U puntu mediu

« U puntu mediu. In qualchì locu trà impippanesi è crepanne. Trà rinchjudessi à doppiu tornu è lascià entre u mondu sanu. Ùn micca indurissi ma ùn micca lasciassi distrughje nemmenu. Abbastanza difficiule. Romain Gary (Emile Ajar), L’angoisse du roi Salomon.

– Sai amicu, hè particulare. A Corsica hè un paese stunante. Leghju e nutizie è vogliu fughje à l’altra punta di u mondu, po’ mi dicu ch’aghju quantunque a brama di vede u filmu sin’à l’ultimu mumentu. Ne aghju ghjà vistu un tal pezzu chi vogliu cunnosce a fine. I corsi sò senza sulaghju nè pianaghju. Quì, si pò offre u digestivu incù u surrisu ma si pò aspittavvii à l’intrata d’una girata di una strada dipartimentale armatu sin’à i denti per arrigulavvi u vostru contu dinù. « Amicu, insistu, sò eiu chì pagu ». ; « Ti sì messu per mezu à i mo affari, t’aghju da crepatti ind’è tè è a to moglia serà à e prime loghje per vedella, capisci ? » S’è si pigliava una scala di e sprissione di a natura umana, bassezza è grandezza d’anima sò senza limite quì. Si trova di tuttu : da l’Imperatore di i Francesi à u funziunariu territuriale pistunatu. Quì tutt’hè pussibile.

Ùn sò micca induve si và… Ma andemu ! È s’è fussimu ghjunti ? Ùn ci sò più di clandestini nè FLNC. I ripprisintanti di u sistema clanicu tradiziunale, ‘ssi vassalli di u Statu francese, si sò sfundatti da u pesu di e so propie cuntradizioni. E fascie maffiuselle, liberate di ‘ssi guardii avà prusperanu. Inquantu à noi altri, fighjulemu, trà validazione è cullaburazione passiva a nostra sucetà ficcassi in a malamorte, in l’envidia è a sbacata. E fascie maffiuselle si spartenu i settori di l’ecunumia è arriguleghjanu i so differenti in u sangue incù menu in menu ritenuta è onore ; à suppone chì banditu è onore facenu a paghju. Banditu d’onore ch’è si facianu chjamà tempi fà. Hè l’ossimoru chì nimu ùn rileva mai. I banditi di disonore.

S’hè riesciutu a prova di rinchjudenesi in i muri di una prighjò chì ci simu custruiti noi stessi. A nostra sucetà agrupasturale s’hè sfracellata à 300 Km/ore in a post-mudernità. I traversi di a nostra sucetà tradiziunale ùn sò micca spariti incù a mudernità ma si sò insitati à a nostra tempuralità. Avemu architettatu i basamenti di a nostra sucetà muderna nant’à u peghju d’innanzu è u peghju di a cuntempuraneità. I parenti si tombanu à fà entre i soldi in a casa mentre chì i zitelli lu ghjetta da i balconi per esse i più mac di u paese. I zitelli si tombanu da per elli : droga, viulenza fisica, viulenza sessuale… Certi vanu per i paesi calibrati cum’è s’ellu eranu i sicari di Pablo Escoba. ‘Ssi chjuchi lavurentii maffiselli. A rileva di a Maffia hè pronta.

È tutti quelli chì danu l’arme, a piuma o i soldi è chì facenu soffre a ghjente è perpetueghjanu i mali di a Nazione sò corsi. Tutti si battenu per « u so bè » è tutti invucheghjanu u dolce nome di « Pasquale Paoli », o u santu nome di a « Nazione » è s’agitanu in tutti i sensi. È in tuttu ‘ssu ribulione permanente di viulenza verbale è fisica, in tutte ‘sse cunfusioni è cuntradizioni nimu ùn pò sgavulià u veru da u falsu, è nimu ùn pò pretende truvà un remediu à i mali di u nostru populu.

Da sempre, a Corsica hè intrappulata trà a libertà è u terrore. Libertà chì i Stati centrali ùn anu mai da veru riesciutu à cuntrullalla, è terrore chì ci vulia à rigulà i rapporti suciali in l’assenza di un Statu centrale. St’equilibriu s’hè rottu chì una parte di i lucali s’hè apprupriata una parte cusì impurtante di l’ecunumia è e risorse umani ch’ella hà ribuccatu i rapporti suciali. Eppuru, seria faciule da dì chi basteria à truvà i rispunsevuli di questi mali, techjalli di piombu cum’è hè sempre statu, o lampalli fora da a via di l’urne à u capu di dicennii d’anni di lotta pulitica; è eppuru ùn hè micca cusì chi si passerà. I Clani esistenu micca perchè ci hè l’individui putenti per gistiscelli ma bè perchè u sistema hè custantemente validatu da quelli chì ne soffrenu u più. Quale hè ch’accetta un impiegu contru à un votu à l’elezzione ? Quale hè chì accetta d’impiegà i zitelli di l’amicu per falli piacere ? Quale hè ch’hà da pienghje à i ghjinochji di i « baroni lucali » per piazzà u so zitellu tuttu ghjustu capace di scrive u so nome senza fà una falta ? Quale hè chi trafica i documenti affinch’è u so zitellu o u so amicu aghji una borsa o un’aiutu supplementariu ? Dimustremu ogni volta chi si sveglia u sole ch’ùn pudemu micca pretende à a nostra autodeterminazione, ch’ùn simu micca capaci di vince i nostri traversi. Si cumpiace in i ritratti chi l’altri ci anu custruiti, si rientra bè in a cantera chi l’altri ci anu assignati. È cum’è simu troppu occupati à rientrà in ‘sse cantere chi l’altri ci anu fabbricati per occupacci, ci cavemu noi stessi u tufone in u quale emu da sutterrà ciò chì ferma di a nostra essenza.

– Ma Chì fà allora ? Allora chì fà, chì fà ? Ci vulerà à plasticà, à ammazzà ? à quale, induve è quandu ?

– Innò amicu. Oghje, si tratteria di ritruvà u puntu mediu : cunsumà senza indibità i soi, desiderà senza envià, ottene senza currompe o currompessi, crià a ricchezza è micca ruballa da quelli chi la pruduce, apprizzià d’esse prima di apprizzià d’avè, ùn micca cede à a viulenza ma ùn micca fassi sfracicassi nemmenu. Abbastanza difficiule.

Ritrattu: Melancolia – Edvard Munch

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.