U 14 di ghjinnaghju di u 2021, Tempoli.
Romain entra ind’u bar di Michel, sempri apartu.
Essendu ghjovanu cunsiglieri municipali (Front Social) è appena parenti incù Michel Migalli, hè sempri chjamatu ind’è la ghjenti pà prublemi infurmatichi.
Meziornu. Romain hè invitatu ind’è Simon (dittu So Lurisinco) è Josiane, un coppiu d’una sessantina d’anni urighjinariu di u locu dapoi seculi è seculi. Josiane hè ancu parenti incù François, anzianu funziunariu di u serviziu di i marcati publichi à a righjoni, cullegu di Jackie è François. Edda travaddaia à a posta, essendu stata fattrici. Eddu era capisirviziu à a Banca di Tempoli.
Pà ritruvà à Simon et « Madame Josiane », Romain entra ind’a casa di Michel, induva François pidda un bichjeri di vinu prima di magnà in Sa Contra Boriógana.
À iss’uccasioni, Michel pruponi qualcosa à Romain. Un’affari in oru, sott’à u nomu di Télémagouille. Pà 115€, pudaria avè tutti i televisioni ch’eddu vularia, Canal Plus, OCS, Playboy è a televisioni Tolsana « PaggioruTV », incù u nomu evucatori.
Guasgi gratisi. 115€ à l’annu, vali a pena.
Una sorta d’IPTV. Muriel vendi sempri apparechji illegali d’issu stilu ind’u so bazar pà i so amichi, essendu ancu cummercianti affiliata à a reti di distribuzioni ufficiali di Canal plus.
Incù 55€, ci hè l’apparechju è un’annu d’abbunamentu à tutti i TV à pagamentu di 115 paesi. L’annu dopu, si pagaria 22€ di novu abbunamentu.
U pruduttu si prisenta sottu à a forma di una scatula “crema” di l’anni 1980 incù l’indicazioni “ATTENTION! HAUTE TENSION”.
Michel, cusì, metti in baddu seanzi di film a sera, malgradu à u fattu chì sia intardettu di sorta dopu à sei ori di sera. A novi ori di sera, si pò fighjulà un film di a Box Internet pà 4,50€ par parsona. Dopu à deci ori è mezu, u film eroticu costa 5,60€. Dopu à meza notti, pà veda u film più esplicitu annantu à PaggioruTV, costa 6,40€.
PaggioruTV, una televisioni à pagamentu, à u nomu in Sassaresu evucatori, ditinuta da a famidda di l’ex merri Gossotta. Annantu à issu canali, si vedini l’exploits/i fattoni tedeschi, taliani o russii.
Romain, eddu, ùn cunniscia mancu appena issi pratichi spiciali è si ne ridi di a situazioni. Télémagouilles hè qualcosa di passiunanti pà eddu, ughjettu di risati eterni.
Télémagouilles, issu sistemu IPTV chì hè cummercializzatu da deci anni in Tempoli è u so circondu da Gossotta è a so mansa di cummerciali.
Dopu ad avè riparatu a televisioni di Michel, Romain si ne và ind’è Simon è a bionda Josiane ind’è i quali hè statu invitatu. Sò dui parsoni particularmenti avari, malgradu à fattu ch’eddi tucchessini 6000€ di ritirata à dui.
Simon t’hà un urdinatori Atari ma voli essa ind’a mudernità è pudè andà annantu à internet pà veda i publicazioni di Martine, Michel è, più impurtanti, i nutizii di u merri Mònoga. Pà issa raghjoni, hà chjamatu à Romain.
Madame Josiane, edda, t’hà dui « tablettes ». Issa donna, curiosa cum’è ùn si pò imaghjinà, t’avia una reputazioni tremenda : quidda di apra i lettari di parsunaghji impurtanti di a cità fin’à a so ritirata ind’u 2013.
Hà saputu cusì chì Bainzu Gossotta avia 2 amanti da i quali un omu, chì i marcati di a merria aviani guasgi tutti casi di froda.
Tanti cosi piattati chì Madame Josiane si facia un piaceri di rivelà à a ghjenti.
Romain, eddu, era troppu ghjovanu à l’epica pà interessassi à issi sughjetti. Maliziosu, hè intrutu in pulitica ind’u 2020, divintendu cunsiglieri municipali di a so cumuna di nascita. A verità hè chì i so elettori sò parsoni di La Jalva è di Monsalviaga, l’altri paesi furmendu a cumuna di Tempoli ùn lu cunnoscini tantu.
Romain si ne và à trè ori è mezu di u dopu meziornu, senza abbunassi à l’offerta pruposta da Michel è Simon.
Ani tutti u sensu di l’affari in Tempoli, quantunqua.