Stu stranieru in mè…
Un ghjornu, in a cità di Roma, Lia si sveglia inde u so lettu d’uspidale dopu à un’ uperazione. U so caru Mauro si trova accant’à ella, aspittava u so svegliu. Ma quandu si sveglia, tuttu hè cambiatu per ella : a so vita hè stata salvata da un stranieru. Ella hè viva. Ellu hè mortu. È ghjè lu so cuore chì batte in lu pettu di Lia.
St’idea diventa un’ ussissione per a ghjuvana donna. Più chì un’ussissione in fatti, Lia sente u so core novu chì corre versu e parsone e i lochi ligati à st’omu scunnisciutu. Si n’anderà in u Sud di a Francia pè capì quale hè sta persona à chì deve a so vita.
Cù una scrittura flùida, Myriam Ambrosini face fronte à una tematica difficile : a quistione di l’anima è di i rapporti cù a morte, l’amore è a spiritualità. L’autore piglia una pretesa di i penseri antichi : e radiche di i sentimenti è di l’anima si trovanu in lu core; ghjè ellu chi cumanda i sentimenti, cum’è a pinsava Aristotelu. Sarà dinò u prublemu principale di ista storia : ùn si pò micca entre veramente in a storia cù sta pretesa filusofica.
A seguita di l’eventi principali ùn hè micca trattata cù a gravità chì sarebbe à puntu pè stu sugettu; ghjè tandu u fattone chì sorte u lettore di a storia.
Stu libru hè una lettura da ricumandà pè st’estate, cù lu so embiu talianu, solariu, è e descrizzione di i lochi di u Sud di a Francia chì funzionanu cum’è una “madalena di Proust” per quelli chì sò familiari di sta regione. Infine, hè un libru liebu è piacevule da leghje, ma u so sugettu meritarebbe un trattamentu più prufondu.
Un cuore altrove, di Myriam Ambrosini. Edizione Kimerick, 174p.