Un articulu scrittu da Andrea Maroselli.
Creà l’emuzione cù u gaming, quessa hè l’impresa di quelli chì tutti i ghjorni producenu novi mondi induve pudemu passà e nostre ghjurnate libere. U gaming è i ghjochi ch’aghju da mintuvà sò opposti : soni e paesaghji so sfarenti ma u scopu hè listessu : porghje a u publicu emuzioni ancu un ghjocu.
A squadra di « Idont » hè cumposta da cinqui studienti di u Politecnico di Torino. Eddi anu scumpartu e missione pà creà u ghjocu Aeter. Ben chì Fabien Mariani si hè lanciatu ind’è l’avventura di a creazione autodidatta cù u so prughjettu Winterfall. Cù sti dui esempii videremu quantu hè impurtante a sfarenza ind’è l’arte.
Aeter hè un ghjocu ch’addunisce trè categurie: « survival », « shooting » è « racing ». Anu presu estru da i grandi com’è i filmi Matrix o Blade Runner è i ghjochi com’è Carmageddon o Crash Team Racing. I creatori: Simone Terzuolo, Andrea Gravile, Gianmario Lupini, Francesca Scarrone e Alessandro Picardi anu avveratu un travagliu unicu nant’à tutti l’aspetti di u ghjocu: Scripting, 3d Modeling e Sound Engineering. Cusì, solamentu in 4 mesi e cu l’impronta di la so persunalità, i studienti d’inghjeneria infurmatica anu creatu u cosmu di Aeter.
Cù u ritimu di a musica elettronica à u volante di un veiculu futuristicu u ghjocu vi trasporta ind’è un arena spaziale. U scopu ? Ammazzà tutti i nemici pà soppravvive… à l’infinitu.
Avà avete biutatu l’arena è e site soli, pudete stimà a vista da u spaziu, una scena chì cambia cù e stagione. À a fine d’ogni nivellu truvarete un tondu d’oru chi vi purterà à u prussimu nivellu. Pudete truvà abilità com’è a vita, a furia e u scudu ma ancu dui abilità speciale e tempuranee: l’invincibilità è i danni dopii. S’è vi sentite curaghjosi pudete pruvà ad affruntà u ghjocu senza tuccà i putenzziamenti. riuscirete ?
Pruvate subbitu u ghjocu nant’à : https://idont-studio.itch.io/ , è pudete ancu fà un donu à scelta.
Avà cambiemu d’atmusfera, quessa hè più realista, vicina à quella chi cunniscimu.
Winterfall hè un ghjocu di rolu chi ci faci vede tutta a Corsica chi ci piace. I soni di a natura è di a lingua corsa ind’è nostre muntagne.
Fabien Mariani vulia creà u ghjocu di i so sogni, innamuratu di a muntagna hà sceltu quella di a so terra. A scelta di a lingua corsa hè statu naturale; una manera di fà cunnosce a so lingua ind’u mondu di u gaming chi hè spessu principalmente in lingua inglese.
« E condizione di creazione eranu sfarenti da quellu chi ci pudemu imaghjinà è un consigliu micca à l’altri di fà ciò ch’aghju fattu » mi conta cu l’imaghjina d’una pussibile fine di prucedimentu di creazione dopu à 5 anni di travagliu. Hè fieru di pudè porghje à i futuri ghjucadori una sperienza video-ludica cù u calombru di a so zitellina in Corsica.
Cù Winterfall lasciemu u spaziu pà u mondu di Anor « U Vechju Reame » induve site un persunaghju chi hà tutte e pussibilità pà agisce è parlà incù l’altri. Fora di a necessità di sopravvivenza: beie, manghjà, accurassi, ripusassi, pudete fà cresce u vostru persunaghju cù emuzioni chi saranu utili pà rendelu unicu. Cù a crescita è l’evoluzione di e vostre capacità pruvarete da ricustruisce una casa dinastica è u so patrimoniu pà scansà una fine di i tempi ind’u mondu abbandunatu… Vi sentite assai forte pà scapulà sta sfida ?
L’averete capitu ,sti dui ghjochi sò opposti da la so l’urighjinilità cercata ma ancu da u prucessu di creazione. Mi socu interessata à eddi parchi mi piacia l’idea di dui gruppi chì si lancianu ind’è un’avventura senza sapè chjaramenti induve si n’andavanu. U scopu hè listessu: tramandà emozioni cù universi sfarenti. Unu piaci da la so animazioni, l’altru vi insegna à sopravvive. Cù Aeter vularete passà sopr’à i nuvuli, cù Winterfall sarani tuccati dapoi e muntagne corse. A sfarenza hè impurtante soprattuttu chì u mondu di u gaming dumanda sempri nuvità ma ancu ch’ùn vulemu micca esse tutti uguali ind’è a vita è ind’è i ghjochi.
Senza pensà à u tempu ch’anu messu pà fà sti prughjetti ci mostranu chì a passione ci rigala sempre di risultati piacevuli, tandu pà a squadra di « Idont » chi pà Fabien Mariani, i giovani di u Mediterraniu, com’è noi, provanu da accampà mondi induve ponu lampassi mentri ghjurnate sane è sò felici d’occupassi anc’elli.