Dì chì u diploma hè una chjave chì permette à tutti d’apre e porte di l’avvene, alzassi di manera suciale è ecunomica, pare una bucia tamanta à u mondu per parechji scrittori di u currente d’opinioni ulìstiu è deterministu cum’è Marx o Bourdieu. Secondu elli, seria solu un strumentu di duminazione criatu da a parte ricca di a pupulazione chì permette di ghjustificà una pusizione suprana di pettu à e parti mezane è inferiori di a sucetà. In u so libru L’eredi è ancu in U novu capitale, Pierre Bourdieu dice chì a parte ricca hà un vantagiu in scola è hè dunque più faciule per elli d’avè i diplomi chè per i studienti d’urigine suciale inferiore postu chì a parte ricca hà una certa cultura chì l’aiuta pè i cuncorsi è l’esami.
Per riesce, ci vole dunque à acquistà i valori è e norme chì venenu da sta parte ricca di a sucetà: fà cum’è elli, avè e listesse riferenze musicale, artistiche, storiche, cinematografiche ecc. A sucetà favuriscerà à qualchissia chì cunnosce a literatura classica pà raportu à un grande spicialistu di ballò chì a literatura classica hè più vicina à l’habitus di a burghesia quandu chì u ballò hè più vicinu à a cultura pupulare. Serà dinù forse più faciule incù un impegnu assuciativu in l’umanitariu chè in u gruppu di sustenidori ultras ancu sì ste duie situazione dumandanu è sviluppanu cumpetenze particulare. Sì no seguitemu sta logica quì, si capisce bè chì u studiente di i mezi pupulari s’averà da alienà o da acculturà aduprendu u vucabulariu marzistu, vene à dì, rinunzià à a so cultura d’urigine per adattassi à a cultura suprana s’ellu vole avè u so diploma o u so cuncorsu chì l’hà da permette di emancipassi.
Ma ci vole à dì dinù ch’ella ùn hè micca cusì faciule è assai persone ùn ci la facenu, ciò chì pò ancu purtà à u so fiascu scularu. A scola diventa tandu u locu d’una viulenza simbolica chì per Bourdieu « face cresce l’inegualità suciali perpetuendu una vera aristucrazia sculara. » E persone chì riescenu sò quelle chì fanu parte digià di a parte ricca di a sucietà. U diploma ùn saria tandu chè un certificatu di nubiltà, segnu d’acquistu di a cultura suprana chì permette à ste persone quì di ghjustificà a so duminazione ecunomica è culturale annantu à quill’altre. Ùn saria più quella chjave chì apre e porte di l’avvene ma un strumentu viulente contru à i disgraziati. In lu listessu filu, Marx spiega a so tesa induv’ellu dice chì u capitale umanu hè solu un strumentu cù u scopu di rinfurzà a pusizione di duminazione di a burghesia è hè ancu un strumentu chì i travagliadori vicini à a burghesia si ne servene cum’è un paracqua per ghjustificà e sfarenze di cumpensazione cù l’altri travagliadori. U diploma ùn hè una chjave per quelli di i mezi pupulari è inferiori ma un strumentu d’alienazione chì i forza à rinuncià à ciò ch’elli sò veramente : pruletarii chì sò assuggettiti à a parte ricca chì adopra u diploma cum’è strumentu di leghjittimazione di a so duminazione di pettu à e categurie inferiorie. U diploma ùn li permette d’apre tutte e porte di l’avvene ma hè u simbulu di l’appartinenza di l’individuu à a burghesia culturale è ecunòmica d’una sucetà, segnu di a so alienazione è di a so acculturazione.
Cusì, d’appressu à i scrittori studiati in sti dui articuli, u diploma apre e porte di l’impiegu è di l’emancipazione solu per una parte digià favurita di a ghjente. Face solu riproduce u stessu schema per quelli chì sò di e listesse famiglie è urigine suciali è intellettuali. Stu fenomenu hè rinfurzatu da un insegnamentu fundatu nantu à a cultura burghesa chì impone à quelli di i mezi più pupulari, l’acculturazione per rispittà ciò ch’ella aspetta a sucetà. È ghjè cusì chì u diploma perde a magia ch’omu li vulia dà.
È voi chì ne pensate ? U diploma, strumentu di duminazione o veru strumentu d’emancipazione per e parte inferiori è mezane di a pupulazione ? Site di u currente ulìsticu o micca ?