Quantu volti aghju sunniatu
D’una vita sfarenti
D’un paesi luntanu
Tanti sogni in menti
Pò essa pruvaraghju
Di scopra d’altri urizonti
Ma in u cori avaraghju
Sempri a Corsica è i so monti
Pò essa in un avvena vicinu
D’altri lochi scupraraghju
Ma pà cuntà u me caminu
Nant’à a me isula turnaraghju
È quandu a vita si n’andarà
Mi vultaraghju in un’uchjata
Fighjulendu ‘ssa strada di libertà
Felici di a spassighjata
Pà parta senza rimori
Senza lacrimi o rimpienti
Solu incù gioia è amori
Sarrendu l’ochji tranquillamenti…