Tempoli, u 26 d’aostu di u 2011.
Claudine si ne va un’ora à circà i nucioli ind’è l’ortu in terrazza vicinu à u Brasero.
Ci n’hè pocu.
Manc’assai pà metta ind’a pasta à a nuciola.
Torna in casa è a so mamma di 88 anni ùn rispondi micca. Stranu pà una donna chì chjachjara sempri, ancu da sola.
Claudine ghjunghji ind’a sala da pranzu è a trova morta annantu à u sofà.
S’essendu assicurata chì fussi morta , faci u necessariu pà pudè metta in baddu u so intarramentu di manera a più degna pussibuli.
U più cuntentu hè Michel. Cuntentu parchì ?
Tuttu quissa dopu à u matrimoniu di a so fiddola Frédérique, u 3 di sittembri in Salzena, cumuna ricca di a periferia di Ferona situata à 1800 metri d’altitudina.
Salzena, u 3 di sittembri di u 2011.
Frédérque Migalli si marita.
Si marita incù l’animatori televisivu è segretariu naziunali di u PST à a laicità, Stéphane Delmitta, 32 anni.
Omu puliticu riputatu scrucconu à tal puntu chì si dici chì u so casteddu di Salzena saria statu pagatu arrubendu ind’i casci di a merria induva u so babbu hè merri.
À issu matrimoniu, ci sò 550 parsoni. Tantu mondu.
Ci hè u merri di Tempoli, u presidenti di a Televisioni Tolsana è ancu u cuginu prufissori emeritu di l’università di Ferona, Bernard Santollena è a so donna Francette anch’edda prufissori.
Issu matrimoniu si passa bè, l’invitati cantani, baddani. Cum’è à un matrimoniu tipicu.
À un eccezzioni nutevuli, u pusiziunamentu di trè cunvivi di u matrimoniu : Claudine (in dolu), Muriel è Violette Zibba (ex di Michel, anziana presentatrici di u téléshopping) sò pusiziunati accantu à a tola di u ripastu di u fastuosu matrimoniu, Michel si essendu missu tra Claudine è Muriel.
Situazioni particulari, i donni ùn si parlani mancu appena è Michel criticheghja senza filtru Violette davanti à tutti l’invitati, ciò chi culpisci mori à Francette, chì trova strani issi maneri di fà.
Francette dici à u so maritu, tremendu : « Mais où suis-je tombée cher Bernard ? Quel culot ! »
Figuraccia di i tre donni in issu celu mezu turchinu.
Tempoli, u 12 di sittembri di u 2011.
Una volta l’intarramentu di a mamma di Claudine è u matrimoniu di a so fiddola passati, Michel pidda una decisioni radicali : fà parta à Claudine.
Sei ori di mani.
Claudine dormi sempri. Michel, aiutatu da Muriel, ne apprufitta pà biutà i mobuli di l’affari di Claudine. Trent’anni di vita cumuna sò missi in ottu valisgii.
Dopu à trent’anni di viulenza publica contr’à edda, dopu à trent’anni di sufferenza murali, l’hà cacciata di casa, di u bar, di u risturanti. Cusì, in trenta minuti.
Tira Claudine da u lettu. Claudine si sveglia in terra inchjerchjata di valisgii. Grida, dumandendu à Michel ciò chi si passa.
Michel rispondi : « Eh bah, tu dégages ! Allez, oust ! »
Muriel aghjusta : «Allez, ce n’est rien ! Personne ne t’aime ici ! Tu es une loque ! Même ta fille ne veut plus te voir ! »
Claudine : « Vous vous croyez intéressants ? Ciao, allez ! Plus envie de vous voir moi ! »
U ghjornu stessu, a clientela hè stunata d’ùn veda à Claudine. Michel spiega chì Claudine hè stata cacciata parchì insuppurtevuli è chì Muriel l’hà rimpazzata.
Cusì, in un’ora, Claudine hè partuta in casa soia, in Ferona, cità à 150 km di Tempoli. In issa cità, hà sempri una casa. Hà sempri i so cuntatti pà essa aitutata.
Claudine camina à fondu fin’à a so tamanta casa di Ferona. Una casa di maestru di 300 m² annantu à 3 piani.
Claudine rivinarà più tardi, ma micca pà i raghjoni chì si pò pinsà.