Articulu d’upinioni. Italia : Da a Lega à u PD, sturietta d’un istati mossu.

Da l’iniziu di u mesi di ghjunghju di u 2018 à à prima sittimana di u mesi d’aostu di u 2019, l’Italia avia un guvernu cumpostu da dui forzi pulitichi : a Lega (partitu di dritta) è u MuVimentu 5 steddi (pupulistu).

I primi aviani accittatu l’offerta fatta da i 5 stelle pà guvernà l’Italia duranti à 5 anni.

Luigi Di Maio è Matteo Salvini (fonti : ilmessagero.it)

Ùn semi mancu 5 anni dopu è u guvernu hè sparitu ind’i l’ondi di u Tirreniu, colpa di Salvini chì hà annunciatu di manera brutali a fini di u guvernu.

TAV, dicretu sicurità : tanti sughjetti ch’ani fattu cascà u guvernu talianu. Hè vera. Ma i sfarenzi trà a Lega è u M5S erani podassi troppu impurtanti pà avè qualcosa di durevuli.

À a metà di u mesi d’aostu, u M5S, sempri maghjuritariu à u parlamentu, ùn hà micca dicisu di ascultà l’allora ministru di l’internu Salvini è hà iniziatu a discussioni incù un partitu sempri cuntestatu da eddi stessi : u Partitu Demucraticu (PD), di centru-manca, guidatu da u sempri nemicu Matteo Renzi.

Val’à dì chì certi pulitichi taliani sò arrabbiati di veda iss’alleanza di cuntrarii trà un muvimentu anti-partitu demucraticu è u listessu partitu demucraticu.

Et hop, giru di testa à 180 gradi.

Quandu ci si rammenta a storia induva Beppe Grillo dicia “Vaffanculo” à u sistema puliticu talianu, comu pinsà chì, menu di 10 anni più tardi, si putessi alleà incù u principali partitu di u sistema ?

Nicola Zingaretti (PD, manca), è Luigi Di Maio (capimachja M5S)

Un prublemu maiò ci hè, ancu s’è a crisa hè scuppiata pà via di Lega di Salvini, cuntentu di avè fattu più di 34 % à l’aurupei (+ 26 rispettu à 2014) quand’è u so alleatu di guvernu hà fattu sulamenti a metà (cum’è in lu 2014), menu di u listessu partitu demucraticu, in calu di metà par rapportu à u 2014.

Ci sò quattru tipi di riazzioni di pettu à issa crisa di guvernu :

– Quidda di Matteo Salvini è i so amichi : Matteo Salvini (Luca Morisi, u so spin doctor in cumunicazioni) passa a so santa ghjurnata à cummentà a nova pussibilità di guvernu M5S-PD, criticandulu à fondu.

Asempiu di tweet di a Lega

Certi diputati o senatori, cum’è u ghjovanissmu è assai brillanti Edoardo Ziello, dinunciani un « inciucio », val’à di una badda contr’à u populu talianu. Issu diputatu, autenticamentu pupulistu, usa di formuli piuttostu ben fatti pà fà aderiscia a ghjenti à a so causa.

– Quidda di Beppe Grillo è u M5S : U primu chjama à a ghjuventu di u PD à seguitallu.

– Quidda di u partitu demucraticu : Prima di vulè un’alleanza incù i 5 steddi, u capimachja Zingaretti era cuntrariu à un alleanza incù eddi, dicendu “Mi sono perfino stancato di dire che non intendo favorire nessuna alleanza o accordo con i 5 stelle, gli ho sconfitti 2 volte (alle regionali, NDLR) e non governo con loro“. Eppò…

– Quidda di certi membri M5S : Alessandro di Battista pari essa assai criticu annantu à iss’alleanza quandu Gianluigi Paragone, eddu, hè cuntrariu à l’alleanza M5S-PD è voli piuttostu un ritornu incù a Lega, aghjustendu u fattu chì u M5S “devi essa u muvimentu sucialistu d’Italia”.

Ci voli à rammintà chì Alessandro di Battista hà scrittu un libru famosu annantu u « Puliticamenti scurrettu », induv’eddu parla di i scunfitti di u M5S è u caminu fattu da u muvimentu dapoi à u so iniziu.

Articulu d'upinioni : L'Italia ùn hà più guvernu dopu a crisa di guvernu. Ma chì si passarà quà in sù? 
Vuleti sapenni di più? Lighjiti un pocu iss'articulu.

« Dibba », vicinu à Luigi Di Maio, hè sempri membru di u M5S dopu ad avè avutu l’incaricu di diputatu trà u 2013 è u 2018.

Luigi Di Maio è Alessandro Di Battista

Ma hè un sbaddu di Salvini di avè vulsutu rimetta u so mandatu ind’i mani di i Taliani ?

Iss’ultimu si hè scurdatu chì, à l’ultimi alizzioni, a Lega hà fattu un picculu 17 %, micca maghjuritariu à u parlamentu, hà presu in contu u supportu pupulari pinsendu chì u presidenti avaria da ascultallu è dissolva u parlamentu.

Salvini hà fattu un sbaddu tamantu : quiddu di pinsà chì i cinqui steddi ùn erani micca cameleoni è un pudiani micca trasfurmassi in europeisti è alleati di a manca.

Sbaddu chì pò salvallu pà qualchi anni o fallu spariscia parzialmenti di a scena pulitica.

Da seguità !

Lasciate un cummentu ?

Questo sito usa Akismet per ridurre lo spam. Scopri come i tuoi dati vengono elaborati.