Tempuli : speranza è scunfitta

Decesimu capitulu

Una cura di ghjuventù

Marzu di u 2016.

U merri, Cristofanu Cassapi, dà a gestioni di un’assemblea cunsultativa di a ghjuventù Tempulisi (ACGT) à François Ascosa, ghjovanu aghjuntu à i sport. Hè vutata à u cunsigliu mori animatu di u 20 di marzu incù un solu votu di maghjurità. Ascosa sarà stallatu cum’è merri di i ghjovani di Tempuli. U so sognu dapoi qualchì anni.

U cunsigliu hè stallatu u 13 di maghju di u 2016, ghjornu di u resu contu di a decisioni di u tribunali amministrativu annantu à i risultati dubbitosi di l’alizzioni. U merri di i ghjovani si metti à a piazza di u merri, parla à 40 ghjovani di 13 à 30 anni scelti annantu à cartulaghji pricisi (mutivazioni, impegnu puliticu). A seanza si passa di manera nurmali fin’à quandu un ghjovanu, Michel, dumanda a parolla.

Michel Contina, 17 anni, hè u nipoti di Tata Mariella. Cumincia à accusà u merri di tradimentu, ind’a misura chì u merri Cassapi hà sustinutu – à l’ultima seanza – i so eletti pà una criazioni di un gruppu dissidenti à u cunsigliu righjunali di Tempulia « Unitàt Poblari di Tempulia – Unità pupulari di Tempulia », un gruppu di centru-manca scetticu annantu à a guvernanza di Tata Mariella. Michel ni si pidda à Cassapi, tandu assenti. Ascosa, eddu, membru di u gruppu di Marcel Empona, ùn dici nudda, lascia u ghjovanu parlà. U lascia parlà parchì i rilazioni trà eddu è Cassapi ùn sò micca tanti beddi. Sò à u più mali.

Miralotta, prisenti à a surtita di a sessioni di l’ACGT, da tutti i so filicitazioni à u picculu Contina, ghjovanu ma efficaci. Pupulistu di 17 anni sulamenti, riesci à pichjà cum’eddu ci voli un merri debuli, senza visioni è impeditu di guvernà.

E se Miralotta pudia stà presidenti di u dipartimentu è u picculu Contina divintà « lu cabbinu/lu sindacu » in lu 2020, val’à dì u merri di Tempuli.

Seria ipotesi missa in baddu da Miralotta è i so amichi. Tata à a righjoni, Miralotta à u dipartimentu è u picculu Contina à a merria à 21 anni. “Les ficelles sont bien tirées” sicond’à Ascosa.

Iss’intervenzioni di Michel hè stata ancu rimarcata da u ghjurnali « la Robbiera Tempulisi », à tal puntu chì u ghjurnalistu hà surtitu un articulu : « La mafia en famille / La gamurra in familla » accumpagnatu da un affissu intitulatu «Michel Contina : Tata Mariella partout chez elle ». 21 anni, merri elettu è installatu. Un sognu di ziteddu pà issu studienti in gestioni di cummerci. Ascosa hè cuntentu : hà un uccasioni d’infuzzà u merri attuali è di stà aghjuntu, qualsiasi u merri in piazza. Tuttu và bè, insomma.

Issu 13 di maghju, hè surtita a decisioni di u tribunali : 950 voti sò ritirati à Tata Mariella è 950 sò dati à a lista di u PS. Annantu à più di 400 000, ùn cambia nudda. Nimu ùn hè cundannatu mà si pudaria truvà una cundanna à a merria incù l’impieghi fittivi. I primi audizioni cumminciani u 1mu di luddu di u 2016.

Tandu, dapoi u tempu, Cassapi hà persu tutta a so influenza è a maghjurità teni grazia à un solu elettu : Ascosa, ch’ùn voli micca perda i so soldi d’aghjuntu è u so statutu suciali, senza sustena di manera publica u merri, tandu.

Mentri chì a pulitichedda hè in piazza, a vita cuntinuveghja pianamenti è bè in Tempuli.

Lasciate un cummentu ?

This site uses Akismet to reduce spam. Learn how your comment data is processed.