Polonia : e manifestazione cuntinueghjanu per difende u dirittu à l’abortu

Dumenica u 13 di dicembre, i manifestanti per u dirittu à l’abortu sò andati di novu à manifestà davantu à u dumiciliu di u viciprima ministru Jaroslaw Kaczynski. U viceprima ministru cunsirvatore hè cunsideratu cum’è u rispunsevule di a decisione da u Tribunale custituziunale impunendu un’interdizzione guasi-tutale di l’abortu in lu paese.

I manifestanti, per a più grande parte donne è ghjuvani, sò stati impiditi d’accede à l’intrata di a sede di u viceprima ministru da e forze di pulizza polacche.

U dirittu à l’abortu, una lotta d’ogni ghjornu per e donne polacche dapoi u 22 d’uttrovi

E manifestazione in lu territoriu polaccu ùn cessanu dapoi u 22 d’uttrovi. E dicine di migliaie d’opponenti sfilanu cutidiamentu contru à ‘ssa decisione di u tribunale custituziunale. I ghjorni ch’anu suvitati l’annunciu, i manifestanti eranu più di 100,000 à manifistà in carrughju in Varsovia, è quesu malgradu à a pandemia.

U partitu Dirittu è Ghjustizia, partitu di u putere, hà suvitatu a linia cuerenta di a so etichetta cunsirvatrice ultracatòlica. Pruscrivendu l’interruzione voluntaria di gravidanza in casu di malfurmazione sèrie di u fetu da un arrestu di u Tribunale custituziunale rifurmatu, ‘ssa decisione, sustenuta da i magistrati di u partitu Dirittu è Ghjustizia, hè mutivata da l’anticustituziunalità presunta di l’ultima leghje tuccandu à l’abortu.

Quandu invece i paesi cum’è l’Irlanda liberalizeghjanu l’accessu à l’abortu, a Polonia, paese assai influinzatu da a Ghjesa, diventa cusì unu di i Stati auropei incù a legislazione a più restrittiva guardandu à l’abortu. A nova legislazione polacca ùn permette l’abortu ch’in casi di furzatura, d’incestu, è quandu a vita di a mamma hè in piriculu. Isse cundizioni d’accessu ripprisentanu sultantu 2% di l’aborti praticati in lu paese in lu 2019, quandu invece l’abortu per malfurmazione di u fetu ripprisintava 90% di l’interventi.

Svolta di u guvernu polaccu

Isse manifestazione, ch’anu pruvucatu muvimenti di sulidarità à traversu l’Auropa, anu compiu da distabilizà u guvernu cunsirvatore chì hà da tandu effittuatu un passu in daretu, : hà dichjaratu ch’è una discussione hè in corsu per truvà un comprumissu. A dicisione di u Tribunale ùn hè, pè u mumentu, micca statu publicata à u Ghjurnale Officiale, mittendu a so intrata in forza in suspesu. Issu muvimentu d’ampiezza hà incimintati i muvimenti d’oppusizioni. Dapoi l’annunciu d’issa decisione, u partitu Dirittu è Ghjustizia à u putere ùn cessa di trafalà in i sundaghji, passendu da 40% à 30% di sustegnu in pocche settimane.

Lasciate un cummentu ?

Questo sito usa Akismet per ridurre lo spam. Scopri come i tuoi dati vengono elaborati.