U risultatu di i voti hè cascatu marti 9 di marzu per a matina : dopu à una sirata di votu luni sera, l’immunità parlamintare di trè diputati catalani, chì l’anzianu presidente di a rigione Catalogna hè oghje elettu à u parlamentu europeu, hè stata ricusata per votu in l’emiciculu. ‘Ssa misura era riclamata da u Statu spagnolu in seguitu à u tentativu di sicissione in lu 2017, cù una dumanda di referendum nant’a a quistione de l’independenza di u paese.
A pisata di l’immunità parlamintare hè stata appruvata da 400 voce contru à 248 è 45 astinsione, per votu à bulletinu sicretu. U diputatu Carles Puigdemont dinuncia una persecuzione pulitica in seguitu à ‘ssu risultatu. « A soluzione di u cunflittu in Catalogna ùn serà micca truvatu cù rimittenduci in manu à a ghjustizia spagnola » hà perseguitatu u diputatu.
I diputati trà e mane di a Belgica è di a Scozia
A pisata di l’immunità parlamintare rimette trà e mane di a ghjustizia belgica u sorte di i diputati catalani Toni Comìn è Carles Puigdemont, è trà e mane di a ghjustizia scuzzese per Clara Ponsati, attualmente rifughjata in Scozia. I trè diputati sò stati eletti in lu 2019. Difatti, u Statu spagnolu riclamava li so estradizione per sottumette li à a ghjustizia di u paese. A Belgica, chì à ‘ssu ghjornu avia rispittatu l’immunità parlamintare di i diputati catalani, duverà dunque dicide a seguita di l’evenimenti. Quessa ùn era micca stata u casu di a Francia chì, in u 2019, avia impiditu i diputati catalani di entre annantu à u territoriu francese per piglià i so sede à u Parlamentu Europeu di Strasburgu, da a minaccia di un’estradizione ver’ di a Spagna.
A Spagna, inquantu à ella, s’hè felicitata di u risultatu di questu votu, dichjarendu ch’è “i prublemi di a Catalogna si risolvianu in Spagna.”
L’affare purtata davanti à a ghjustizia europea
‘Ssu votu ùn ferma micca definitivamente l’avvene di i diputati. U diputatu Puigdemont hà annunciatu a so intenzione di porta ‘ssa affare davanti à a ghjustizia auropea. Di più, a Belgica avia dighjà ricusatu, in ghjinnaghju 2021, d’estradà Lluis Puig, anzianu ministru indipendentistu catalanu per u mutivu ch’è « u risicu seriu di viulazione da a so drittu à un prucessu equitativu hè manifestu ».
A Spagna hà ghjà cundannatu à a prighjò un diputatu europeu catalanu, Oriol Junqueras à pene forte di prighjò in seguitu à u referendum di u 2017 annantu à a quistione di l’indipendenza di a Catalogna. Junqueras hè statu cundannatu à 13 anni di prighjò per “sedizione è malversazione”, è 13 d’ineligibità in u 2019, dopu à a so elezione cum’è diputatu europeu. A Corte di Ghjustizia di l’Unione Auropea hà statuatu u dicembre 2019 ch’è Oriol Junqueras benefizieghja di l’immunità parlamintare è deve esse liberatu senza cundizione. Decisione ch’è a Spagna ùn hà micca rispittata, purtendu, di ghjinnaghju 2020, à a cessione di i dritti di Junqueras è di a so immunità parlamintare da u Parlamentu Auropeu.
Ritrattu – AFP.