Si dicia chì Emmanuel Macron era preuccupatu, sicondu à i so cullaburatori. D’altri parsoni diciani chì a crisa tedesca fussi un uppurtunità pà a Francia. In fatti, Macron avia una paura, quidda di veda fascà u prughjettu spiigatu in dittagliu ind’è u so storicu discorsu di u 26 di sittembri di u 2017 à a Sorbonne a prò d’una custruzioni aurupea più integrata in ghjiru à a coppia franco-tedesca. A colpa di a Germania!
Ah, issi tedeschi rigoristi, sempri impinseriti pà i cosi urdinati ! Eccu, sò ind’è un disordini senza nomu. Si dici à spessu chì nudda in Auropa ùn si pò custruì senza à a Germania, prima putenza ecunomica è industriali di u cuntinenti.
Mentri l’imprubabuli cualizioni « jamaicana » sperata da Merkel trà a cunservatrici CDU, u liberali FDP è i Verdi si sfalò davanti à l’antagunismi trà i diversi partiti, a tinsioni era dighjà massima. Tutti iss’avinimenti erani logichi parchì una furmazioni pulitica anti-aurupea, anti-immigrazioni di dritta radicali era ghjunta à u Bundestag (parlamentu), l’AFD. L’Alternativa pà a Germania (AFD) hè un partitu chì ricorda à mori tedeschi qualchi pagina fosca di a so storia.
Sei mesi dopu à l’alizzioni legislativi cunducendu à l’anarchia spiigata innanzi, u votu di i militanti di u SPD (partitu sucial- democratu di Germania) in favori di una cualizioni incù i cunservatori di a CDU (Merkel), pruteghji di novi prublemi à l’Auropa dopu à i successi di partiti eurosceptici in Auropa Urientali, u Brexit a scunftta di u partitu di l’euroflu sucial-democratu Matteo Benzi. L’accordu CDU-SPD apri un periodu di stabilità necessaria pà u capu di fla di l’UE.
A partita ùn era tandu vinta mentri u capilista di u SPD, Martin Schulz (anzianu presidenti di u parlamentu aurupeu), dichjaraia in a fni di u 2017, ch’ùn participaria mai à una cualizioni incù Merkel.
Mà Merkel pari essa inossidabuli. In fatti, a cualizioni « dritta-manca/CDU-SPD » ùn hè micca nova, di sghjà spirimintata in lu primu mandatu (2005) poi duranti à u terzu mandatu Merkel. Annantu à i quistioni aurupei, ecunomichi è migratorii, a CDU è u SPD ùn sò tanti luntani l’una di l’atru. U SPD era favurevuli à un’accolta impurtanti di migranti, in cunfurmità à a pulitica di Merkel.
L’idea di un ministru di i finanzi di a Zona euro è di un bilanciu aurupeu hà fattu u so caminu ind’è a cualizioni. L’idei sò accumpagnati dà un raforzamentu di a cuntribuzioni tedesca à u bilanciu aurupeu o a creazioni di un fondu munetariu aurupeu ». Emmanuel Macron trova un ecu à u so discorsu di u 26 di sittembri scorsu. L’usservatori ani dittu, in generali, ch’issa cualizioni pudaria essa una di l’ultimi pà a salvaguardia di l’Auropa.
A Germania evita à cort’andà novi alizioni, necessarii senza accordu i sucialdemocrati. Quistu’ultimi ùn ani micca vutatu à 66% pà salvà à Merkel. Si sò salvati eddi stessi di l’umiliazioni di passà daretu à l’AFD cum’è à vidiani i sundami. Podassi incù u cinismu di sperà ricuperà a Cancelleria in lu 2021, pruftandu di a guerra di secessioni à Angela Merkel ind’è a CDU.
A dritta tedesca si porta assai mali. A vultata versu à u centru uperata da a CDU apri novi uppurtunità à l’AFD chi spera fà i risultati di i Pentastiddati Taliani (32%) o di a Lega (18%). A cualizioni d’Angela Merkel hà pocu tempu pà agì. Assicurà una migliori repartizioni di i risultati ecunomichi par tutti, in particulari pà i travddadori precari, risponda incù curaghju à i sfdi di l’integrazioni.
A Germania hè anc’edda culpita da u muvimenti di fondu chì tocca l’Auropa sana. Ùn ci sarà podassi micca di siconda furtuna par edda. È pà l’Auropa, in generali.