Aspittemu i dui giri di l’alizzioni à a presidenza di a Republica i 10 è 24 d’aprili di u 2022. Eccu u calindariu sanu da scopra inghjò. Cinqui mesa nanzu, i candidati facini monda sforzi par raghjunghja a funzioni supprana di a Vesima Republica. S’è l’alittori sò intarassati da i dui ghjorna di votu sopratuttu, t’hà calchì tapu di più u calindariu versu l’Elysée
U primu di luddu di u 2021: l’iniziu di u conta par i spesi di campagna
Ugni candidatu t’hà da dichjarà in prifettura quiddu mandatu à racoglia i finanzi di a campagna soia. Pò essa una parsonna fisica o un associu di finanziamentu alitturali chì ricevi è arrigistra i doni, parti di u candidatu, aiuti di i furmazioni pulitichi.
Vaghjimu di u 2021 : sò dichjarati a maiora parti di i candidati
Ugni candidatu è libaru di dichjarà a so candidatura quand’iddu u voli è di manera publica. A u mesi d’aprili di u 2019 ‘ghjà, François Asselineau fù u primu da dichjarassi, seguitatu da Marine Le Pen.
I furmazioni pulitichi sceglini u so candidatu mentri a stagioni di vaghjimu: Yannick Jadot hè statu sceltu à a fini di sittembri duranti a primaria eculugista, Anne Hidalgo hè stata mandata da u Partitu Sucialistu d’uttrovi, è u candidatu di i Republicani sarà sceltu à l’iniziu di dicembri dopu à una primaria interna.
Par a maiurità presidinziali, Emmanuel Macron ùn hà annunziatu nudda sin’à oghji, puru escini detti è prumessi ‘ghjà. Di manera generali, i presidenti sempri in eserciziu aspittani calchì ghjorni nanzu à u primu ghjiru.
U 4 di marzu di u 2022 : a rimessa di i candidaturi hè chjusa
Ugni candidatura dipendi di i 500 cumparanzi (merri, deputati, senatori, cunsiglieri reghjunali è dipartimintali…). Sò racolti da u Cunsigliu Custituziunali chì i publicheghja dui volti par sittimana mentri u tempu ch’iddu ricevi i cumparanzi, dopu a racolta nanzu ottu ghjorna nanzu à u primu giru.
U 4 di marzu di u 2022 : fini di a scrizzioni annantu à i listi alitturali.
Dapoi u primu di ghjinaghju di u 2020, ci pudemu scriva annantu à i listi alitturali sin’à u sestu vennari chì precedi u ghjorni di u scrutinu.
U 11 di marzu di u 2022, publicazioni di a lista di i candidati
Par ugni candidatu, u Cunsigliu Custituziunali hà da verificà i cumparanzi (500 è vinuti di 30 dipartimenti almenu). Faci u cuntrolu di l’eligibilità d’ugni candidatu, incù i sottumissioni à parechji ubligazioni di dichjarazioni (patrimoniu, intaressi è attività).
U 28 di marzu di u 2022, hè iniziata a campagna uffiziali
Hà da cumincià dui sittimani nanzu à u primu giru di u scrutinu, hè piantata trà a veghja di u primu giru è a publicazioni uffiziali di i dui candidati chì t’hani a so piazza à u sicondu giru. Sarà compia duranti a veghja di u sicondu giru.
U 10 d’aprili di u 2022 : u primu giru di l’alizzioni
L’alittori francesi sò chjamati à vutà u 10 d’aprili. Eppuru certi dipartimenti fora di u territoriu metropolitanu vutarani u sabbatu.
I primi risultati sò cunnisciuti mentri a sirata da a stampa è l’istituti d’upinioni, da 8 ori à a chjusura di l’ultimu scagnu di votu. U ministeru manda i resultati à ugni cumuna, infina a publicazioni di i risultati da u Journal Officiel significheghja a ripresa di a campagna.
U 24 d’aprili di u 2022 : sicondu giru di l’alizzioni.
Si teni u sicondu giru a dumenica, u 24 d’aprili. I primi risultati stimati sò sparti duranti a sirata da a stampa è publicati da u ministeru nanzu à a so pruclamazioni uffiziali.
U 13 di maghju di u 2022 : a trasmissioni di u puteru.
Pidda i so funzioni u novu prisidenti nanzu à u 13 di maghju, ultimu ghjornu di mandatu par quiddu chì lascia l’Elysée.