Ghjovi passatu duranti l’addunita à l’Assemblea di a Corsica. A crechja di a CDC versu a Corsica Ferries chì s’alza à 86 millioni d’euri era un sughjettu di primura mentri u quali a prisidenta di l’assemblea, Nanette Maupertuis hà mintuatu a prova univarsitaria di Nathalie Sarthou-Lajus, intitulata « A crechja, u duveru, a falta » (in L’éthique de la dette, 1997). Eccu un estratu cortu chì ci spiega i rilazioni di l’omi, ligati da u pisu di i solda da pagà.
T’hà sensi sfarenti a parolla « crechja »: i solda da pagà, com’è l’ubligazioni chì s’avvicina d’un duveru murali, d’una spiazioni rilighjosa. U studiu linguisticu mostra tandu u liami trà crechja, duveru, falta è culpabilità.
In francesu, u verbu « duvè » traduci a crechja materiali è u duveru murali. In lingua tedesca, « Schuld » parla di a crechja materiali è di l’errori murali dinò. Hè sopratuttu Nietzsche chì ci mostra l’avvicinanza di ‘ssi termini incù u sintimu murali ligatu à i rilazioni ecunomichi, a stessa ch’esisti trà u creditori è you so debitori.
Eppuru a crechja ùn hè micca solamentu a metafora di u duveru, di a falta o di a culpabilità. Hè piuttostu a fundazioni di l’etica scartata di a murali à l’usu tradiziunali. Sicondu Ch. Malamoud è i so provi annantu à a rilighjoni induista, bisognu à sfarinzià cù chjarezza a cultura di a crechja è a cultura di u casticu murali, quissu sin’à imaghjinà una crechja resa libara di a culpabilità.
Di più, sicondu Emmanuel Kant chì ci hà purtatu una raprisintazioni di a murali prisenta oghji in a civilisazioni uccidentali muderna, duveru è falta t’hani un liamu intratenutu da a leghji, ciò chì priveda l’autunumia di u sughjettu di pettu à a sottumissioni o u ricusu di a leghji cundutta da a raghjoni soia.
A l’inversu di a teuria kantianna, a crechja piazza u sughjettu in a dipendenza d’un altru, significhendu ch’iddu ùn pò dassi a so leghji propia. Issa dipendenza cria un rapportu custretu è di puteru. In ogni casu, a crechja hè diventata una minacia par l’autonumia di u sughjettu.
Sicondu Nietzsche, a cuscenza murali nasci è cresci in l’ambiu suciali particulariu, sott’à a forma di u cuntratu trà u criditori è u debitori. Stu liamu ch’unisci dui parsonni si trova à l’urigini di i rapporti umani, a prima volta ch’iddi si scontrini. Eccu a tesa di Nietzsche pinsendu chì i sintimi murali com’è u duveru, a falta, sò traduzzioni di a rilazioni di puteru trà criditori è dibitori: più pricisamenti, u sintimu di a crechja. St’ecunumia primitiva di a crechja custruisci l’educazioni murali di l’omu incù un metodu crudelu : avè una memoria, tena i so prumessi, essa rispunsevuli. Nietzsche ci porta di novu sta crudeltà nata cù i sintimi murali par rompa a parti sacra di l’omu chì si credi divinu in qualità d’essaru murali. Eppuru ùn pensa micca u a crechja com’è a fini di a via culturali : a respunsabilità di a crechja hè un mezu d’educazioni par l’omu libaru è suvranu da scapulà.