In liceu è à l’Università, amparemu e teurie suciulògiche, ecunòmiche è di scenza pulitìca famose di l’autori d’occidente cum’è quelle di Keynes, Marx, Weber, Durkheim, Marshall, Smith è tanti altri. A particularità di quelli pensatori di e scenze umane hè ch’elli sò nati tutti à a listessa èpica : quella di a Rivoluzione industriale. Ci vole à sapè chì u studiu di ste scenze ùn hè solu a particularià di questa èpica perchè, per sèculi c’eranu pensatori chì sarianu oghje cum’è suciuloghi o ecunumisti, ma ùn hè mancu a particularità di l’Occidente. Ibn Khaldun, natu in Tunisi in u 1332 è mortu in u 1406 era unu di i precursori di e scenze suciali di u mondu arabu. Oghje, vi prisenteremu l’opera di stu famosu persunagiu di a Storia araba.
Piccula biugrafia d’Ibn Khaldun
Natu in i tempi di a Reconquista cristiana di Al-Andalus, ci vole à capì a Spagna, induve l’imperu musulmanu era attaccatu per parechji fronti in Auropa da i cristiani è à u Mez’Oriente da Timur Lang, guerrieru mongole, Ibn Khaldun – di u so nome sanu Wali al Din ‘Abd al Rahman Ibn Abi Bakr Muhammad ibn al Hasan ibn Khaldun- hà bè capitu chì ci vulia à analizà a situazione ecunòmica è suciale di l’Imperu per pruvà di amministrallu megliu. A so teuria epistemulògica per capì a Storia, è dunque a sucetà era u cuntrariu di quella di l’anziani, basata solu nantu à biugrafie di famiglie putente. D’una famiglia d’intelletuali, studiò in Tunisi, locu d’altu sapè in quelli tempi, a filusufia a Storia, a teulugia è u dirittu. Hà capitu a debulezza di l’Islam di u XIVisimu sèculi ch’era u bisognu d’un sforzu novu di ricerca intelletuale nantu à a teulugia è a filusufia. Pruvò allora una riflessione nova “ trà u mondu di l’omi è Diu”, basata nantu à a ragione pura, ciò chì si chjama oghje, a raziunalità. Astutu, principiò a so carriera cum’è altu omu di u Statu in a Spagna musulmana, aiutò e dinastie arabe cum’è quelle Umayyad, Almoravid o Almohad di Spagna à amministrà e pruvince ma dinù à neguzià a pace cum’è diplumàticu incù i guverni cristiani di u rè Pedro I. Nanzu à a caduta di Sevilla, fughjò in Tunisi, è po, dopu à qualchì annu cum’è cunsiglieru di i ministri, si n’andò in Egitta è, à a fine di a so vita, à Damas per insegnà.
Un omu di sapè, chì capiscia cum’elle marchjavanu e sucetà di l’èpica.
Emu da prisentà avà a teuria maiò pensate da Ibn Khaldun :
A teuria ciclica di l’imperi:
Ciò ch’Ibn Khaldun hà pensatu di a Storia di l’imperu arabu musulmanu, l’hà usservatu incù un’uchjata ecunòmica è suciulògica. Hà criatu a teuria ciclica di l’imperi vulendu spiegà cum’ella si hè fatta l’espansione musulmana in u Nordu di l’Àfrica, in u Mez’Oriente è in Spagna. Per ellu, l’espansione di l’imperu arabu era solu u fruttu di e debulezze di l’imperu bizantinu. Infatti, l’imperu di Bisanziu avia bisognu di e tasse di dece famiglie per finanzià un cavalieru catafrattu– era un cavalieru cupertu da un’ armatura di ferru chì u pruteghjia in battaglia — , l’armata bizantina era prufeziunale è avia un territoriu maiò da difende. L’arabi, elli, ùn avianu micca bisognu di soldi chì cumbattianu incù e so arme à elli – vale à dì ch’ùn eranu micca suldati prufeziunali– , ùn avianu territoriu da difende perchè eranu nomadi. D’altronde, Ibn Khaldun spiega e vittorie arabe incù a parolle Asabyya, vale à dì a cuesione suciale trà e tribute arabe. Issa parolla hè impurtantissima perchè hè un ardignu maiò di a suciulugia muderna è mostra chì l’arabi eranu uniti per luttà contru à i cristiani ancu s’elli ùn eranu urganizati cum’è un Statu. À pàrtesi di sti fatti, si capisce chì l’arabi eranu ancu più numarosi chè i cristiani, è cum’è l’imperu bizantinu era troppu grande da difende incù pochi suldati, si spiega e numarose disfatte in Egitta è in Mez’Oriente di i bizantini contru à i musulmani.
Dopu à quelle vittorie, l’arabi sò stati ubligati à crià un veru Statu, incù un amministrazione, cunfini à difende, crià un’armata prufessiunale è lascià a vita nomade per campà cum’è i bizantini. Cusì, a fasa d’espansione s’hè compia è si principia a fasa di caduta d’un imperu. Cum’è l’arabi ùn anu più capacità per attaccà in ogni fronte per seguità l’espansione, sò stati attaccati da altre pòpuli nomadi chì, pocu à pocu anu da invade u so territoriu. In i tempi d’Ibn Khaldun, l’imperu arabu abassidu era in caduta, è hè statu rimpiazzatu da l’ottomani, chì funziunavanu cum’è nomadi, sin’ in u 1517 quandu invaderanu l’Egitta. Torna una volta, si pò fà usu di a teuria d’Ibn Khaldun per spiegà l’espansione è a caduta di l’imperu ottamanu. Più l’ottomani invadianu territori cristiani, più s’avvicinavanu di a so caduta, perchè eranu ubligati à crià amministrazione, un’armata, crià tasse per finanzià suldati prufessiunali ecc.
S’elle vi interessanu l’altre teurie d’Ibn khaldun cum’è quelle ecunòmiche, suciulògiche o ingiru à a Storia vi pregu d’ascultà u podcast di France culture ch’hè assai cumplettu. Di i suciuloghi i più impurtanti di a Storia, Ibn Khaldun era unu di quelli, s’hè dimarcatu di i so culleghi per a so dimarchja primaticcia è in avanzu pè a so epica.
Vi lasciu incù una riflessione d’Ibn Khaldun, a food for thought citazione :
“Per a Storia, parechje nazioni anu suffertu d’una scunfitta fìsica nantu à u campu di battaglia, ma mai ùn hà marcatu a fine d’una nazione. Quandu a nazione diventa a vittima d’una scunfitta psiculògica, quessa, marca a fine d’una nazione.”