Ditti « nimichi di u populu » da Donald Trump eddu stessu, i medii americani tali CNN o u New York Times si rivoltani è cercani di sinsibilizà a ghjenti di pettu à l’abboccu maiò d’un embiu odiosu à mezu à a campagna pà l’alizzioni di mezu mandatu da vena di nuvembri.
Marti u 31 di Luddu, unu di i ghjurnalisti i più famosi di CNN hè statu presu à parti duranti un meeting di u prisidenti di i Stati Uniti in Tampa in Florida. In direttu, Jim Acosta, u currispundenti di CNN à a Casa Bianca hè statu incarciaratu da partighjani di Donald Trump chì pusaiani ghjustu daretu à eddu : « CNN ùn vali nudda ! Seti buciardi com’è a scopa! » … Qualchì ghjornu prima, u 26 di Luddu, una di i ghjurnalisti di CNN dinù s’era fatta ricusà l’accessu à a Casa Bianca.
L’ustililità cresci !
« Aghju avutu l’impressu d’ùn essa più in i Stati Uniti », hà dettu Jim Acosta à l’antenna. Annantu à twitter, quiddu chì s’hè fattu rimarcà da u principiu di a prisidenza Trump da u so tonu cumbattivu s’hè inchietatu da un embiu di più in più ustili versu i medii. Un embiu « intrattinutu da Trump è da certi medii cunservatorii pudaria avè risultati gattivi, com’è qualchissia feritu ».
« Ùn si divaria micca trattà cumpatriotti di sta manera. A stampa ùn hè una nimica ! », hà aghjustatu u ghjurnalistu, aghjunghjendu un filmettu musciendu militanti di Trump in traccia di vitupirà annantu à eddu. M. Acosta hà dinù accusatu a so cuncurrenti, Fox News, d’avè cuntribuitu à st’odiu contru à CNN.
U lindumani, a portaparola di a Casa Bianca, Sarah Huckabee Sanders, hà dichjaratu chì u prisidenti cundannava sti cumpurtamenti, piddendu si à a stampa in u stessu tempu :
« Pà ciò chì cuncerna i medii, u prisidenti pensa ch’eddi portani una parti maiò di rispunsabilità. Sustenimu una stampa libara. Ma ci hè inde st’affari una certa rispunsabilità ».
Teuria di u cumplottu
Inde a manza di parsoni di u meeting di marti sera, i medii americani ani vistu l’emergenza di rifarenzi, sottu à a forma di banderi o annantu à i maglietti purtati da i sustenitori di Trump, à u muvimentu cunspiraziunistu anti elita QAnon, chì significheghja Q+ Anonymous. Stu gruppu, attivu soprattuttu annantu à i forum tali 8chan, annantu à u quali teurii di cumplottu è prumuzioni di u fastidiu annantu à i reti nascini à buzeffu, hè sicura chì una cuspirazioni mundiali à a quali s’opponi Trump asistaria.
I bersaghji sò : U « statu prufondu », l’amministrazioni chì s’uppunaria à i pulitichi di Trump; i banchieri, Hollywood è l’elita dimucratica americana, frà i quali Hillary Clinton è Barack Obama. In sta visioni scema, a lettara Q faci rifarenza à unu spertu sicuritariu di u guvernu chì publicaria annantu à internet missaghji sicreti abbantu à sta cabbala.
Marcuri, a portaparola di a Casa Bianca hà dittu chì u prisidenti cundannava « ogni gruppu chì chjama à a viulenza è ch’ùn susteni manc’appena gruppi chjamendu à avè sti cumpurtamenti. »
In campagna, Donald Trump si n’hè presu dinù à i medii ghjovi sera in Pennsilvania, accusendu li d’ùn parlà micca di i so riesciti è d’abbughjà di manera sistematica u so mandatu. « Ma chì sarà accadutu à a stampalibara? À u ghjurnalisimu unestu? » ch’hà dittu u prisidenti fighjulendu i ghjurnalisti in fon’ di sala ….
Svegliu
Qualchì ora innanzu, duranti un briefing à a Casa Bianca, Jim Acosta è Sarah Huckabee Sanders aviani un scambiu tesu, u primu vulendu uttena di a siconda ch’edda dichjarissi di manera publica chì a stampa ùn hè una nimica, antienna di Donald Trump. U ghjurnalistu hè finalamenti partutu di a cunfarenza di stampa dopu chì l’ultima avia ghjudicatu chì i medii « bassighjaiani à spessu u liveddu di cunversazioni di u paesi »
Dumenica sera, u patroni di u New York Times, Arthur Gregg Sulzbeger, avia rivilatu avia pruvatu à sveglià u prisidenti americanu annantu à st’attacchi ripituti di a stampa duranti un incontru à a Casa Bianca. Divia stà sicreta, ma M.Trump l’avia rivilata inde un tweet, ciò chì hà fattu chì M.Sulzberger hè statu ubligatu di publicà un cumunicatu di stampa : « U me scopu principali, accittendu st’incontru, era di fà spariscia i me inchietudini à u liveddu di u sughjettu di a returica antistampa strà strana di u prisidenti. »
« Aghju dittu francamenti à u prisidenti chì pinsaiu chì u so discorsu ùn era solu fattori di divisioni ma soprattuttu ch’eddu era di più in più piriculosu. L’aghju dittu chì, benchì a sprissioni « fake news » sighi falsa è gattiva, eru monda priuccupatu da a so manera di caratterizà i ghjurnalisti com’è « nimichi di u populu ». »
Rispundendu sempri incù Twitter, M. Trump hà affirmatu ch’eddi erani « i medii chì mittiani viti in periculu, è micca soli quiddi di i ghjurnalisti […] ricilendu diliberazioni interni di l’ammnistrazioni ». Intarrugatu ghjovi annantu à stu sughjettu, a fiddola di Trump, Ivanka, s’hè dimarcata di u so babbu, spieghendu ch’edda ùn vidia micca a stampa cum’è una nimica. Ma, una volta di più, Trump voli avè l’ultima parola, utilizendu a so reta suciali prifirita, Twitter :
« Anu intarrugatu a me fiddola Ivanka sì i medii erani o nò nimichi di u populu. Hà rispostu di manera ghjusta di innò. Sò i « fake news », chì raprisentani una parti maiò di i medii, chì sò i nimichi di u populu! »