Guasgi un mese dopu a decisione pigliata da l’esecutivu di mantene u statutu « DPS » d’Alanu Ferrandi è Petru Alessandri, l’associu L’Ora di u ritornu è a sezzione corsa di a Lega di i dritti di l’omu urganizeghjanu una manifestazione in Corti issu sabbatu u 30 di ghjinnaghju, à un’ora nant’à a piazza Padoue.
Incarcerati dapoi u 1999 pà l’assassiniu di u prifettu Claude Erignac, i dui militanti naziunalisti sò sempre chjosi in cuntinente, ben ch’elli abbianu u drittu d’esse in libertà cundiziunale dapoi quattru anni sicondu a leghje è ch’elli ùn abbianu postu nisunu prublema mentre a so incarcerazione. U statutu « DPS » impedisce u so avvicinamentu in Borgu, induva sarianu più vicini à e so famiglie. A numinazione d’Eric Dupont-Moretti à u ministeru di a Ghjustizia avia lasciatu sperà un cambiu di statutu, prestu dilusu da un dicretu di Jean Castex, chì ricusa u so putere di decisione à u ministru colpa à u so impegnu in a difesa d’Yvan Colonna.
Dopu à iss’eventi, una petizione, addirizzata à Emmanuel Macron è Jean Castex, hè stata criata in linea contru à ciò ch’hè percepitu cumè un’inghjustizia tremenda è una vindetta di u Statu. U testu di L’Ora di u ritornu è di a Lega di i dritti di l’omu, firmatu ghjà da più da milla parsone, dumanda l’annullamentu di u statutu « DPS » è l’avvicinamentu di i dui prigiunieri, à nome di l’ugualità davanti à leghje è di i dritti umani. Hè un’elementu di a mubilisazione più larga urganizata da l’associu, chì s’alluntaneghja di e rivindicazione naziunaliste è cerca sustegni in l’inseme di a sucetà corsa, chjamendu à un svegliu cullettivu. D’altronde, si pò vede ind’è a lista di e centu prime firme, ch’ùn sò micca soli à aduniscesi i naziunalisti, postu chì i nomi di Jean-Martin Mondoloni, Jean-Charles Orsucci o François Pupponi sò scritti frà quelli di Gilles Simeoni, Jean-Félix Acquaviva o Michel Castellani. Forse saranu iss’accolta è issa petizione i primi passi versu una mossa cullettiva è generale pà u ritornu d’Alanu Ferrandi è di Petru Alessandri in tarra corsa.
Truvarete quì sottu u ligame versu a petizione :