Da u marcuri u 9 di marzu à u marti u 15 di marzu, u festivale « Dipendenza à l’opera – A cullezzione/ Una storia di cinema chì s’accorda à l’altri arti » [Addiction à l’œuvre – La collection/Une histoire de cinéma qui s’accorde aux autres arts] piglierà piazza trà Bastia è Aiacciu. I bastiacci puderanu apprufittà di una prugrammazione filmica à u cinema Le Regent, mentre chì a Cità Imperiale accuglierà una seria d’attelli, di cunferenze è di spusizione. In cullaburazione incù Philippe Bérard di l’assuciazione dfilms, Lucia Arrio hè a cuncettrice è a cu-urganizatrice di a manifestazione. Risponde per Tempi à i nosci quistioni à propositu di st’iniziativa artistica.
Tempi Rivisita : Lucia, bonghjornu, ti ringraziemu d’accurdacci st’intervista per parlà di u festivale « Dipendenza à l’opera – A cullezzione ». Poi dicci cum’ella hè nata st’iniziativa ?
Lucia Arrio : St’iniziativa hè nata mentre i mo studii di Master. Aghju incuntratu u direttore di l’assuciazione dfilms, Philippe Bérard, in una fiera d’arte cuntempuraneu in Marseglia, per via di cunniscenze cumune. Vulia crià qualcosa in Corsica ed eiu faciu i mo studii à Sciences-Po in pulitica culturale è mecenatu, più precisamente in gistione di prugettu. Quessa cascava benissimu. L’idea hè di fà una storia di u cinema attraversu à u tema di a dipendenza. U cuncettu quì, più precisamente, hè a dipendenza à l’opera. U tema deve pigliassi à u sensu largu : l’idea hè d’accurdà u cinema à l’altri arti. D’infatti l’idea hè esattamente : u cinema hè paru à tutti l’arti.
À principiu, l’idea era di fà un festivale chì si passa in Corsica. Eppuru, hè un festivale chì face vene d’altrò parechji cunferenzieri è assuciazioni. Dfilms di Philippe Bérard hè un’assuciazione ch’hè basata in Marseglia è chì travaglia in differente rigione (Marseglia, Parigi, Corsica…). Ùn hè dunque micca esclusu ch’è l’eventuali prossimi edizioni vidissinu a criazioni di ponti trà a Corsica è a Francia, o ancu l’altrò ! Eppuru, l’interessu hè quantunque ch’ella si passessi in Corsica incù monda d’attori lucali, includendu a lingua corsa u più pussibile (prugramma à l’intuttu traduttu è stampatu in dui virsioni, l’affissu ancu hè traduttu in corsu incù i lochi in lingua corsa). Eppuru, per a seguita, avemu da vede cumu si passa issa prima edizione, chì hè stata un pocu cuntrariata da l’epidemia di Covid-19.
T. R. : U tema sceltu hè quellu di a cullizzione. Vi basate in particulare annantu à a cullizzione di u palazzu Fesch in Aiacciu. Poi spiecacci issa scelta ?
L. A. : Ci simu basati annantu à l’idea di a prugrammazione « Dipendenza à l’opera » per fanne qualcosa di multidisciplinare specialmente per a Corsica incù differente cunferenze, visite è scontri specifichi à u territoriu. U nostru puntu di partenza era a cullizzione di u palazzu Fesch, di u cardinale Fesch, chì hè una cullizzione di prima trinca. D’altronde, a prugrammazione stessa di u festivale hè una cullizzione à parte intiera.
T. R. : Avete in mente di valurizalla in mittendula in ligame incù u cinema…
L. A. : Iè, ma micca solu. U cinema di sicuru hà da nurrisce a cullizzione, ma a cullizzione nutrisce u cinema. Hè un muvimentu chì và in i dui sensi.
T. R. : Annantu à u cumunicatu di stampa di u festivale, hè mintuvatu ch’è u tema, quellu di a cullizzione, hè in ligame incù l’imbusche di u territoriu. Chì sò st’imbusche ?
L. A. : U scopu d’issu festivale hè, à livellu glubale, di travaglià incù ciò ch’è n’avemu quì è di mette in valore u patrimoniu di l’isula. U scopu hè di mette in valore u patrimoniu culturale, quì a cullizzione di u palazzu Fesch, chì hè a più grossa cullizzione di pittura taliana di Francia. Issa cullizzione và da i primitivi taliani sinu à u XVIIIe seculu. È que solu per l’Italia, chì a cullizzione hè ricchissima. Tandu, quandu parlemu d’imbusche di u territoriu, femu mintuvemu l’eventuale future edizione.
T. R. : Parlavi di valurisazione di u patrimoniu. U festivale hè in cullaburazioni cù CorsicaDoc, trà altri. Cumu vidite ste cullaburazione è cumu sparghjite st’archivie è ste cullezzione ?
L. A. : Pè ciò chì tocca à CorsicaDoc, avemu travagliatu cun elli per u preambulu di nuvembre, è speru ch’è no anderemu avanti cù sta cullaburazione. In u futuru, speremu firmà una cullaburazione incù a Cinemateca di Corsica, ciò chì ùn avemu micca pussutu fà quist’annu. L’idea hè sempre di cria ponti, cullaburazioni trà e differente assuciazioni è infrastrutturi. Simu ancu cullaburatori di u FRAC, incù Fabien Danesi, chì face parte di u prugramma è chì prisinterà filmetti d’artisti chì ritimeranu u nostru prugramma, è chì mette à dispusizione di u festivale a cullezzione di u FRAC.
T. R. : Quali sò l’artisti chì participeranu ?
L. A. : Seranu prisenti à issu festivale, frà altri : Agnès Accorsi, chì hè un’artista plastica ; l’assuciazione Arterra, un’assuciazione d’artisti basata in Moltifau ; Jacqueline Desanti, artista plastica, è Marcè Lepidi Acquaviva, artista pop-art. Jean Monastier, chì hè un artistu disegnadore, aprerà u so attellu. Ancu Dumè Paolini, chì hè scultore è plasticu è Virginie Trastour, chì travaglia trà Parigi è a Corsica seranu prisenti. Hè capita, ùn hè una lista esausta.
T. R. : U festivale hà per ambizione d’unisce a ghjente ingir’à a passione per l’arte. Cumu a rendite pussibile ? Una vulintà di demucratisazione c’è ?
L. A. : Emu parechje azzione : prima di tuttu, à u Palazzu Fesch, e cunferenze, l’attelli è l’intervenzione seranu gratisi. Tuttu u mondu puderà vene, i nostri cunferenzieri sò specialisti ch’anu adattatu u so discorsu à un’audienza larga. U vennari sera, ci serà una notturnacù l’elevi du u liceu Fesch. Ghjè dinò un arnese di demucratisazione : sti liceani, cù i so prufissori, anu fattu longu l’annata attelli ingiru à a cullezione è anu fattu visite à u palazzu Fesch. Cusì anu apprunfunditu e so cunniscenze. L’elevi di a scola priparatoriad’arte di Sartè anu participatu dinò in u 2018/2019, fendu visite è attelli sott’à a direzzione d’Agnès Accorsi, artista plastica. I travagli, anzituttu sculpiture, sò stati esposti prima chè a pandemia è seranu restituiti mentre u festivale sott’à a forma di filmetti. Pensu chì l’implicazione di i ghjovani hè l’affare u più impurtante per a demucratisazione di l’arte.
Dopu, emu parechji artisti chì apreranu e porte di i so attelli à u publicu è pruponeranu una spusizione di e so opare. Parechje gallerie d’arte è lochi culturali chì sò in cullaburazione cù noi feranu a stessa cosa. Tuttu què furmerà un percorsu dispunibile mentre u periudu di u festivale.
T. R. : Chì sguardu porti nant’à u cinema è l’arte cuntempuraneu isulani ?
L. A. : Prima, ùn sì pò dì chì c’è una tematica cumuna à l’artisti isulani. Dipoi qualchi anni, sti dui settori sò piuttostu dinamichi. U cinema in particulare s’hè svilupatu assai, ci sò filmi girati in Corsica da cineasti corsi, cù sucetà di pruduzione isulane. Hè ancu nata una piattaforma di streaming pè u cinema corsu è mediterraneu (Allindì). Pè ciò chì tocca à l’arte plastiche, ci sò certi artisti ch’ellu si deve mette in valore. Pè quessa vuleria ch’ellu ci sianu di più festivali d’arte plastiche in Corsica, da falli dialugà cù u fora.
Parò, ci sò talmenti festivali in Corsica chì a ghjente ùn sà più duve andà ! I periudi ch’è n’avemu sceltu noi (nuvembre è marzu) hè perchè chì ghjè una mossa destinata à i Corsi, micca à i turisti o à i studienti in vacanza. Vuliamu prisintà à e persone chì campanu quì à l’annata un prughjettu fora da i periudi di vacanza, da fà vene u più mondu pussibule di manera gratisi. Pè quessa, simu stati monda sustenuti da a Cullettività di Corsica.
T. R. : Ci seranu prossime edizione ? In Corsica, in altrò ?
L. A. : Pè u mumentu ùn a possu dì perchè chì ùn a socu. Eppuru, u scopu d’issu festivale hè d’esse perennu è di stassine in Corsica. Ciò chì serebbe interessante pè noi, serebbe di sviluppà ogni volta un cuncettu chì tucchessi à a Corsica è à e so prublematiche. Temi chì guardanu u fora è chì permettenu di scambià cun ellu sò da pinsà.
Grazie à Lucia d’avè rispostu à e nostre quistione.
Ritruvate u prugrammu compiu di u festivale pè i detaglii di a prugrammazione è u situ di l’urganizatori.
Intervista da Lea F. Ferrandi è Ornella Nobili.