Un sbulecu in Aleria faci frombu dapoi qualchì ghjornu in Corsica : l’archiolughi ani trovu, annantu à u locu dettu Lamaghjone, una necropula rumana è etrusca, avvinta di sepulturi in un statu di cunsirvazioni strasurdinariu. Sti sbulechi inediti ch’erani principiati di ghjunghju di u 2018 raprisentani una scuparta tremenda, chì faci frombu ancu aldilà di i nosci fruntieri ! L’inventariu di sta camara funeraria era statu fattu da l’archiolughi senza svilà scuparti eccezzunali, chì d’altri archiolughi, cum’è Jean Jehasse, aviani scupartu una cintina d’altri tombi 60 anni fà in Casabianda.
Ma sta scuparta, incù l’attrazzi attuali, ferma tremenda è i media frusteri a facini sapè : u National Geographic parla d’una « camara funeraria misteriosa chì pudaria cuntena tisori archiulogichi piatti è impurtanti ». Ancu s’edda hè cumuna trà virguletti, ferma quantunqua impurtanti in quantità : una cintina di vasi, pindini dicurati di steddi, aneddi, unguenti, à mezu à più di 200 ughjetti funerarii ! L’archiolughi di l’Institutu Naziunali di Ricerchi Archiulogichi Privintivi (INRAP) ani da cuntinuà i so ricerchi sin’à apra a necropula. D’altrondi, l’ossi trovi annantu à u situ sarani analizati da truvà l’identità di a tinta parsona, u so ità, i raghjoni di a so morti è u so sessu.
L’attrazzi trovi aprini a via annantu à parechji iputesi annantu à l’identità di u difuntu, chì s’apparentini à ughjetti tipichi di ceremunii etruschi fistighjendu u vinu. Ancu s’eddi sò stati insipidditi torna pà aiutà à a ristituzioni è à a capiscitura di a cunfigurazioni di a necropula, st’attrazzi ùn sò micca cumuni annantu à st’aghja, è intaressini à u mondu sanu.
Da siguità !