I “fake news”, ùn sò state inventate pochi anni fà.
A desinfurmazione hè sempre esistita, in a televisiò quandu i Stati Uniti anu ghjustificatu a so invasione di l’Iraq in u 2003, in u ghjurnale tradiziunale quandu per a Sicunda guerra mondiale a prupaganda Nazista dicia chè e so disfatte contru à l’URSS eranu ritirate strategiche.
In a nostra sucetà oghjinca, e rete suciali cum’è Facebook o Twitter anu ingrandatu e capacità di l’Omu per sprime si. Si pò contà a so ghjurnata, i so sentimenti è tuttu u restu nantu à ste rete ; false infurmazioni dinù.
È cum’è s’è u mondu puliticu avia ghjustu scupertu stu fenomenu suciale, si sò impressati di crià una legge nova contru à e “fake news”. Prublema, una legge cusì esiste dighjà in a legge francese (articulu 29 di a legge di u 27 di lugliu di u 1881) è crià una legge nova s’assumiglia ghjustu à una inflazione ghjudiziaria.
Eppò, u più impurtante sicondu à me, a guerra contru à e false infurmazioni hè persa.
Prima, u prugressu tecnologicu ghjuca in favore di i criatori di e false infurmazioni. In fatti, oghje, tuttu u mondu pò falsificà i ritratti per fà passà u so missaghju puliticu. Per esempiu, pigliemu un flimettu d’una manifestazione, è vulemu mustrà chè a pulizia hà fattu qualcosa di male; ma prublema, sò i manifestanti ch’anu attaccatu i primi. Faciule, ci vole ghjustu à taglià u filmettu per mustrà solamente l’attaccu di a pulizia, cusì, a ghjente nantu à e rete pensaranu chè avemu a ragione è peccatu per a verità. St’esempiu di taglià u filmettu hè u piu faciule, si pò dinù crià ritratti à partesi d’altre illustrazioni, per fà passà u so falsu missaghju. L’esempiu u piu famosu hè u ritrattu di e donne vestute incù a burqa davanti à un ufficiu di a CAF.
A ghjente hà pruvatu chè stu ritrattu era falsu, ma hè sempre spartutu oghje nantu à e rete.
Sicondu, u numaru d’infurmazioni publicati nantu à e rete per ghjornu hè vicinu à 100 milioni , è a sola manera di cuntrullà a veracità di ste infurmazioni hè di leghje un’à unu l’articuli. Si capisce lestamente ch’ùn hè pussibule di leghje tutti l’articuli, è ci ne serà mondi ch’anu da esse letti, ancu s’elli sò articuli di desinfurmazione. Nundimenu, u travagliu fattu oghje per caccià e false infurmazioni di e rete permette di pulì un minimu e nostre rete suciali.
Terzu, una falsa infurmazione serà sempre sensaziunale. Infatti, u scopu di a falsa infurmazione hè d’esse letta, quandu quessu hè fattu, u criatore sà ch’ellu averà cunvintu abbastanza persone per crià un dibattitu lucale, naziunale o internaziunale nantu à u so sughjettu. Più a ghjente leghjerà l’articulu, più a so falsa infurmazione serà putenta, è s’è i pulitichi si mettenu à ripliglià l’infurmazione hè u jackpot ! Per esempiu, per a campagna presidenziale in i Stati Uniti in u 2016, c’era una falsa infurmazione dicendu chè Hillary Clinton seria involta in un’affare di pedufilia è chè tuttu l’affare si passeria in una pizzeria in Washington. Sta falsa infurmazione hè diventata talmente famosa chè ancu oghje certe persone credenu in a veracità di st’infurmazione. Si pò dinu piglià l’esempiu di l’omossessualità di u candidatu Macron. Ci ramintemu a fake news di Closer ch’avia dettu ch’elli avianu una prova di l’omossessualità di u favoritu di l’elezzione. Aspettemu sempre i ritratti pruvendu a pretesa omossessualità.
Quartu, i Stati s’invoglienu in u sparghjimentu di e false infurmazioni per prumove u so interessu naziunale. A campagna presidenziale in i Stati Uniti in u 2016, l’elezzione presidenziale di u 2017 in Francia, a guerra civile in Siria… A Russia hè u paese ch’hà fattu usu di e rete suciali u megliu per prumove u so interessu naziunale sustenendu candidati suvranisti anti-OTAN è anti UE o reabilitendu à Bashar Al-Assad nantu à l’opinione publica mondiale. Sò milioni di false infurmazioni nantu à Facebook o Twitter chì sò state spartute incù Sputnik o Russian Today cum’è surghjente. Sti dui medii d’infurmazione, incù una purtata mondiale perchè so diffusi in parechje lingue cum’è l’inglese, u spagnolu, u francese è u russu, sò patrunati da u Statu russu è sò cunnisciuti per sparghje false infurmazioni, o infurmazioni truncate per prumove l’agenda puliticu di a Russia.
Quintu è u più impurtante, a ghjente un cerca più a verità, cerca a so verità. St’ultimu puntu hè u più individuale perchè dimostra u disamore di a ghjente per i medii d’infurmazioni nurmali chì prifiriscenu infurmassi nantu à siti di ”reinfurmazione” chè sò generalamente siti parziali, militanti è ch’ùn ponu allora sparte a verità ma un prugrammu puliticu. U peghju cù sti siti hè chì a ghjente pensa chè u situ hè neutru, è vole veramente sparte a verità di a nostra sucetà. L’alguritmi di ricummandazione di Facebook è Google portanu una risponsabilità in stu fenomenu di disamore contru à a verità perchè ricummandanu infurmazioni è siti similari à quelli chì a persona hà già visitatu. Cusì, ùn hè più pussibile per u lettore di truvà un argumentu di cuntradizzione è pensa varemente avè a ragione. U lettore hè intrappulatu in a so propria opinione.
Infine, u lettore, intrappulatu da l’alguritmi infurmatichi è in una massa incalculevule d’infurmazioni incù falsi infurmazioni frà elle maniffatturate da Stati o gruppi pulitichi chè vulenu prumove u so agenda puliticu ùn hè più solamente ignurante, ma hè manipulatu da forze furestere. S’avvicina allora abbacciacatu versu l’urna è u so votu hè u fruttu di distorzioni di a verità.