S’era svigliata accantu ad ellu. Dapoi u liceu chì l’aspittava, chì u facia ballulà trà sguardi finti è uchjate nucente. Avà, l’avia. « L’omu guida, a donna cumanda » dicia quellu. N’avia fattu u so mottu Veronica. I so ochji d’un verde cutratu fighjavanu ‘ssu corpu stesu, nudu in cristu ingutuppatu in e linzole di l’abbandonu. Si pisò, accunciò i so capelli davanti à u spechju. I primi ragii di sole chì trapanavanu e tindine schjarianu solu e so forme è quandu Dumenicu aprì l’ochji, ùn vide cà què, ‘sse curbe di dea rumana scalata da ùn sapia chì Antichità. Ma ellu ùn ci capia nulla. Era un baullu ‘stu tippu, un baullu di prima trinca. L’avariate messu in lettu un ghjacaru saria statu listessu affare. Veronica, l’avia forse spirata in a so giuvintù, quand’ella accatizzava i desiderii di tutti i purchetti di u liceu, smaravigliati da u so corpu chì muscava u prufume d’una libertà à vene. Ma li piacia di più à batte si a sega o infurnà puttanaccie di quelle cà fighjà a giuvanotta à i capelli russicci chì, ella, l’amava in sicretu, à l’ascosu di l’incurdate zitellunesche.
Una serata bastò per dà vita à ‘ssa passata trà a principessa è u maccarellu. Chì Dumenicu tandu, s’ellu s’intarissava mancu appena à a giuvanotta chì l’amava, li piacia à fistighjà. Dacci ne un antru, quessa hè a mea eranu e riturnelle chì li garbavanu u più quand’ellu gudia cù i so amichi a vodkà pura chì li tagliava a gola è li facia sbuttà u ciarbellu in rughji d’animali. Era una sera cusì ch’ellu scuntrò à unu chì li fece girà u capu. E serate chì suvitonu, si sciaccavanu i shots inseme accumbracciati da a so tetania. L’amicizia di quelli chì acconcianu i s’affari. Simane dopu à simane, Dumenicu mittia di più in più buttiglie nant’à i tavulini di a so disgrazia, invitava di più in più i so amichi à i risturanti i più cari, si cumprava l’ultimi scarpi à a moda in a scimizia di quellu chì vole pigliassi u mondu sanu, abbagliulatu da u desideriu di putenza è di ricchezza.
Veronica da luntanu u sculinava ‘stu cambiamentu. Soca li paria u ghjustu filu per un baullone cusì ch’ùn avia primura di i so cenni. Era una zitella fiera, un pezzu di donna, ùn svilaria un’ acca di ciò ch’ella pinsava in grentu. Ma faria tuttu per tene lu incabbiatu trà e so mani, tale ogettu solu di a so vittoria nant’à l’intrampuli di u chjassu. ‘Sta pistola ch’ellu tinia in istacca, ùn ci scambiarà nulla. Mancu ‘sta bestialità in fondu à u so ochju. L’amava. Per ciò ch’ellu era, per ciò chì nisunu vulia vede da ùn strazià à scavà ‘st’anima di cianga cuparta. Paura di lasciassi intrappulà da e salme putrite è da u sangue caghjatu. Eppo more. Era nucente. A sucetà era culpevule. L’avvilinava. Ella, l’amava, u vulia salvà. Ma era frittu. A lotta, persa. Da induva vinia ‘ssu sintimu di rivolta chì a talluzzava, ‘ssa brama di dà fronte à l’ombra di a disfatta di l’educazione quì ? Quì. Duva tuttu saria pussibile, duva ognunu pudaria campà libaru. Muru di fume. Quì, tuttu hè ipucrisia, gangrena. Umanità tradita. Lozzu d’un età. Puzza di e rumenzule di l’esse. Mascare. È dopu diciaranu tutti ch’ell’hè colpa à l’altri prima di ciuttà in u mare seccu di a so riflessione.
A giuvanotta circava à vede luccicà in fond’à u core di l’animale ch’ella s’avia allisingatu un suppulu d’eternità. Quellu chì li pudia fà crede chì tuttu avia da turnà filicità. Ùn lu truvaria. Ineluttabile bugia di l’amore. A so fiduccia l’avia ingannata. Ma resiste hè d’ogni stonda, sin’à a fine. Allora, si perderà ancu ella. Antigona di u povaru. Spirendu di lascià a stampa a più minima chì sia di u so amore nant’à l’anima digià morta di u stranieru ch’ella tinia.
Cum’un teatrinu, si vestì, rimessi a so pistola in stacca è spunendu li un basgiu nant’à a fronte li disse à prestu, ci chjamemu. Avia toccu e ripe di a morte. Dumenicu hà chjosu a porta è dillandi, s’hè lasciatu a vita.
20/12/2020
Illustrazione : Elea Battini, 2020