Tempuli : speranza è scunfitta

Terzu capitulu

L’arburu chì piatta a furesta

Tempuli, cum’è tutti i cità d’impurtanza righjunali, hè sottumessa à certi reguli. Reguli finanziarii, codici di cumunicazioni è altri custretti.
U 14 di ghjunghju, à u cunsigliu municipali, Cassapi inizia a seanza incù ringraziamenti à i so sustegni pà a campagna attiva. Ne apprufitta pà prisintà a so nova idea pà a fini di u 2015 : Una piazza pà celebrà i parsunaghji impurtanti di a storia di u mondu : A Piazza di i Famosi, à a piazza di un’anzianu parcheghju municipali. Costu : 4 millioni d’€. L’uppusizioni reasgisci di manera viva à issa prisintazioni, gridendu è partendu in un solu bloccu.
Francescu si sforza di prisintà issu prughjettu cum’è un’idea magnifica è rivuluziunaria. Sarani cusì missi in valori Staline, Lenine, Mao, Napuliò, Georges Frêche, De Gaulle, Gandhi o ancu Hugo Chavez. Tandu, ne u merri ne u so aghjuntu ùn sò suvitati in cità. Malgradu à tuttu u rimusciu, u prughjettu hè vutatu da u solu gruppu P3.

U lindumani, u 15 di ghjunghju, u ghjurnali « La Robbiera Tempulisi» faci un articulu prisintendu u prughjettu cum’è una « tuntia massiva». In seguita à issa Cassapi è u so cunsigliu municipali si raddunisciani in urgenza. U cunsigliu municipali emetti un votu di lagnanza contr’à u ghjurnali.
Fortu d’issu mandatu, u merri porta lagnanza contr’à La Robbiera Tempulisi.
9 ori di mani, u 16 di ghjunghju, u merri faci sorta quattru vitturi incù megafoni. Incù Francescu è dui altri aghjunti, codda in vittura cum’è passaghjeru. I vitturi cuminciani i so ghjiri di cità gridendu «La Rumenzula Tempulisi, mansa di scrucconi ! »
Issa campagna d’insulti cuntinusci duranti più di 4 ori, 4 ghjorni di seguita.

Ci voli quantunqua à pricisà qualcosa di veru. Daretu à a cumunicazioni è a l’alizzioni di Miralotta à u parlamentu Aurupeu, a gestioni quotidiana di a municipalità hè assai tranquilla. In fatti, fora di dui o trè cambiamenti di strategia in certi servizii municipali, i ripasti sò sempri serviti pà i zteddi, l’anziani poni sempri apprufittà di l’attività di u CCAS, i stretti sò sempri puliti cum’è prima. Solu a cumunicazioni cambia.
U prughjettu di a piazza hè a sola idea d’investimentu patrimunali di u merri pà l’anni 2014-2015.

Si pò dunqua dì chì u bilanciu hè assai debuli pà a nova squadra municipali, eccezzioni fatta di i colpi di cumunicazioni pupulisti fatti annantu à reti suciali o incù altri mezi.

À a fini di u cunsigliu municipali di dicembri di u 2014, una volta l’uppusizioni partita, l’aghjunta à i finanzi, Odette Copponi, annuncia di manera viziosa certi taddi privisti, pà u futuru budgettu di u 2015, in la spesa culturali è spurtiva. Cusì, i finanziamenti sò ribassati di più di a metà. Passani da 8 millioni d’€ à solu 2.9 Millioni d’€. Tutti i club sò culpiti : u club di rugby, tinutu da un uppunenti PS, vedi a so dutazioni passà da 650 000€ à solu 43 000€. Ancu l’associu di Francescu hè culpitu da taddi impurtanti. Senza pudè vutà, Francescu vedi i Chjuseddi perda 30% di finanziamentu (da 100 000€ à 70 000€), senza spiegazioni.
Altru asempiu, a mostra « Tempuli attraversu à i seculi », assicurata da un sustegnu di l’estrema dritta, vedi i so mezi municipali calà di 95 %, da 100001€ à 5000€, sulamenti. Francescu sustegni, malgradu à tutti i prublemi scuntrati, issa pulitica tossica pà l’associ lucali. Ci voli ancu à pricisà ch’issu cunsigliu municipali era difesu à i ghjurnalisti è a u publicu.

Sicuramenti, l’argumentarii di i sustegni di u merri piattani tutti issa parti di a pulitica municipali : « I taddi scuri ».
Issa pulitica finanziaria sarà, in fatti è incù certi accunciamenti, missa in applicazioni in lu 2015.

Tandu, u merri ghjustificheghja i so decisioni annantu à i reti suciali, in certi media è ancu in pubblicu incù una frasa : « A noscia cumuna va mali, ci voli à limità i debiti, i spesi. L’associ si devini sbruglià da par eddi, in autogestioni ! L’autogestioni hè un principiu chì mi piaci veramenti. Ci voli à mettalu in baddu, avà ! Eppò, l’associ ùn devini micca dumandà cusì l’aiuti, ùn semi micca filantropi». Daretu à issu discorsu, ùn dici micca a pura verità : i taddi i più forti sò fatti contr’à i so uppunenti, i taddi i più debuli pà i soii.
Annantu à issa pulemica, un ghjurnalistu rispondi «Seti u solu merri di dritta di Tempuli dapoi à più di 150 anni ! ». A risposta di u merri ùn s’hè micca fatta aspittà : «  U me muvimentu ùn hè ne di dritta ne di manca. A merria ùn hè micca passata in mani di dritta, chì ùn prisintaia omancu un candidatu. Sò di manca, a sapeti. U me cori ci ferma pà l’eternu. Aghju sempri vutatu sucialistu. Mà sò ancu un eurofobu cunvintu». Tandu, a pulitica di riduzioni di a spesa hè cunsiderata in cità cum’è viulamenti di dritta.

À u mesi di ghjinnaghju di u 2015, a nutizia di i taddi era di ghjà cunnisciuta. In più di u prughettu di a Piazza di i Famosi, quiddu di i taddi era mori criticatu. Malgradu à tuttu u rimusciu, u merri hè statu chjoncu à i rivindicazioni di i so citadini.

In fatti, « l’arburu » di i taddi piattaia a furesta di a « caccia à i streghji » missa in baddu da Cristofanu Cassapi, Francescu Ascosa è Odette Copponi. I parsunali uppunenti sò stati spiazzati ind’è servizii invisibuli, guasgi fittivi è i soii sò stati missi in valori à certi posti cum’è direttori di servizii, par asempiu. Era u casu di un omu senza diplomi, ne bascigliè ne brivettu, Michel Corinna, 41 anni. Michel era un impiegatu di i spazii verdi, sucialistu da sempri, poi P3. Hè statu numinatu cum’è Direttori generali di i servizii senza ùn capì nudda à a gestioni di una cità. Michel hè statu sempri un omu di manu di i merri sucialisti, facia u serviziu d’ordini di i manifestazioni è s‘assicuraia di a bona tinuta di i scagni di votu. A so numinazioni hè veramenti simbolica parchì, in verità, ùn gestisci nudda. Tuttu u puteri di decisioni hè cuncentratu ind’i mani di u merri.
Un solu asempiu hè a gestioni di l’impieghi pà l’istati. U merri, favurevuli à certi impieghji staghjunali, hà sottumessu i scartulari di candidatura di certi ghjovani (amichi di u P3) à Michel, chì era contr’à issi impieghi. Iss’impieghi, chì , sicondu à eddu, erani soldi lampati fora di casa, senza scopu precisu.
Tandu, Cassapi l’hà furzatu à piddà 150 ghjovani in CDD pà l’intratenimentu di i piaghji, di i spazii verdi, di i stradi, di i bibliutechi.
Incù i cantunali è i 12 cunsiglieri da eleghja in marzu di lu 2015, u colpu era privistu : Ingaghjalli mà prima dumandalli di fà a campagna pà i cantunali. Cusì a manu d’opara pà a campagna hè stata assicurata, senza rischi.

Issi ghjovani, isciuti da i 6 cantoni, sò stati furmati à u mesi di ghjinnaghju da u staff di campagna, prumettendu aiuti suciali o impieghji à a metà di i disuccupati scuntrati.
A tattica era imparabili, prumetta fin’à l’alizzioni è dopu…ùn fà nudda o pocu, simpliciamenti un colpu di cumunicazioni.

Duranti à issi cantunali, a candidatura di u ghjovanu Francescu hè missa in baddu. In effettu, candidata à u postu incù una cummircianti, Adeline Camaroli, annantu à cantonu di « San Ginestu (Tempuli-3) ». Francescu hè candidatu à i cantunali cum’è i 5 altri binomi di a cità.

U so binomu, incù i ghjovani mandati da u merri, faci una campgna veramenti attiva incù mori appuntamenti in a permanenza di campagna, situata accantu à u scagnu di votu di Marie-Christine Perodi.
Mentri a campagna hè in traci di fassi, u binomu sucialistu riveni à a carica, incù una cumunicazioni più cunvenziunali di quidda di Cassapi . Tandu, u solu meeting di i sucialisti raddunisci più di 150 parsoni quandu u binomu di Franescu scegli i pruminati incù u megafonu è u « porta à porta ».

Un sundami decisu da u merri à un mesi di u scrutinu vidia i sei cantoni vinti di a squadra P3, incù Ghjorghju Miralotta in capilista ufficiali.

Tandu, in Tempuli, a vita cuntinuveghja…

Lasciate un cummentu ?

This site uses Akismet to reduce spam. Learn how your comment data is processed.