pigliassi per ministri, a sanu ch’ellu ùn anu masters o bascigliè. Volenu campà in un mondu induve i so zitelli camparanu megliu dopu à elli. Hè per quessa chè nisuna neguziazione serà pussibile. Dumandà à i gilets ghjalli neguziatori hè sia una incomprensione suciale di u muvimentu sia una strategia per fà passà sta ghjente per scema.
Cusì, e misure di u primu ministru ùn calmaranu i manifestanti è una vera presa in contu di stu fenomenu prufondu è di e dumande di i manifestanti hè necessaria s’è vulemu impedì u peghju sabbatu, è i ghjorni ch’anu da vene.
Ritrattu di Alain Jocard/AFP.