Tempuli : Speranza è scunfitta

Sicondu capitulu

L’Auropa, putenza trè.

Riturnemu à u mesi d’aprili di u 2014. Cassapi pensa à l’Auropa. Un l’ama tantu iss’Auropa, tuttu cum’è un scrittori celebru in tutta a Tulsana di Tempuli : Ghjorghju Miralotta. Senza sustegnu righjunali, Cassapi è Francescu sò ubligati à fà un a lista indipendenti chjaramenti euroscettica, basata annantu à i temi di l’ambienti, a rifundazioni demucratica, a prutezioni suciali, i dati di internet, a scunfitta di l’Unioni Aurupea annantu à l’immigrazioni è l’euro. Avendu vistu à u M5S, pensa à appoghjà u so discorsu annantu à famosi Grillini (5 stelle).

6.5 millioni d’alittori di a Tulsana Tempulisi ricevani a prupaganda di u muvimentu P3, incù a faccia di Miralotta in primu pianu.

Tutti i ghjurnali parlani di a campagna tonica di u muvimentu è si stona di l’intenzioni di votu à u più altu : 10%, fendu cusì eleghja u capilista. Miralotta, mancu pupulistu pà un soldu mà aurofobu, lancia a so campagna u 20 d’aprili ind’è i Chjuseddi di Francescu. Issu locu pò accoglia à pocu pressu 1500 parsoni. Issu ghjornu, a sala hè piena. U meeting cumincia incù a canzona d’Olivia Ruiz «Ce Georges » è incù l’applausi di u publicu à a vinuta di u merri. U discorsu di u merri hè particularamenti brevu, cortu è fattu contr’à i sucialisti aurupei.

Miralotta lancia un discorsu incù motti forti : « Sucialisti ? Induva seti ? À u fondi di i carceri ? Firmetici ! Piddaremu tuttu u puteri chì u populu ci dà pà metta in terra u sistemu clanistu d’iss’Auropa brutta porca ! L’Auropa, i democristiani è sucialisti l’ani ruvinata, è incù eddi i so coorti di tecnucrati…». U discorsu dura 25 minuti, insultendu à Bruxelles, Strasburgu è tutti i lobbies.

Una volta u meeting finitu, i militanti facini u so travaddu di tarrenu, purtandu a voci di u merri è di u muvimentu in tutta a righjoni di a Tulsana Tempulisi.
Mentri chì a campagna hè in marchja, Cassapi metti in baddu l’attribuzioni di i presidenzi di i scagni di votu : 5 à l’uppusizioni è 40 à a maghjurità.
Trà i 40, eddu presidaria u primu, unu di i dui di a merria, Francescu u 29 (quiddu di a Muntagna di San Ginestu) è Marie-Christine Perodi u 30, quiddu di a Cuddata Durata, quartieru riccu di a capitali di righjoni.

Issu quartieru, Marie-Christine u cunnosci bè. Ci stà dapoi a so nascita, in lu 1969. Sicritaria à u cunsigliu generali, hè a zia di u merri.
In verità, edda teni u listessu scagnu di votu dapoi u 1989, ancu quandu a merria era di dritta, sottu à Francis Bassacutena (1989 – 2001). Usa sempri di i so metodi pà fà perda o vincia un alizzioni à i so candidati, senza fà inchjapassi.

In fatti, u so scagnu, u numaru 30, era sempri quiddu induva i sucialisti faciani in generali a parcentuali più impurtanti di voti in cità. Un solu asempiu di fedelità à i voti di manca : Jospin avia raccoltu 40% di i voti in lu 2002 à u primu ghjiru, Royal 47 % (2007) è Hollande 48 % (2012). Mà Marie-Christine ùn era micca pà nudda in issi sciffri impurtanti, vistu chì l’affluenza riali in lu so scagnu di votu era di 55/65 %, sicondu à l’alizzioni mentri chì a participazioni riali era, ogni volta, di più di 80 %. A froda hè sempri passatu par quandi ! Mà chì froda ? L’alizzioni di tandu ne diciarani di più annantu à issu cumpurtamentu.

U 13 di maghju, 10 ori di mani, i prisidenti prescelti da u merri sò raduniti in a sala di u cunsigliu municipali pà discuta di i metodi d’azzioni. A riunioni privata pricisa u materiali prisenti cum’è l’urni, i codici alitturali, i penni, i carti di contu, i chjavi è tuttu u restu. Cassapi dici in più « A bibbia hè a legi, solu u codici alitturali ! Pà fà vincia u vosciu candidatu, seti libari di fà boni cosi in cuscenza ! U codici dimenticheghja una cosa : i pricuri, sistema mori usatu ind’è nò ! Cunsista à cunnoscia ammenti a voscia lista è i vutanti. Marie-Christine, edda, cunnosci a lizzioni annantu à i so deci diti.

Pà l’uccasioni, a prifettura avia autorizzatu pà l’ultima volta a tinuta di u scrutinu incù mascini alitturali elettronichiurdinatori di votu. In fatti, bastaia à traficà u codici “surghjenti” di l’urdinatori è vutà in tutta tranquillità, senza chì i vutanti a vidissini. Hè quissu u sistemu di i pracuri internet, fora di legi, senza dubbiu.

Dopu à una campagna veramenti corta, i candidati di tuttu u circondu si sò priparati à affruntà u scrutinu in tutta serenità, particularamenti Ghjorghju Miralotta è a so squadra, incù l’intenzioni di votu à più di 10 % à a fini di a campagna. I megafoni aviani parcorsu tutta a Tulsana di tempuli duranti à l’ultima sittimana di travaddu gridendu sempri motti pupulisti « L’Auropa basta, i scrucconi fora da Bruxelles ! L’Auropa ci tomba, distrughjemula !»

U 25 di maghju di u 2014, si teni u scrutinu. Marie-Christine hè, cum’è privistu, à u scagnu numaru 30, incù esattamenti 1000 vutanti. A participazioni pà iss’alizzioni hè debuli, in generali ? Qu’à cela ne tienne, cum’è si dici ! 2 % di participazioni (20 vutanti) à 10 ori, 8 % (80 vutanti) à 11 ori, 10 % (100 vutanti) à 12 ori è…49 % à 2 ori di u dopu meziornu (490 vutanti). Sulamenti, solu tredici alittori si sò spiazzati. 13 vechji omini, tandu.

À 6 ori di sera, ghjunghji u mumentu di i risultati. Incù 66.6 % di participazioni, 666 vutanti, hè u scagnu incù u più forti tassu di vutanti (falsi è riali). À u mumentu di u spogliu, tutu u materiali hè prontu. Marie-Christine leghji i nomi di i listi è l’assessori cumandani l’impressioni di risultati di mascina.
U risultatu hè senza appellu. U P3 vinci l’alizzioni incù 82.28 % di i voti (548 voti) ind’è Marie-Christine, davanti à a lista di u fronti naziunali incù sulamenti 4,05% (27 voti), a lista UMP 4,05% (27 voti) è u PS incù 1,95% (13 voti). Senza froda, è in teuria, a lista di u P3 avaria ricivutu solu 28 voti, dendu un risultatu di 28 voti annantu à 146, sia 19,18 % di i voti, ghjustu davanti à u FN è l’UMP incù 18.24 % di i voti.
In a cità sana, u muvimentu P3 hà raccoltu 61.6% di i voti, contru à 10,15 % pà l’UMP, 7,96 % pà u PS, 7,89 % pà Nouvelle Donne, 5,22 % pà u PCF, 5,15 % pà u FN. Un’estimazioni avia datu, sicondu à Francescu è certi amichi di u merri, u P3 à 23,2 % senza froda, daretu à l’UMP à 23 %.

Screenshot_20180604_193813

9 ori di sera, Cassapi è Francescu Ascosa, veramenti fieri di u risultatu, venini davanti à u publicu radunitu annantu à a Piazza di i Rè, in centru cità, accantu à a merria. In un discorsu di cinqui minuti, Cassapi, briagu zuffu, annuncia tremendu l’alizzioni di Ghjorghju Miralotta à u Parlamentu Aurupeu incù 9,89 % di i voti, incù 39 % di participazioni, u FN essendu sbuccatu in testa incù 29,93 % di i voti. U merri ne apprufitta pà rida di a debulezza storica di u PS in cità.
Miralotta ghjunghji annantu à a scena incù u so libru « L’Europe, le début de la fin », lu alza in publicu è parla di l’Auropa cum’è un « mali assulutu da cumbatta », ne apprufitta pà fà a publicità di i so libri è pà ringrazià u publicu.
À a fini di u discordu, u merri si ne casca in terra, sempri briagu zuffu. U lindumani, i ghjurnali ani più ritinutu u so « veru-falsu » plebiscitu in cità cà a so briaghina.
U ghjornu di a prima seanza di u Parlamentu Aurupeu, Miralotta pidda a so prima fotò mittendusi davanti à a bandera aurupea à a quali moscia un terzu ditu di a manu. In cunsequenza, Miralotta hà decisu di andà incù l’euroscettichi di l’EFDD, cum’è u « Movimento 5 Stelle» d’Italia o l’UKIP d’Inghilterra.
À u liveddu lucali, iss’alizzioni pari cunfortà Cassapi ind’è u so feudu.
A seguita à u prossimu episodiu.

Lasciate un cummentu ?

This site uses Akismet to reduce spam. Learn how your comment data is processed.