Emmanuel Macron in Cuzzà : da Tonton Simon à l’ode à a Republica.

Cuzzà, Ghjovi, u 4 d’aprili, 3 ori di u dopu miziornu.

U presidenti di a Republica, Emmanuel Macron, s’affacca in un paisolu di 270 abitanti in l’Altu Taravu, induva a nevi rinfriscaia un pocu l’aria d’issu picculu cantu di Francia, spapersu ind’i numarosi muntagni in giru.

Accoltu da u merri sucialistu, i ziteddi, i ghjovani, a so pupulazioni, a nevi è i forzi di l’ordini, duvia ancu andassini in Sampolu, visita tandu mancata. Duvia veda à l’eletti naziunalisti, cosa poi sminticata è smentita.

I naziunalisti aviani dichjaratu issa ghjurnata « Isula morta » pà mustrà a so uppusizioni à a pulitica di u presidenti annantu à l’affari Corsi. Ùn si sò micca affaccati.

Issu paesi, dutatu di una sala di i festi, hà accoltu pà l’uccasioni diversi tipi d’eletti : una centinaia di merri, cunsiglieri municipali è tarrituriali (d’uppusizioni) è rapprisintanti di l’intercumunalità.

6 ori di rapprisintazioni davanti à l’eletti.
6 ori di quistioni-risposti.
Qualchi minuti di spittaculu incù certi eletti.

Una prima facia a vetrina di u so paesi di Pigna. A cultura di l’accolta di i turisti, l’auditoriu, a pulitica culturali di a cumuna è i so estensioni.

Un sicondu parlaia di a Corsica ind’a Republica. In fatti, Paul-Marie Bartoli, merri di Prupià, s’hè lanciatu in un ode à a republica, vantendu i meriti di una Corsica incù u minimu d’adattazioni legislativi. Hà ricurdatu u fattu chì u rolu di l’eletti territuriali ùn era micca di « cambià a custituzioni » ma simpliciamenti di rapprisintà u populu. Ind’u so requiem, hà insistitu annantu à u fattu chi l’eletti di a CDC erani « fora di terra », micca « cunnettati incù u tarrenu, in cuntrastu incù l’ex CG ». Un’intervenzioni chjaramenti ind’a famidda republicana di manca da a quali hà fattu à spessu parti.

Una terza, anch’edda di a manca republicana, hà fattu u so spittaculu gratisi :

« Eh attendez, j’ai le président devant moi, je vais continuer à parler! Je vais le dire. En général, les femmes sont plus courageuses. […] Je suis seule à avoir voté contre le PADDUC, même la droite est partie et m’a laissé seule!« 

Aline Castellani, merri di Piana, vicina di u PRG è di Nicolas Alfonsi, hà parlatu di più rispettu à l’altri eletti, pruvuchendu a rabbia di Mme Gourault. A so prublematica era, di manera principali, u PLU di a so cumuna, troppu ristrettu, sicondu à edda, annantu à u pianu di i custruzzioni. Hà dumandatu à u presidenti di fà riparta da zeru a leggi liturali, vechja di 30 anni, omancu più muderna à u so puntu di vista pà cuntrastà l’arrivu di novi pupulazioni. Cusì, novi custruzzioni pudariani essa autorizzati da l’auturità prefetturali, quissa hè a so speranza.

Ind’u so one woman show, ne hà apprufittatu pà interpellà à a ministra Gourault è a so prumessa di pussibilità d’adattazioni d’issa leggi pà u so tarritoriu.

Laurent Marcangeli, u merri d’Aiacciu, hà parlatu, eddu, di a centrali di u Vazziu, u gaz è i cunsequenzi annantu à a cità. Senza effetti di manica.

Effettu di manica usatu fora di i camera da l’anzianu merri sucialistu d’Aiacciu, Simon Renucci, urighjinariu di Cuzzà. Vulia parlà, una volta di più, di a merria chì l’aiaccini li ani cacciata di manera massiccia è evidenti in lu 2014/2015, accusendu à a squadra di u merri attuali di presupposti è sedicenti « manovri d’arrubecciu ».
Sempri quì pà dumandà u so contu, cinqui anni dopu. Cinqui anni, un eternità.

Iss’eletti, incù dumandi particulari, sarani stati intesi?

Pà avà, nudda di particulari ùn hè isciutu d’issa riunioni.
Mà ùn ne era u scopu. In fatti, era simpliciamenti una riunioni lucali di u gran dibattitu iniziatu dopu à a crisa di i « gilets jaunes ».
Dunqua, l’attesa di l’eletti ùn si pudia micca fucalizzà annantu à i rivindicazioni identitarii, sumaneti annantu à i preoccupazioni classichi di merri di picculi cumuni di u rurali.
Issi prublematichi sò stati sviluppati assai.

Ancu quidda, più criticata, di l’assassiniu di u prifettu Erignac, u 6 di frivaghju di u 1998, in Aiacciu. U presidenti pari ad avè feritu qualchi animi sensibuli culpabilizzendu à i Corsi annantu à issa tragedia, tandu cundannata da u listessu populu, da tempi è tempi. A Francia, da a quali faci parti u populu Corsu, l’avarà intesa à issa cundanna?

Tandu, ind’i prossimi mesi, sarà più intesu u merri di Prupià o Gilles Simeoni?
U Levante o Aline Castellani?
Luarent Marcangeli o Simon Renucci?

I voci di Jupiter ùn si poni micca penetrà…!

A seguita à u prossimu episodiu.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.