Settimu capitulu
I carti di a luci.
19 di nuvembri di u 2015, cinqui ori di sera.
U tonu si faci senta ad ogni mumentu. U tempu hè bughju, neru, fretu in lu quartieru rusticu è un pocu à l’abbandonu di Fraida.
Un tempu d’invernu prima di l’invernu parchì casca a nevi.
Cassapi, micca pocu fieru di i so recenti intarvisti in televisioni, rendi una visita à l’astrologa, Mireille Mirapelli.
Taddata da u rimori di u tonu, a vechja Mireille faci a cartumanzia in una stanza brutta, guasgi senza luci, piena di teli di tarantula incù un’ intrata in legnu tutta rotta.
Tandu, Cassapi li dumanda di parlà di a so vita futura.
Mireille faci i carti, tadda i pacchetti, fighjula i segni.
E vedi a luci.
A luci di chì ?
Di a riescita ?
Micca par eddu.
Di a scunfitta ?
Podassi.
Prima carta, cattivu segnu. Ottu di picca : segnu d’impazienza, u stress, a stanchezza.
Peghju, u novi di picca : a morti o un addisperu tamantu.
Cattivi nutizii in privisioni.
Mireille ? Sbaddassi ? Mai !
Ha vistu a scunfitta di Gossotta, a morti di l’anzianu merri Bassacutena, un cambiamentu di vita pà Marie-Christine.
Tandu, Tata Mariella, à a magia, ùn ci credi tantu. Ma Cassapi li hà dittu di pruvà.
U risultatu : cattivi nutizii pà Cassapi ma una riescita pà Tata Mariella. Mireille vidia una riescita, ma micca a quali. In amori ? In pulitica ? In certi affari di cummerciu pà i quali u ghjurnali di La Robbiera la tratta di « Rose Mafia » ?
I carti di a luci ùn parlaiani pocu è micca annantu à u cuntestu.
Ma i carti di a luci vi dani una direzioni, un caminu, un’andatura.
Cuntentu di sapè u so avvena, Cassapi paga l’astrologa incù trè biglietti di 10 è parti da Fraida, sottu à a nevi, a u bughju.
Tandu, a luci hè vinuta…
Versu u 22 di nuvembri, u merri hà incuraghjitu à u paisanu Marcel Empona pà fà una lista citadina, eculugista, di tipu « cunfederazioni paisana », piuttostu di centru-manca.
« Divida pà meddu regnà », tali hè u so mottu.
Divida i voti pà avenni di più è privà a manca è a dritta d’ossigenu.
Strategia azardosa.
Tandu, hà funziunatu.
In fatti, u restu di a campagna si passa di manera nurmali, incù i pratichi tipichi di Cassapi (clientelismu, porta à porta) è campagna à l’appiattu pà a lista di Marcel Empona.
Marcel Empona, militanti eculugistu ind’è a « cunfederazioni paisana » dapoi à più di 40 anni, cunnosci bè tutta a squadra di u P3 è di Tata Mariella.
L’eculugia ? U so cavaddu di battaglia, dapoi anni è anni. Hà ancu fattu 2 anni di prighjò pà avè sgradatu u centru energeticu di Lu Pistharoni.
S’hè fattu una ragioni ? Da solu, ùn faria micca più di 3%. Un aiutu sottu à tola di Miralotta, Cassapi è i so amichi hè u binvinutu.
Cusì, à u primu ghjiru, Francescu hè presu annantu à a lista di Tata Mariella ma faci a campagna di Marcel Empona, applichendu tandu à a strategia di Cassapi : « Divida pà meddu regnà ».
Un dibattitu hè urganizzatu trà i prutagunisti è a strategia di Cassapi hè missa in baddu. Tata Mariella passa u so tempu à attaccà u bilanciu di a dritta è u candidatu Empona, di manera suttili. Trà l’ecolo-trotskismu è a dritta mafiosa, a scelta era edda, a rapprisintanti esclusiva di l’intaressi di u populu.
U ghjornu di u primu ghjiru, u 3 di dicembri, tutti i rapprisintanti di Tata Mariella sò stallati ind’i scagni di votu incù un pin’s di Lenine. Tutti, ancu Cassapi è Miralotta.
Miralotta, tandu, ùn hà micca dettu a so ultima parolla.
L’uperazioni di votu si passa bè, l’urni sò binidetti da i preti à 7 ori è 30 di mani.
Marie-Christine, pà a prima volta, hà a cunsegna d’ùn applicà i metodi abituali.
In fatti, a metoda sarà missa in baddu ghjustu innanzi à sei ori di sera. U colpu hè privistu versu à cinqu’ori è quaranta cinqui minuti.
Tandu, solu l’amichi di u P3 è di Empona sani cio’ chi’ si passa.
Cinqu’ori è quaranta cinqui di u dopu miziornu : u pianu funziona à a maravidda.
Sulamenti 15 scagni in Tempuli è 40 % di quiddi di a Tempulia ùn ani micca cunnisciutu a tecnica di Miralotta.
U risultatu hè senza appellu : annantu à a prima centinaia ind’u scagnu di Marie-Christine, 45 vani à Tata Mariella, 21 à Empona, 20 à u PS, 6 à u FN, 4 à i surtenti, 3 à u PC, 1 biancu.
I risultati so’ guasgi listessi pà tutta a cità è u dipartimentu, eccettu à u Nord di Tempuli induva a manca sbocca in testa di manera netta (41%).
À a permanenza di Tata Mariella, i militanti incù i pin’s di Lenine è simpatizzanti sò radduniti è sò cuntenti.
Cassapi hè cuntentu : i carti aviani vistu ghjustu pà issa volta.
I militanti, assai surpresi da i risultati pusitivi di l’alizzioni, cantani tutti i canzoni pupulari pà fà onori à a candidata : « La notti », « A luna a mezzu mari », « L’internaziunali », « Hasta Siempre ».
I canzoni « La notti » è « A luna a mezzu mari » ùn sò tantu scelti par azardu. A prima canzona hè vulgarissima. Parla di masci andendu à u mari (La Platamona, vicinu à Posthudorra/Porto Torres) appassiunati di sessu è di beddi donni. A siconda hè legata à a Mafia.
Tandu, Mariella Contina faci un discorsu di manu tesa à Marcel Empona, chì hè chjamatu à fà una fusioni di lista incù edda. 65% di i seghji pà u P3 è i cusidetti « Cumunisti Tempulisi », 35% pà l’eculugisti di Empona.
I risultati cascati in a seratina darani a raghjò à Tata Mariella pà a repartizioni di I listi : 65% di u risultatu di a futura cualizioni hè uttinutu da edda, 35% pà u so amicu.
U ristultatu di u dipartimentu di u dipartimentu hè senza appellu : 40,7% pà u P3/cusidetti « Cumunisti Tempulisi », 19,2% pà Marcel Empona, 17,1% pà u PS, 11,9% pà u FN, 7,5% pà a dritta, 3,6% pà u PCF/FDG.
A righjoni intera da risultati menu intarissanti ma Tata Mariella, partuta da 5 o 6%, hè ghjunta siconda ghjustu daretu à a dritta surtenti.
22,6% sulamenti pà a dritta di A.Pontrilli, 22,1% pà Tata Mariella, un beddu 20,9% pà u PS, a surpresa FN à 14,7%, Marcel Empona à 12% è infini, a sezzioni ufficiali di u PCF à 7,7%.
Issi risultati cunfermani una cosa : a duminazioni di u pupulismu annantu à a scena pulitica lucali. P3 è ecolo-pupulisti. Tata Mariella – Marcel Empona, u duo.
Tandu, Mireille Mirapelli, l’astrologa ùn s’hè sbaddata è Mariella hà vistu a luci.
Issa duminazioni sarà sempri prisenti setti ghjorni dopu ?
A sapareti a prossima volta.