À u sole chì si sguassa
Nantu à le pianure gialle
Vecu ‘ssi culori passi
Ma di silenziu immurtali
Spuntarà la prima stella
Nant’à i pinzi è i sciappali
Orizonte ùn ci n’hè più
Mancu un portu in lu disertu
Ma paura ùn ci n’hè micca
Chì u me core hè apertu
À ‘ssu ventu di calore
È a rena ch’ellu accerta
Solu solu mi ne stò
Hè luntana a me casa
Un distinu l’aghju, a sò
È hè scrittu per istrada
Ma risona à u punente
Una chjama chì si lampa
Sarà chjoccu di campana
O chitarra chì m’avvampa
U cavallu ùn sente nulla
In lu battime di a so zampa
M’accendu una sigaretta
Era tempu ch’eo pianti
Ancu a notte piegnuleghja
È s’unnisce à li mo pianti
È u sonnu abbracicheghja
L’ultimu di i mo canti…