Sartè, una seratina di luddu passatu. L’aghjenti sò vinuti à ascultà i cunfarenzi dedicati à Napuleone urganizati da u prufissori Olivier Battistini, spizialistu di a storia greca è di a filusufia pulitica. Hani scupartu cù filicità u travaddu d’Anton’battista Filippi. U ghjovanu sartinesu studiendu u drittu in Parigi prisintaia di viva voci sta parola ch’hè stata u spinu ‘lli so ricerchi: u liberalisimu latinu, è quissu par via d’un studiu nant’à u sistemu puliticu novu chì nascia in Corsica mentri i quaranta anni di rivuluzioni isulani. U talentu di stu primu libru hè statu ancu di più salutatu da quiddi chì l’ingirani da la so piuma: un capitestu di a prufissora di drittu publicu Wanda Mastor primu, è una cunclusioni firmata da Olivier Battistini.
L’autori ci offri un lavoru riccu di cuncetti novi da un studiu ‘lli fatti storichi. Trè capituli guasgi sparti sicondu una trinità chì faci sola u riassuntu d’un seculu: Teodoru di Neuhoff, Pasquale Paoli è Napuleone. Trà influenzi sterni è parsunnali di l’omi, trà i forzi inchjappivuli di a Storia è l’intrapresa pulitica di i capi naziunali, l’opara parmetti à ognunu d’acquistà l’essenza di l’epica. U liberalismu latinu saria tandu una cundutta pulitica sparta da a lascita filusufica trà i capi di a Nazioni, una leia cumuna vinuta d’una cuncissioni antica sempri viva di u guvernu ch’hà varcatu i seculi è li so cuntesti.
Principiò una rivolta diventata rivuluzioni. A marchja versu Bastia, capitala corsa di Genuva saria stata un ricusu populari di l’ordini piantatu com’è tant’altri, in lu prulungamentu d’un puteru isulanu smuntu dapoi a morti di l’ultimi signori. Parò, a storia hè stata altra, chì l’avvenimentu annunziava un seculu di scuzzulamenti pulitichi è suciali intesi sin’à i cunfini auropei è maritimi.
Anton’battista Filippi poni l’ochja di u legislatori nant’à a storia. Una prima prova ricca di spiranzi chjamata “A Corsica Terra di drittu”, hè ghjunta à l’impinsata framezzu à a produzzioni fasta nant’à l’epica, sempri mintuata eppuru scunisciuta. U storianu schjarisci i fatti d’un cambiamentu cù i lumi di a filusufia pulitica, attizzatta da l’atti di libarazioni d’un populu cù u drittu, aiutatu da u fucili. Tandu l’aspettu militariu ghunghji in siconda piazza, chì primu “a Rivuluzioni di Quarant’anni hè iniziata da una vulintà: caccià i Genuvesi è lu so sistemu di l’isula.”
Fora di a mitulugia muderna, l’autori poni i quistioni cù ghjustezza, da l’intaressu soiu par i radici legali chì portani a ghjustificazioni di l’emancipazioni. Sta rivuluzioni, nanzu à da essa fisica hè stata filusufica, chì s’appughja nant’à u drittu essenziali, quiddu di a libartà chì chjama da resista contru à l’upressioni. Eccu a fundazzioni ch’hà parmissu l’altezza di i rampali contru à i scherti di a suvranità. Stu principiu significaia tandu a morti di u puteru assulutu in Auropa, ch’iddu sia tinutu da monarchi o duminazioni suprani.
“I Corsi hani cunviatu u so regnanti genuvesu, tandu s’hani da truvà un novu ”
Marzu di u 1736, Teodoru di Neuhoff sbarcaia in piaghja d’Aleria è iniziaia un’era nova da la so odissea pulitica marcata da un titulu pesiu di sensu. Theodoru u primu, Rè di i Corsi (è micca Rè di Corsica), da a vulintà naziunala. Una munarchia di cuntrattu appughjata nant’à una custituzioni, par piantà u puteru riali da u puteru popularu.
Eccu u travu d’un picculu regimu novu, ch’ingaghja l’Auropa sana in a mudernità pulitica, ‘ghjà attizzata da i tesi di i Lumi aprendu a strada di u despotisimu schjaritu. Un seculu di cambiamenti rilighjosi dinò, allora chì i capi di a Nazioni circani da fà libari l’omi d’una tarra pietosa, eppuru alluntanati di u fanatismu in la so cuncizzioni di a fedi . U Dio Vi Salve Regina, a prutezzioni di a Vergina Maria è a Festa di a Natività ùn impediscini micca u staccu chjaru trà u spirituali è u materiali. Dicia u pietosu Paoli chì “I pricantuli ghjunghjini dopu à l’aiutu tempurali”, piazzendu a so intrapresa pulitica nant’à li passi di u so babbu Giacintu è di Teodoru senza l’intuleranza filusufica di l’idei liberali ch’erani i soii.
A trinità si compia in lu terzu capitulu da un ghjovanu Napuleone alluntanatu di l’affari corsi, natu sottu à u riali di Francia eppuru paolistu, una leia spirituali affirmata quandu i forzi di a Storia hani pruvatu da uppona puliticamenti l’omi chì riccusaiani tramindui un Anzianu Regimu, putentosu è assulutu contru à a vulintà di lu so populu.
Sta prima prova di storia ufferta da Anton’battista Filippi cunduci u lettori nant’à a strada d’una custruzzioni naziunala, fora di l’arcivichjoni mintuati in l’intrapresi pulitichi è dutrinali, a so piuma appaccia i profani di u XVIIIesimu seculu cù a storia di i revuluzioni corsi.
Anton’battista Filippi hè studientu in drittu à l’Università Paris I Panthéon-Sorbonne, è circadori associatu à u Laboratoriu di storia greca è filologia di u puliticu.
Rifarenzi:
La Corse, terre de droit ou Essai sur le libéralisme latin et la révolution philosophique corse (1729-1804), edizioni Mimésis, philosophie.