Sestu capitulu
U parcorsu di Tata Mariella.
Intrendu in pulitica, certi duvariani purtà à u dibattitu una libartà tandu assenti. Ci sò «les grandes gueules » famosi cum’è Jean-Luc Mélenchon, Jean-Marie Le Pen, Jean Lassalle o Cristofanu Cassapi.
E ci sò l’altri, scunnisciuti. Eccezzioni fatta di a terrazza d’unu o dui caffè. Ranochji piuttostu cà bovi, sò cattedrali ind’u disertu. Mariella Contina hè di quissi.
Pinsendu ghjucà à Superman, hà scrittu trè ghjorni fà un tract abuminevuli « Lu stampinu di Mariella » ind’è u quali priveni à l’abitanti di a righjoni di Tempuli contr’à u ghjurnali. La Robbiera saria culpevuli di « pistighjalla ». Un hè tandu ciò ch’edda avia dittu à a surtita di a so ultima riunioni publica dopu à un articulu di 2 paghjini, trattamentu riservatu à tutti i candidati à u postu di prisidenti di righjoni.
Ciò chì hà datu u granu da macinà à Mariella? L’assenza di dibattitu di fondu d’issa campagna. I cacciati sporchi di Mariella Contina, ùn ne sariani a prova a più stupenda ? Pà ripidda un termini sempri utilizzatu da i so uppunenti, Mariella hè abituata à issi « gesticulazioni ». Pà capiscia i critichi, un ritorni annantu à u so parcorsu sindicali è finanziariu s’imponi.
S’è Mariella, anziana impiegata à u CCAS di a cità fin’à u 2006, si prisenta tandu à i righjunali incù u sustegnu di u P3 di u « FN di manca » Cassapi, si hè servita di tutti i puteri.
I Tempulisi si ricordani ch’innanzi di pisà u terzu ditu di a manu annantu à i so carti è di parlà di i sucialisti cum’è a pesta, Mariella cunniscia un solu maestru, Stefanu Gossotta, PS, di u quali era u princiapli finanziatori publicu. Era u tempu benedettu di u presidenti sucialistu Velana à a righjoni – ancu ministru di l’internu – sempri prontu à dà i lizioni à l’altri. « L’omu ch’eddu ci voli, induva ci voli», sicondu à Gossotta, decuratu à iss’epica di a ligioni d’onori da u listessu Velana.
Dopu ad avè avutu a cunfidenza di Gossotta, hè vinutu u tempu pà Mariella di andà à u cunsigliu municipali annantu à a lista di Gossotta in lu 2008. Dimarchja abbandunata dui annu più tardi, videndu chì i supermercati “Bai” di a so famidda ùn sò stati favurizzati da Gossotta. Troppu unestu, Gossotta ùn avia accittatu u marcatu impostu da Mariella : dà tutti i marcati di furnitura in marcanzii (casgiu, carri) à a so famidda contru à a paci municipali è un assenza di candidatura dissidenti in lu 2014. À l’epica, diciami d’edda chì cunniscia bè i cartulari ma era missa da cantu par via di i so « esigenzi ».
Un tenendu mai in piazza, quidda chì, in lu 2006, hè partita di manera invuluntari di u CCAS, induv’edda avia taddatu l’aiuti suciali municipali di tutti i benefiziarii di Tempuli duranti più di dui mesi, si hè riciclata in certi attività di cummerciu ind’è i supermarcati “Bai”. Irunia di a storia, u vechju cavaddu di battaglia di Mariella, a custruzzioni di a zona cummirciali di Lu Pilmoni riveni annantu à a scena pulitica. L’argumenti sò intarissanti ma u dibattitu casca in certi bruttisimi caricaturi.
In campagna incù u P3 dapoi è anni sedicenti « contru à a Mafia, per la pace », a bè numata Mariella ùn s’hè mai piantata di polluà i vitturi di a righjoni Tempulisi incù i so millaii di bruttissimi tract mensili. Aldilà di u biotu siderali di u cuntinutu, di i tituli pupulisti è di un logo chì s’assumidda à una margarita è un marteddu, chì si pò veda ind’i so scritti? « Tempuli à i Tempulisi », « Tempoli aux Tempolais », «I furesteri…fora », « Les étrangers dehors », « I stranieri, v’ammerdemi », « Gossotta, case prison », « Tempuli fiera contr’à li stranieri ». Motti chì piacini à i capilisti lucali di l’estrema dritta: « C’est comme si c’était nous, Mariella n’est pas une ennemie ! ». Mariella ùn manca sempri un uccasioni pà fassi rimarcà, senza essa tandu eletta.
In lu 2015, à l’iniziu di u sicondu simestru, Cassapi l’avvia cum’è capilista di u P3 pà i righjunali, « hè tandu cunnisciuta cum’è una tonta ch’ùn faria più di 4% », sicondu à a Robbiera Tempulisi. « Una vasta manipulazioni, un complot », sicondu à a Mariella, pà, senza dubbitu, teuria di u cumplottu ubbligata, impedì a Tempulia d’essa schiarita da i so luci.
A « libertà » avanzata da Mariella Contina pà ghjustificà i so cambiamenti d’idei à u stintu di i venti, hè tandu vista cum’è incunstenza.
La Robbiera parla d’edda? « Troppu onori », sicond’à u ghjurnali, « ch’una « grande gueule du commerce local », ùn la sarà mai ».
A u mesi di sittembri di u 2015, pà pudè fà una campagna serena, u merri Cassapi hà tuttu privistu pà a so candidata, eccettu i soldi dati da a so famidda cunnisciuta pà u so sensu spiciali di u cummerciu “Bai” : carti, tract, argumentarii, situ internet, permanenzi, listi eletturali.
Marie-Christine, cunniscendu tandu a lista eletturali di u so quartieri è a lista di i benefiziarii di i carti di fidelità di i “Bai”, pidda di manera seria a furtuna di vincia a righjoni. Cusì, pidda u telefunu è cumponi numari.
Numari, numari è numari. Centinaii, millaii ancu!
Più di a metà sò numari di ghjenti di i quartieri pupulari : Monsalviaga, La Jalva, Pedrò, Ambazàga, Arpaione, Idràchia, Fraida.
Tutti issi quartieri ani cunsiglieri generali d’uppusizioni (PS, FN è UMP). Pà impedilli di fà a campagna, i metodi di Marie-Christine sò sempri listessi : a guerra tutali.
A guerra hè annantu à u tarrenu (tract, affissi, porta à porta) ma ancu à colpi di telefunati. Essendu in bon termini incù Miralotta, Marie-Christine pò cunvucà quant’edda voli i clienti di u supermarcatu pà prumetta certi aiuti è aumentazioni di rigali di u contu di fidelità. Un colpu di telefunata à l’espertu mandatatu da u supermcatu, una visita ind’è u publicu sibula, et voilà!
44% di i Tempulisi essendu sottu à a soglia di puvertà, l’uperazioni marchja parfettamenti. I parsoni sò chjamati, una à una, è si vedini prupona una visita à l’accolta di u cummerciu, prumittenduli rigali o crediti faciuli.
Di ghjornu in ghjornu, a lista di i colpi di telefunu avanza, avanza, avanza !
Funziunarà?
A seguita a ci diciarà.
Tandu a vita cuntinuveghja è a ghjenti faci a spesa…