Tempuli : speranza è scunfitta.

Capitulu n°11 : A pastecca mezza.

Aprili di u 2017.

Troppu in difficultà, u P3 ùn prisenta mancu un candidatu à i legislativi, ma susteni à certi candidati di dritta o di u « Muvimentu » di Marcel Empona. Tandu, Marcel Empona prisenta u so nipoti sottu à i culori di u so « Muvimentu » in lu primu circondu di Tempuli, quiddu di a merria.

Ciccittu, u nipoti di Marcel Empona ghjunghji in testa è hè elettu diputatu à 31 anni, incù 29,25 % à u primu ghjiru contr’à u candidatu di u PS (datu à 31%), hè riuscitu u scopu di vincia l’alizzioni incù 50,19 % di i voti. Ghjovanu di a demucrazia cristiana, hè a parti dritta di « U Muvimentu », tandu riputatu trasversali. U sicondu circondu hè vintu à u sicondu ghjiru (60,85%) da a Lega è sustinutu tantu da u merri cà da U Muvimentu à u sicondu ghjiru. A Lega, partitu di dritta radicali, da u quali u listessu candidatu ùn facia più di 0,05 % cinqu’anni fà in Tempuli. Essendu quattru eletti di u Muvimentu à intrà à l’assemblea, sceglini di adreiscia à u gruppu maghjuritariu di a Lega.

À a fini di u mesi di ghjunghju, hè la festha di la màrfasa (festa di a pastecca) in Tempuli. Cum’eddu hè un miraculu, hè ancu a data di l’inaugurazioni di a Piazza di i Famosi, privista pà u 2015 ma pronta sulamenti pà u 2017. U so costu hè impurtantissimu : 7.3 millioni, d’€, 3.3 millioni di più di u costu privistu. Tandu, Cassapi hà dicisu di urganizzà a « festha » annantu à a nova piazza, ind’i ghjardini inglesi. Cum’è à l’epica di i manifestazioni contr’à u statu, i Tempulisi sò vinuti di manera massiccia. U merri, eddu, ùn pidda mancu a parolla pà prisintà i statui di Georges Frêche, Joseph Staline, Hugo Chavez o Napuliò. Lascia a carica à Miralotta, tandu elettu di u cantonu è presidenti di u dipartimentu sopr’à uni pochi di canti cumunisti.

A « festha » si passa bè, i toli sò pieni di pastecchi taddati è un usceri prisenti.

Prisenti parchì, diciareti ?

Pà dà un premiu à a più maiò di i pastecchi « La màrfasa velima », quidda di un cultivatori di Orsogana, in pruvincia di Cagnato. 159 kg netti.

U merri, eddu, ùn s’intaressa omancu à a ghjenti o à i pastecchi, ùn dici bonghjornu à nimu. S’installa à a tola di u cultivatori pà parlà incù eddu è filicitallu di u so premiu. Tandu, i partigiani di Miralotta ne apprufittani pà lampalli una pastecca mezza in piena faccia. « La culpi di la cattogna marfasa » (U colpu di a pastecca mezza) era una pratica classica in Tempuli pà muscià à u merri a so rabbia. Era u trattamentu riservatu à i merri in fini di mandatu ch’ùn aviani fattu tanti cosi in cità.

A festa si finisci bè. Tutti i Tempulisi sò cuntenti.

Dopu ad avè ricivutu a pastecca in capu, u merri và à veda à l’astrologa, Mireille Mirapelli. Era di ghjà intarvenuta à u mesi di nuvembri di lu 2015. Cuntentu di i so servizii, Cassapi si rendi ind’u quartieri di Fraida, rinnuvatu da a so squadra un annu fà.

U 1mu di luddu, u tempu hè beddu è chjaru, l’astrologa l’aspittaia.

Mireille l’astrologa pidda i carti, tadda i pacchetti, fighjula i segni.

E vedi u bughju.

U bughju ?

Di a scunfitta ?

Senza dubbitu. 

Prima carta, cattivu segnu. Ottu di picca : segnu d’impazienza è di certezza, u stress, a stanchezza.

Peghju, u novi di picca : a morti o un addisperu tamantu.

I traditori sariani di surtita ?

Cattivi nutizii in privisioni, postu chì Empona è Mariella si sò intesi pà accelera a prisenza di « u Muvimentu » in Tempuli, prisintendu u nipoti di Mariella pà u 2020.

Mireille ? Sbaddassi ? Mai !

Ha vistu a riescita di Miralotta è di Mariella è tant’altri cosi.

I carti di u bughju vi poni muscià una direzioni, un caminu, un’andatura.

Scuntentu di sapè u so avvena, Cassapi paga l’astrologa incù trè biglietti di 10 piegati è parti da Fraida, sottu à u soli.

U 2 di luddu, patatras.

Un sundami esci incù cattivi nutizii pà Cassapi è a so squadra : sulamenti 39% di i Tempulisi sò cuntenti di u bilanciu di a municipalità. Debuli bilanciu, tandu.

Ci hè ancu un test annantu à i capilista pà u 2020. Cassapi di u P3 saria scunfittu (13,5%) da un candidatu « X » di l’alleanza « Muvimentu  – Lega» (31%), da u PS (16%) è di a dritta non leghista (14%). Difficiuli mumentu pà u merri elettu da u primu ghjiru in lu 2014.

Incù una missa in esamini è una futura cundanna, u merri marchja annantu à una sola ghjamba. Sia casca in fiumu, sia finisci bè a so corsa è ferma merri in lu 2020. U risicu hè maiò. Tamantu sarà.

I taddi ind’a spesa publica in merria sò impupulari, cum’è a Piazza di I Famosi. U ghjurnali “La robbiera” parla sempri incù parolli forti di u bilanciu Cassapi, parlenduni incù irunia è cattivismu. I finanzi publichi sò in bonu statu. In fatti, prima di u so mandatu, u funziunamentu era pà 76% di i spesi municipali, 24% pà l’investimentu. In trè anni, i spesi d’investimentu sò ghjunti à 31% di i spesi glubali. Ùn basta micca mà hè un bon segnu.

Micca un bon segnu pà l’impieghi di i Tempulisi quand’è u disimpiegu tocca 16% di i Tempulisi in gradu di pudè travaddà, sin’à 38% ind’i quartieri pupulari cum’è Fraida, Monsalviaga, La Jalva.

Quartieri induva i supermercati Bai, di a famidda di a presidenti di righjoni, Tata Mariella, hè in situazioni di monopoli. Cumprendu l’alittori incù riduzioni adattati è boni di distribuzioni, si assicura una scunfitta pà Cassapi è una vittoria pà u so nipoti. A metoda era a listessa pà i righjunali ? Hà funziunatu à 100%.

L’annu 2018, eddu, sarà più calmu è sarà puntuatu da sundami infuzzendu sempri di più u merri è a so cundanna privista.

Ma quandu sarà pricisamenti a cundanna effettiva di u merri Cassapi ?

A seguita à u prossimu episodiu.

Lasciate un cummentu ?

This site uses Akismet to reduce spam. Learn how your comment data is processed.