Tempuli : Speranza è scunfitta

Ultimu capitulu : Speranza è…spazzola !

Marzu di u 2020 : i municipali

Ci hè una infrasata chì hè divintata un mantra d’issi alizzioni: “vodda di caccialli tutti”. E ci hè un’immaghjini chì distilla issa rivuluzioni : “Ziu Bainzu” Gossotta, 85 anni, anzianu merri PS di Tempuli, chì vota à issu stranu ghjuvanottu senza capeddi, militanti di a Lega (lista di l’unioni di dritta), chì finu à dui mesi fà, avaria trattatu di « nazi » o di “skin head”. Ed inveci avà u ferma pà issi stradi di La Jalva, li stringhji la manu è li dici: «Ai spazzatu via i me sucialisti è i scrucconi di u P3, avà chì sè « so cabbino, u merri », « Mai Mollare ! Resta cum’è sè avà, ùn diventa cum’è mè».

Sacrata vindetta.

L’altri sò i facci vecchji di a pulitica, i Gossotta, Contina, Stabanacci, Miralotta, Empona è tutti quanti. Tutti cacciati fora, da u primu ghjiru. Cacciati da un merri scunnisciutu di 33 anni, militanti da 16 anni à a Lega, partitu di dritta naziunalista.

Scruccunaria, clientelismu. Tutti i pulitichi denunciati da a Lega. Disilludendu ghjovani è anziani, fendu in modu chì ancu ziu Bainzu vutessi Lega. Incù un’aria di militanti d’estrema dritta a più dura – hà militatu ind’è diversi muvimenti di tipu Azzioni Francesa, GUD – s’avviccina di a merria incù i banderi tricolori cantendu. A ghjenti hà cridutu à l’ochji sinceri d’issu ovni di a pulitica. Carlu Mònoga, « so navo cabbino », u novu merri, surridi è dici : «Mai sottuvalutà u spiritu rivuluziunariu di ziu Bainzu. A ribellioni ùn hà omancu appena un’età. E maiò rispettu pà Monsalviaga, La Jalva, è tutti l’altri quartieri di Tempoli. Tempoli, cità dritta! Tempuli, cità noscia ! »

La Jalva, quartieru induva a lista Lega hà ottenutu…73 % di i voti à u primu ghjiru. Stabanacci, candidata malurosa, si hè fermata à 21,25 %, davanti à a lista di manca à 5,75 %.
Monsalviaga manda a Lega à 76%, un ricordu pà un quartieru di manca.
Adeline Stabanacci, tandu sustinuta da Miralotta, Tata Mariella è Marcel Empona ùn hè mancu ghjunta à u 33 % in cità, contr’à un picculu 10 % pà a manca unita. 57 % pà a Lega è i so alleati.

Trenta trè anni, una moglia, un ziteddu, deci pesci rossi è dui lumaghi, u novu merri hè in Tempuli da quindici anni. Issu sustenitori assulutu di Mario Borghezio hà trascorsu i 18 primi anni di a so vita in a cità di Tohì, cità custiera, induva u babbu avia u mistieru di docker. Dopu, hà decisu di parta ind’i terri Tempulisi pà fà i studii d’architettura, mistieru attuali pà iss’appassiunatu di miculugia.
In Tempuli hè finitu pà pur azzardu: un cumpagnu d’università, Vincent Criabeira, l’hà cunvintu di stà dopu à i so studii è crià un gabinettu d’architettura incù eddu, cosa tandu fatta. « A prima volta ch’aghju vistu à Tempuli, aviu una sola vodda, di scappà u più prestu pussibuli d’issa cità talmenti mala. Ci sò sempri!» dici u merri ghjustu dopu à l’annuncia di i risultati.

Mentri ch’eddu facia i so studii, hà militatu ind’u partitu di l’anzianu guvernatori di a righjoni, a Lega Tempulisi, sorta di FN lucali.

«Aghju sempri avutu idei di dritta o d’estrema dritta è aghju sempri vulsutu piddà u puteri pà a via demucratica». Carlu Mònoga

Ùn hà mai avutu una televisioni, “manipulata da i lobby è da Soros” sicondu à eddu, hè ridattori uccasionali d’articuli d’architettura pà « La Robbiera Tempulisi », s’informa annantu à internet, ama a natura è i funzi, hà una vittura elettrica, manghja sempri bio è mai carri.
S’è li dumandi i valori da trasmetta à u so ziteddu, dici: «A famidda, a nazioni. U bisognu, ci hè». Ùn credi micca in diu. Pesa 90 kg, misura 1m90, ùn li piaci micca u sport. Li piaci a musica classica è a pulitica, di manera eterna.

A campagna eletturali hà custatu menu di 10 000 euro, pocu pà issu riccu ghjuvanottu aiutatu di a Lega è i so alleati. In trè mesi, Carlu hà cunquistatu à ziu Bainzu, hà spazzatu sia u PS cà u P3 è i so alleati. In trè mesi, hà rializzatu u so sognu : piddà u puteri.

FINI.

Lasciate un cummentu ?

Questo sito usa Akismet per ridurre lo spam. Scopri come i tuoi dati vengono elaborati.