A cultedda di manera ghjinirali era à l’urigini un strumentu, un’arma pà taglià..ma beddu luntanu di l’usu oghjincu. A fiama era adattata à l’usu ricircatu, cum’è par asempiu a caccia di salvaghjini maiò o à l’oppostu, chjuchi. Ma ci voli à sapè chì in a nostra Cursichedda l’arma ùn era micca a cultedda ma u stili o stilettu. Artisgianatu vechju d’almenu dui millenarii chì hà cunnisciutu un’apughjeu in Corsica. Mentri seculi, l’arti di a cultiddaria corsa era u più famosu è perfurmanti di u Maritarraniu.
Ma chì hè a cultedda corsa?
Parechji materii sò usati. Pà u manicu legni è corri sò travagliati. Corri di sgiotta, di beccu o di muntoni. U bussu, l’alivu, u zizulu, u litarnu, u cori di leccia, u listincu, u ghjiniparu, u caracutu, u baracuccu o ancu l’amandula sò altrettanti ligni chì servani à a fabricazioni di a cultedda corsa. Attinzioni! a cultedda cunnisciuta A Vindetta ùn hè micca una cultedda corsa. A vera cultedda anziana corsa, a cultedda di prima hè a pittuta o piduta chì vena di pettu. Ùn hè micca un’arma ma di più un strumenti incù una fiama galbata pà pudè travaglià u legnu. Sin’à a guerra di u 14 ogni oghjettu era fattu in legnu. D’altri materii sò travagliati pà via di a fabricazioni di a cultedda cum’è l’acciaghju è ancu, à l’epica, faciani eddi stessi u carboni, pà scaldà. Ci erani dunqua i carbunari è i carbunaghji chì sò aghji à carbonu.
Ma comu si pò fà a sfarenza trà a cultedda corsa è tutti issi culteddi?
Una cartula prufessiunali hà parmissu di prisirvà l’identità di i culteddi corsi è di difenda l’intaressi di una prufessioni, largamenti rivalizata da pruduzzioni impurtaticcii. Una cartula pà urganizà, difenda, prumova è aiutà. Incù issa cartula i sapè fà isulani è i materii lucali ani da parmetta à u clienti di sfarinzià i culteddi lucali da quiddi chì sò cuntrafatturi è copii, appurtendu a sicurezza nicissaria annant’à l’autenticità è a qualità di i rialisazioni di l’artisgiani. Elaburata da i prufissiunali di u settori è fundata annant’à una manera di classificà pricisa incù dui niveddi. U primu niveddu “Fattu in Corsica” pà a miaò parti di i culteddaghji è u sicondu, “Excellence” chì cuncerna solu dui cultiddaghji, Jean-Do Susini di Ville-di-Petrabugno è Xavier Biancarelli di Purti-Vechju. Un puntoghju hè appostu annant’à ogni mudellu di l’artisgiani labellizati. Issu puntoghju ripiglia a muvra, simubulu di a Corsica. A pruduzzioni tradiziunali edda t’hà a sò appellazioni “Cultella Tradiziunale” è un “logo” è un puntoghju currispundentu pà ùn tralascià u nostru patrimoniu.
A Festa di a Cultedda Corsa in Cutuli è Curtichjatu u 3 è u 4 d’aostu
Sè nò parlemi di a cultedda corsa ci voli à parlà d’issa manifestazioni ch’hè A Festa di a Cultedda Corsa è chì si passa tutti l’anni in Cutuli è Curtichjatu. Pricursori di i fieri corsi chì mettani in valori a cultedda corsa tradiziunali, Cutuli è Curtichjatu metta in baddu cust’annu l’ottesima edizioni incù l’aiutu di u Sindicatu di a i cultillaghji corsi, di a Camara Righjunali di i Mistieri è di l’artisgianatu di a Corsica è di l’ADEC (l’agenzia di sviluppu ecunomicu di a Corsica). U Merri è di più cultiddaghju, Ghjuvannni Biancucci hè felici d’issa riescita. In più di a vendita di culteddi si pudarà veda l’artisgiani in ogni tappa di fabricazioni incù dimustrazioni chì si farani pà a maiò parti di notti, chì prima ùn si pò travaglià u focu è a fiama incù issu caldu è dopu pà apprizzà i culori rigalati da issu spittaculu. Pà issa edizioni di u 2018 l’urganizatori ani da accuglià una delegazioni di culteddaghji sardi ch’ani da prisintà i so produzzioni identitarii è ch’ani da scambià incù i nostri culteddaghji corsi. Cum’è tutti l’anni issa festa si passarà in una ambiu di gioia, di risi è d’amparera. U gruppu D’Alpaghju ci rigalarà più di dui ori di canti corsi è u Foyer Rural sarà torna una volta prisenti chì ci sarà da bia è da magnà!
Ritrattu da Pierre-Paul Lepidi